'Itsɨkate 5 - Kakaɨyari Niukieya

Rewura kwikarieya

¹ Mɨkɨ tukaritsie Rewura meta Waraki 'Awinuhani nu'aya mɨpaɨ mekateniukwika:

² «Kepauka te'aitamete 'ixaheritsixi memɨte'aita, kepauka teɨteri yɨkɨmana memɨyuwaɨriya, Yawé 'aixɨa ke'itɨarieka.

³ »Xekeneu'enana, te'aitamete. Xekene'enanaka xemɨte'aita. Ne nepɨtakwika, Yawé nepɨtanɨawa, nepɨtikayuitɨani Yawé hetsiemieme, 'ixaheritsixi wakakaɨyari.

⁴ »Yawé, kepauka Tsehixi hetsie pemɨyetɨa, kepauka 'Erumi kwieyaritsie pemuyemiekai, kwie putayua, muyuawitsie mepɨwatayua, haiwitɨri haa putayeuri.

⁵ Hɨrite putiyɨyɨakaxɨ Yawé mexeiyatɨ, Kakaɨyari Tsinahi kiekame, Yawé mexeiyatɨ, 'ixaheritsixi wakakaɨyari.

⁶ »Kepauka Tsamɨkaxi muyeikakaitsie 'Anati nu'aya, kepauka Kaheri muyeikakaitsie, kɨkamete huye mekaniuku'eirieni 'axamɨtiu'anetsie mekaneukuyune.

⁷ Memeuyutakwiwawekai 'Ixaheri hetsɨa miemete mekaniukumaware, mepumawekai, kepaukake ne nemanukuke, Ne, Rewura, nepanukuke 'ixaheritsixi wamaama hepaɨ.

⁸ Kepauka kakaɨyarixi hipame memɨwaranayexei, kuyaxa ninuani kiekari kitenie, huta tewiyari miriyari (40.000) 'ixaheritsixi nepɨwaruxei pitsika mepɨkahexeiyakai meta kɨmana memɨyukunarɨma tepɨa.

⁹ 'Ixaheritsixi memanuyetei wahamatɨa ne'iyari puyeika, memɨyuwaɨriya wahamatɨa. Yawé 'aixɨa ke'itɨarieka.

¹⁰ »Xeme puxuri memeutuxatsie xemanutiyaxike 'ixuriki xe'anayeweratɨ xemayaxike, xemeta, huyeta xemuhu, mɨpaɨ xeketeku'eriwani.

¹¹ Kwikari mayuane tewaxi mematiharewetsie, Yawé heitserie kemɨtiuyuri pɨtikuxata, kuyaximama 'ixaheritsixi ke'aixɨa memɨteyurie. Hikɨ Yawé kuyaximama mekaniu'axɨani kiekari kitenie.

¹² »Rewura, kenanutanieri, kenanutanieri. Kenanutanieri, kenanutanieri, kwikari keneutakwika. Kenanukukexi, Waraki 'Awinuhani nu'aya, 'apɨretsutsixi keniwaranuhapani.

¹³ »Memutawikwei wa'ukiyarima te'aitamete wahetsɨa mekanekɨne, Yawé kuyaximama nehetsɨa mepu'axɨa kwinimieme memɨteyɨwawe.

¹⁴ Hipatɨ 'Epɨrahini hetsie mekanayenexɨani meta 'Amareki nuiwarieyatsie, Wenikamini xiɨyarimama mepɨwanɨkai 'iya memɨxe'uweiyakai. Makixi memakanexɨa kuyaxi memanuyetei, Tsawuruni memayenexɨa, 'itsɨ ti'aitame memu'ɨ.

¹⁵ Rewura hamatɨa matɨari te'aitamete mepuhukai 'Itsakaxi xiɨyarimama. 'Itsakaxi Waraki hamatɨa kaniuyeikakaitɨni, mɨkɨ 'utɨa kaneyani mayeweritsie paitɨ. Xuweni kuyaximama mariwemekɨ mete'utaxataka yamepɨkatekakɨ.

¹⁶ Matsi pɨta yukie mekanitiyaxe me'atinaitɨ muxatsi wahɨwemete wahiwari wawikɨari meta'enietɨ. Xuweni nuiwarimama niuki mekanixɨatɨakaitɨni.

¹⁷ Karaha Kurutani manuyeka matsi humapaitɨ kaniukateitɨni. Rani, ¿titayari nawiyatsixi wahamatɨa tiuyuhayewaxɨ? 'Atsexi, haramara tetsita kaniuyuhayewa, haramara meutawetɨkatsie kaniuyuhayewa.

¹⁸ Tsawuruni teɨterimama yutukari mepɨyetua kepauka memukwi, Nepɨtahari kemuyɨ hɨritsie meheyukukwika.

¹⁹ »Te'aitamete me'u'axɨaka mekaniuyutakwini haa mayema Mekiru 'aurie, Te'aitamete Kanani miemete Tanaki mekaniuyutakwini, peru pɨrata mepɨkahetɨ meta kakuni kwinieraye'atɨ mɨrayepine.

²⁰ Muyuawitsie xurawetsixi mekaniuyutakwini, memanuyeteitsie paitɨ me'uyetetɨ Tsitsara mekaniutamieni.

²¹ Haa kwinimieme mɨtitɨrɨkaɨye Kitsuni kaniwarehautsitɨani, haa xeiya muhane meripaimieme, Kitsuni kwinimieme mɨtitɨrɨkaɨye. Keneumieni, ne'iyari, 'atɨrɨkarima.

²² Muratsixi wakeya payuane, muwa mepanautsaxɨaxime, muwa mepanautsaxɨaxime kawayutsixi memɨtɨrɨkawi.

²³ Yawé niuki tuayameya mɨpaɨ kaniutayɨni: “Merutsi 'axakeneuyuri 'iya. 'Axakeniwaruyuri teuterimama waɨkawamekɨ, Yawé memɨkahekuparewikɨ, Yawé memɨka'uparewikɨ meta hetsɨana miemete memɨkawaruparewikɨ”.

²⁴ »Kaheri kehɨkɨtɨni, Hewexi Keni tewiyari 'ɨyaya, waɨkawa 'aixɨa mɨ'itɨarie, waɨkawa 'aixɨa mɨ'itɨarie xamaruta memeutei.

²⁵ Tsitsara haa 'uta'iwauku, Kaheri retsi kani'itɨani, 'aixɨa memɨte'u'iyari wawatsuta retsi kwamariekame kani'itɨani.

²⁶ Yu'utakɨ kɨye kaniutikweni, yu'aixɨakɨ tepɨa titsuname tiutikwei. Tsitsara mu'uyatsie kaneitsuna, kanatana kananeni.

²⁷ 'Ɨkatɨana kaniukaweni, mana 'ukaweka mana kaniuhuni. Manuwekai kaniukaweni, mana kaniukaweni mɨkitɨ.

²⁸ »Tsitsara maamaya kii 'etsimayewatsie kananiere, waɨkawa 'iyarixietɨ mɨpaɨ katiniuhiwa: “¿Titayari kaxetaya hawaikɨ karamie? ¿Titayari kaxetate wayuariya kara'eniɨriɨkɨ?”

²⁹ 'Ukarawetsixi kwinimieme memɨtemaiwawe mɨpaɨ mekaniutiyuani, mɨkɨta yaxeikɨa kanaineni:

³⁰ “Mekateneyutapitɨwani piinite, tita memɨtewarenawairi: yuxexuime yatɨ yuhuhutame 'ukari yuxexuitɨ kuyaxi, 'ixuriki witsimɨ'anene Tsitsara hetsiemieme, xeime 'ixuriki, yatɨ hutame, witsimɨ'anene muxutɨka nekɨipitɨamieme. Naitɨ 'ikɨ 'iya tiwapiinite”.

³¹ »Mɨpaɨ mekete'ukwini yunaitɨ Yawé, memɨmatsi'aye'unie. Peru kemɨ'ane mɨmatsinaki'erie, tau hepaɨ ke'aneni kepauka maneika xawatɨtɨ». Hikɨ 'ixaheritsixi kayuwatɨ mekanexeiyakaitɨni huta tewiyari wiyari.