Keremiyaxi 30 - Kakaɨyari Niukieya

'Ixaheri ke'aixɨa mɨ'itɨarieni

¹ Yawé niukieya Keremiyaxi hetsɨa kaninuani:

² «Yawé mɨpaɨ kanaineni, 'Ixaheri Kakaɨyarieya: “Xapatsie ketinaka'utɨa naime tita nemɨmatiutaxatɨa”.

³ Yawé mɨpaɨ kanaineni: “Karikɨ tukari kanaye'amɨkɨ, kepauka ne nemɨwarakunuitɨani memehapaniekai neteɨterima 'ixaheritsixi meta Kura teɨteriyari, nekaniwa'atɨamɨkɨ kwie wa'ukiyarima nemɨwayetuiritsie, hikɨ mana mekanitiyaxikuni”», Yawé mɨpaɨ kanaineni.

⁴ 'Ikɨ Yawé niukieya kanihɨkɨtɨni Keremiyaxi kemɨtiutaxatɨa 'Ixaheri meta Kura kwieyari wahepaɨtsita:

⁵ «Yawé mɨpaɨ kanaineni: »“Memumariutsie wahiwari tepɨ'enie, kayuwatɨ pɨka'uma, matsi marika xeikɨa puxuawe.

⁶ Xekeneuti'iwau xekeneuyu'ɨwiya 'ukitsi kuta metetiniweya. ¿Titayaritsɨkamɨ yunaime 'ukitsi netiwaxeiya yukwatsapaɨtsie me'akɨwɨkame, 'ukarawetsixi memɨtiniwexɨaxime wahepaɨ? ¿Titayari kwinimieme mete'anakamama yunaitɨ?

⁷ Xɨa'ui. Mɨkɨ tukaritsie pumariwekareni, tukari hatsuaku kemɨkatiyɨwe pɨtiyɨni. Kakuwu hetsiemieme hiwerika pɨrayani, peru mana ya'anekɨa payewikweitsitɨarieni”.

⁸ »Mɨpaɨ kanaineni Yawé Naimekɨmɨtɨrɨkaɨye: “'Iya tukaritsie, yuku nekanitamuramɨkɨ neteɨterima yɨkɨipi heima memetɨkɨ, kɨmana memɨwiwietɨka nekanititekimɨkɨ, hatsuakuri teewatari tewa'uximayatsiriwamete mepɨkahakɨne.

⁹ Yawé, yukakaɨyari xeikɨa xepɨte'uximayatsirieka, meta Rawiri, tixe'aitɨwame nepayeitɨani.

¹⁰ »”Pepɨkamaka, Kakuwu, neti'uximayatsiriwame, pepɨka'utimamaweni 'Ixaheri —Yawé mɨpaɨ kanaineni—. 'Ekɨ Kakuwu, nekamenixɨnamɨkɨ mɨkɨ kwie 'ateewa mukuma hetsie, meta 'anuiwarima memehapanie neniwa'atɨamɨkɨ. 'Aixɨa 'iyari pe'uyeikatɨ pekanayeimɨkɨ meta peka'uximatɨarietɨ, Hatsuakuri xewitɨ pɨkamatsitimariuta.

¹¹ Karikɨ ne 'ahamatɨa nekaniuyeikani nemetsitawikweitsitɨanikɨ —Yawé mɨpaɨ kanaineni—. Yunaime nuiwarite nekaniwaka'unamɨkɨ yuheyemekɨ kemɨ'ane wahetsɨa nemetsiheutanɨ'akai. Peru 'ekɨ naime nepɨkametsika'una, matsi nepumatikwinitɨani kemɨtiheitseriekɨ xeikɨa, peuyewetsetsiere nemumatikwinitɨakakɨ”.

¹² »Yawé mɨpaɨ kanaineni: »“Kenemumatikwinitɨa pɨkayu'uayemarinɨa, 'ahaiya 'uayeyari pɨkaxɨawe.

¹³ Xewitɨ pumawe 'ahetsie mɨtanuanikɨ kepemɨranuyemie, ke'axapemɨtiuyurikɨ pumawe 'uayeyari meta 'akwiniyakɨ 'aixɨa pemɨtika'erienikɨ.

¹⁴ Yunaitɨ memumatsinaki'eriekai mepumatsi'uku'eiri, mepɨkamatsiha'eriwari. Waɨkawa 'axapemɨtiuyurikɨ, meta mɨmɨirekɨ ke'axapemɨtiuyuri, nekamenanayewayani nekamenayemari'itɨwani, xewitɨ mɨrayuye'unie kemɨrayurieni hepaɨ.

¹⁵ ¿Ketitayari pera'aiwa 'akukuiniyakɨ, panatsi 'akukuiniya yu'uayemarinɨa? Ke'axapemɨtiuyuri pɨtimɨire meta waɨkawamekɨ 'axapemɨtiuyurikɨ, 'ayumieme mɨyanekametinipitɨaka.

¹⁶ »”Yunaitɨ kemɨ'ane memɨxetikwani mekanitikwaiyakuni, yunaitɨ memɨxe'aye'unie 'ateewa mekananuhapaniekuni. Yunaitɨ kemɨ'ane memɨxetenawatsirieni mekateninawatsiyariekuni, yunaitɨ kemɨ'ane memɨtexenawairieni mekateninawaiyariekuni.

¹⁷ Peru ne nekamenimanetsikitɨamɨkɨ meta kepemɨtiukwinitɨarie nekani'uayemamɨkɨ —Yawé mɨpaɨ kanaineni— pemehɨiya pemɨtiuterɨwaruwakaikɨ, Tsiyuni tixaɨtɨ mɨkarexeiya, xewitɨ mɨkahe'eriwakɨ”.

¹⁸ »Yawé mɨpaɨ kanaineni: »“Kakuwu xamaruyata tita mɨtiyepikai nekatinanuitɨamɨkɨ, meta xekiite nekanitinenimayatamɨkɨ, kiekari kaniyukamamɨkɨ maku'unarie hetsie, meta paratsiyu kaniyukakemɨkɨ hakewa mewekai.

¹⁹ Xehetsie kwikari witsi'anɨyɨtɨ kaniyeyeimɨkɨ, temawierika hiwariyari. Xexiɨyarima nekaniwatamɨiriyamɨkɨ, yu'utɨa xepɨkakakɨne, nexenaki'erietɨ nekanayeimɨkɨ, xepɨkatixani'eriwari.

²⁰ Xeniwema 'ukitsi meripai kememɨ'anekai mɨpaɨ mekani'anekuni, nehɨxie xekiekari kanikumakamɨkɨ, peru kemɨ'ane memɨxe'aye'unie nekatiniwakwinitɨamɨkɨ.

²¹ Xetsata manuyeyerɨni kanayenemɨkɨ, mɨkɨ xewitɨ xeti'aitɨwame kanayeimɨkɨ. Ne'aurie hurawa 'uyeikame nekanayeitɨamɨkɨ, mɨkɨ nehamatɨa 'uyeikatɨ payani, ¿kemɨ'ane yutukari puyetuawe nehetsɨa maye'anikɨ? —Yawé mɨpaɨ kanaineni—.

²² Xeme neteɨterima xepɨhɨkɨtɨni, neta Xekakaɨyari nepɨhɨkɨtɨni”».

²³ Yawé 'ekaya kanayeyani ha'atɨ, 'eka waɨkawa tɨrɨkaɨyetɨ haikɨri tiyumemiwatɨ kanayenɨ'arieni 'axamemɨte'u'iyari wahetsiemieme.

²⁴ Yawé haxɨaya pɨkatihayewa matsi kemutayɨ naitɨ pɨraye'ani 'iyarieya kemɨtiyɨkɨhɨawe. Naime 'ikɨ hetsie xekatenetimaikuni 'imatɨrieka tukariyaritsie.