Keremiyaxi 12 - Kakaɨyari Niukieya

Keremiyaxi Kakaɨyari kemɨtiutahɨawixɨ

¹ 'Ekɨ, Yawé heitseriemekɨ pekatinikuxatani kepauka nemɨniukixie 'ahamatɨa. Matsi hikɨ nepɨmatitaxatɨanikeyuta 'etsiwa tita mɨtiheitserie hepaɨtsita. ¿Titayari 'axamemɨte'u'iyari 'aixɨa mete'itɨarie? ¿Titayari teyukwamanamete kayuwatɨ mete'u'uwa?

² 'Ekɨ pepɨwaruka'etsa, mɨkɨta mepananayata, mepɨtiwawere meta mepukaxuxuawere. Yutenikɨ mepɨmatsinɨawa, peru wa'iyaritsie pepɨkayeka.

³ Yawé, 'ekɨ ne pepɨnetsimate, 'ekɨ pepɨnetsixeiya meta pepɨtimate kenemɨtinewaɨriya 'ahetsiemieme. Keniwaranuhapani, muxatsi memɨkwi'iwa wahepaɨ, keniwaranuyeteɨxi 'iya tukaritsie memɨkwi'iwakɨ.

⁴ ¿Kepaukake pɨkawiye 'ena kwiepa, kepaukake pɨtitiyɨra tupiriyate? Yeutari meta memɨte'awɨwawe mepɨkwi'i teɨteri 'axamemɨte'uyurikɨ 'ikɨ kwieyaritsie kiekatari, memuyuwaɨriya mɨpaɨ memɨtiyuanikɨ: «Kakaɨyari kepauka temeuyeweni pɨkatatsixeiya».

Kakaɨyari kemɨtiuta'a

⁵ «Xɨka teɨteri memanautsawawe wahamatɨa pe'uti'uxikeni, ¿Kehepaɨ petiwaruta'iwawe kawayutsixi? Xɨka pehekawautseni makuweritsie, ¿kepeyɨniri Kurutani mu'ɨtsiyatsie?

⁶ 'A'iwamatɨtɨ, 'axeikɨa nunuiwakate, mepɨmetsi'uku'eiri meta 'axameputiyuane 'ahepaɨtsita. Tsepa waɨkawa witsimemɨmetekɨhɨawe, yuri pepɨkatiwa'eririeka.

⁷ »Neteɨterima nepuwaruku'eiri, tita mɨtinepiinitɨkai nepiku'eiri, neteɨterima nemɨwanaki'erie nepuwayetua memɨwaraye'unie wahetsɨa.

⁸ Nepiinite nemɨtiwayetuirienikekai nehepaɨtsita mayetsi wahepaɨ meputiyuane. Mepɨnetsikukewe tɨma, 'ayumieme nepɨwaxani'erie.

⁹ Nehetsiemieme neteɨterima wiki witsimeu'ane hepaɨ nepɨtiwaxeiyakai memimietɨwe wirɨkɨxi. Xekenehu, xekeniwarukuxeɨri yunaime yeutari. Xekeniwa'atɨa memitakwanikɨ.

¹⁰ Yuwaɨkawatɨ muxatsi wahɨwemete nekaxie haraweriyari mepuka'unaxɨ, nekwie naime mepakuketsi, neharaweri witsimɨ'anekai makumawe mepayeitɨa.

¹¹ 'Unime mepuhayewaxɨ, 'akuwakime meta 'akumaweme nehɨxie, naitɨ 'ikɨ kwieyari puka'unarie nixewitɨ mɨkaheiyehɨwakɨ.

¹² Naitsarie makumawetsie yemurite mɨtiteitsie mekaniu'axɨani teyumemiwamete. Yawé 'ixiparaya 'ikɨ kwieyari kanika'unamɨkɨ naime 'etsiwatɨma yayeume pɨkahayewa, meta nixewitɨ kayuwatɨ pɨkahexeiyani.

¹³ Tɨriku mepuka'e hikɨ xuya mepuka'itsanaxɨ, yakɨ xeikɨa pɨratɨa wa'uxiya. Yawé waɨkawa mɨha'akɨ mepuyutitetewiya tita memɨte'uka'itsanaxɨkɨ».

¹⁴ Yawé mɨpaɨ kanaineni: «Yunaitɨ teɨteri 'auriena kiekatari 'axamemɨte'u'iyari neteɨterima 'ixaheritsixi tita nemɨtiwarumi memɨte'umayɨa, nepuwarahuna wakwiepa, meta Kura xiɨyarimama watsata nekaniwaxɨnamɨkɨ.

¹⁵ 'Arike newarahuname, nekaniwatinenimayatamɨkɨ, nekaniwa'atɨamɨkɨ yuxexuime wakwietsie nemɨwayetuiritsie.

¹⁶ Xɨka yemekɨ meheitimani neteɨterima wahuye, mɨpaɨ kememɨtewaru'ɨkitɨakai neteɨterima Wahari hetsiemieme kememɨteyɨhɨritɨakakɨ, mɨpaɨ xɨka metehetimani kenemɨtitewakɨ xɨka meyuhɨritɨatɨ mɨpaɨ me'utiyuani: “Yawé 'ake'uyeikani yemekɨ”, hikɨ 'ana neteɨterima watsata mekaniyuhayewakuni.

¹⁷ Peru kemɨ'ane nuiwari mɨkaheu'enani, yuheyemekɨ nepikumaweriya meta nepɨwaka'una», Yawé mɨpaɨ kanaineni.