Keremiyaxi 10 - Kakaɨyari Niukieya

Kakaɨyari meta kakaɨyarixi

¹ 'Ixaheritsixi teɨteriyari, xekeneu'eni Yawé niukieya.

² Mɨpaɨ kanaineni: «Xeme xepɨkawa'ɨkeni hipatɨ nuiwarite kememɨteyurie, meta xepɨkamamaka 'inɨari muyuawitsie miemekɨ, tsepa hipatɨ nuiwarite memimakaxe.

³ Teɨteri wayeiyari tixaɨtɨ pɨkatihɨkɨ. Kɨye mepawiteke 'ɨtsita, kɨyekɨ mɨti'uximayatawe pititsatsewe.

⁴ Hurukɨ meta pɨratakɨ witsi'aneme mepayeitɨwa, kɨrapuxikɨ menikutseiriyani meta titsunamekɨ mɨkawatayuanenikɨ.

⁵ »Wakakaɨyarixima mepɨkaniuwawe, 'ewieri wikixi wamariutame hepaɨ mepɨtematsiɨkɨ xutsi ma'etsietsie muwe hepaɨ. Peuyewetse memɨkɨtɨkietɨweni memɨka'ɨkɨniwawekɨ. Xepɨkawamakarɨka, 'axamemɨxe'uyurieni mepɨkayɨwawe, metatsiere 'aixɨa memɨxe'uyurieni».

⁶ Yawé, xewitɨ pumawe 'ahepaɨ 'anetɨ. Pepɨmariwe 'ekɨ, 'ekɨ yemekɨ pepɨmariwe meta pepɨtɨrɨkaɨye.

⁷ ¿Kemɨ'ane pɨka'itimakani, yunaime nuiwarite Tiwa'aitɨwame? 'Ekɨ mɨpaɨ pɨreuyewetse 'ahetsiemieme. Yunaitɨ memɨtemaiwawe memu'uwa watsata, meta yunaitɨ te'aitamete watsata, xewitɨ pumawe 'ahepaɨ 'anetɨ.

⁸ Yunaitɨ mepɨka'u'iyari 'axamemɨteyurienikɨ xeikɨa pɨwanake, kɨyexi kakaɨyarixiyari 'ɨxatsitamete mepɨhɨkɨ wahetsiemieme.

⁹ Taritsi paitɨ patɨwa pɨrata 'etsimutsutsui, meta 'Upatsi huru patɨwa. Memɨkakakaɨyarixi wa'ɨkiyari, mɨtataɨrawi meta mɨxeta memanakatɨtɨka, teɨteri tewewiwamete meta tepɨa kwaniyamete mɨkɨ yunaitɨ wawewiya mepɨhɨkɨ.

¹⁰ Peru Yawé xeikɨa yuri Kakaɨyari kanihɨkɨtɨni, Kakaɨyari mayeyuri, yuheyemekɨ Ti'aitame. Kepauka muyeha'arɨwe, kwie kanewatayuaneni, nuiwarite haxɨaya memunewieni mepɨkayɨwawe.

¹¹ «Mɨpaɨ pepɨtiwatahɨawe: “Mɨkɨ kakaɨyarixi muyuawi memɨka'utawewi meta kwie, mekanikumawerikuni 'ena kwiepa meta muyuawi hetɨa”».

¹² Kakaɨyari kwie kaniutawewieni yutɨrɨkariyakɨ, kemɨtimaiwekɨ kwie 'aixɨa katiniuyeni, muyuawi 'ayeume kanayeitɨani kemɨtimaiwekɨ.

¹³ Kepauka mɨkɨ mɨtaniuni, tɨranarikɨ haa muyuawitsie pakaneika, hai kanewa'iniwani kwie manuye'atɨka paitɨ. Mimierɨkaritsata wiyeri kaneyenɨ'awani, meta 'eka muye'ɨnetɨkatsie peiyepiwa.

¹⁴ Teɨteri 'atsimemɨkatemate meta memɨte'ukatawe'erie mepɨhɨkɨ, kakaɨyarixi wawewiwamete mepuyutetewiya yuwewiyakɨ. Tita memɨtewewie pɨti'itarika, meta mepɨka'ayeneniere.

¹⁵ Tixaɨtɨ mepɨkateyunaki'erie, wawewiya pɨnanaiyɨkɨ xeikɨa, kepauka tukari maye'ani memɨtekwinitɨarienitsie, mepɨka'unarieni.

¹⁶ Kakaɨyari Kakuwu manayexei nuiwarieya mayanikɨ mɨkɨ wahepaɨ pɨka'ane, matsi mɨkɨ naime mɨtiunetɨa kanihɨkɨtɨni, Yawé Naimekɨmɨtɨrɨkaɨye katinitewaka, meta nuiwarieya 'Ixaheri kanihɨkɨtɨni.

Kememɨteka'unarieni peutihura

¹⁷ 'Apiinite ketineukuteɨxi kwiepa, 'ekɨ 'akiekari manutinamie.

¹⁸ Karikɨ mɨpaɨ kanaineni Yawé: «Hikɨrixɨa 'ikɨ kwieyaritsie kiekatari 'ateewa neniwarexɨrimɨkɨ texupamekɨ nemɨwarexɨrieni hepaɨ. Hura meti'uitɨariekame nekaniwarayeitɨamɨkɨ, meta yanekatiniwapitɨamɨkɨ mɨkɨ memɨtiwiyarienikɨ».

¹⁹ Xɨa'ui ne, nepeutimurariexɨa. Kenemɨtiukwinitɨarie pɨkayu'uayemarinɨa. Peru pɨnekwiniya peuyewetse neminewieka.

²⁰ Naitɨ nexamaru puka'unarie, meta naitɨ pɨteteki nekaunarite. Neniwema 'ukitsi yunaitɨ mepɨnetsi'uku'eiri, mepɨka'u'uwari. Xewitɨri pumawe nexamaru mɨtawewieni, meta ne'ixuriki kiiyari mɨkawieni.

²¹ Muxatsi wahɨwemete 'atsimekatemaitɨ mepakɨ, Yawé mepɨka'utiwau, 'ayumieme kememɨteku'eriwakai yapɨkatiuyɨ, wamuxatsi naitsarie mepeutaxɨriexɨa.

²² Xekeneu'enana. Niuki kani'atɨarieni. Tɨranari 'upamie tayeta kiekatari wahetsɨa payeneni, Kura kiekariyari tepayani yawixi memayu'eririya wakie, kii 'unimeyari kwinienetɨ muwe kanayeimɨkɨ.

Keremiyaxi nenewierieya

²³ Yawé, ne nepɨtimate tewi yutukari pɨkakutsiyari, pɨkapitɨarie yeikame kemɨtinake mumieni.

²⁴ Yawé, keneneutaheitseritɨa perutsɨ heitseriemekɨ, hawaikɨ 'ahaxɨakɨ, mɨpaɨ pekaneniuka'unaweni.

²⁵ Hipame nuiwarite wahetsie pɨta 'ahaxɨa keneukanɨ'a, memɨkamatsimate wahetsie, meta 'iya memɨkamatsihahɨawe wahetsie. Karikɨ Kakuwu mekaniutakwani, naime mekanaxɨni, meta kiena makumawe mekanayeitɨani.