'Inɨatsie 12 - Kakaɨyari Niukieya

Miriyami, 'Aruni hamatɨa Muitsexi kememɨteniukimakai

¹ Muitsexi xeime 'uka 'ekipitutanaka kaniutiwitɨni, hikɨ Miriyami 'Aruni hamatɨa mekanitiniukimatɨkɨne mɨkɨkɨ.

² Mɨpaɨ mekaniutiyuanekaitɨni: «¿Kamɨtsɨ Yawé Muitsexi xeikɨa tikuhɨawe? ¿Tamɨ tameta katatikɨhɨawe?» Hikɨ Yawé kaniwaru'enieni.

³ Matsi Muitsexi tixaɨtɨ karayuyeitɨatɨ 'amuyeika kanihɨkɨtɨkaitɨni, nixewitɨ tawarita hepaɨna 'anetɨ kwiepa pumawekai.

⁴ Yapauka Yawé Muitsexi, 'Aruni meta Miriyami mɨpaɨ katiniwarutahɨawe: «Xekenehu 'ixuriki tukiyari manuwe xeme xeyuhaikatɨ». Mɨkɨ mekanekɨne.

⁵ Hikɨ Yawé kanakateni hai 'a'uwekametsie, 'ixuriki tukiyari hɨxie kaniuyuhayewa. 'Aruni meta Miriyami mame kaniwaruta'inieni, kepauka yuhutatɨ memɨwakɨ,

⁶ Yawé mɨpaɨ katiniwarutahɨawe: «Xekeneneu'eni kenemɨtixetahɨawe: »Kepauka Yawé niukameya xetsata 'amuyeika, ne nekanikɨhɨaweni heinɨtsika hepaɨ 'anemetsie meta nematsiɨkɨtɨ nekanayuyeitɨwani heinɨtsikatana.

⁷ Peru 'ikɨ mɨpaɨ pɨka'ane Muitsexi neti'uximayatsiriwame hamatɨa, yunaitɨ nete'uximayatsiriwamete watsata mɨkɨ matsi yamɨtikamie kanihɨkɨtɨni.

⁸ Ne nekatinikuxaxatɨwani hɨxiena ne'utinieretɨ, hekɨakamekɨ nekarenukanamirietɨ. Ne Yawé kenemɨ'ane kanenikuxexeiyani. ¿Ketitayari mɨya xete'utiyuane neti'uximayatsiriwame Muitsexi hepaɨtsita?»

⁹ Yawé waɨkawa kaniuyeha'ani wahepaɨtsita hikɨ kaneyani.

¹⁰ Yapauka hai 'anuku'eneku tuki heima, Miriyami nawiyarieya tuxatɨ kanayani 'ɨwi hepaɨ. Kepauka 'Aruni hepana mutɨa, kanixeiya yuwaiyaritsie kwiniya hexeiyakame.

¹¹ Hikɨ 'Aruni 'ana Muitsexi mɨpaɨ katiniutahɨawe: «Waɨkawa nepɨmatsiwawirie, neti'aitɨwame, ke'axatemɨte'uyuri pepɨkahe'eriwani 'atsitekatemaitɨ temutiyuakɨ.

¹² Miriyami yuwaiyaritsie kanepɨnini, nunutsi yumaama hetsie manuyemɨ nawiyarieya hepaɨ. Ximɨxi kwerietɨ mɨpaɨ pɨka'aneni ketineuyehɨwirieka».

Muitsexi Miriyami hetsiemieme kemɨtiyutanenewi

¹³ Muitsexi Yawé mɨpaɨ katiniutawawirieni: «Kakaɨyari, waɨkawa nepɨmatsiwawirie pemenayehɨanikɨ».

¹⁴ Yawé Muitsexi kaniuta'eiya: «Xɨka paapaya hɨxienatsie 'ita'aɨtsikawiyake ¿katiyɨwe 'atahuta tukari muyuhiwerieka? Keheyani 'atahuta tukari kiepa pɨka'ukani, mɨkɨ tukari 'aye'ayuke kanipitɨariemɨkɨ».

¹⁵ Mɨpaɨ Miriyami 'atahuta tukari yeuta kaniukateitɨni. 'Ixaheritsixi mepɨkahekɨ kepaukake mɨkɨ wahetsɨa munua.

¹⁶ 'Anake 'ixaheritsixi mekanayekɨne Katseruti, Parani makumawetsie mekaniu'axɨani.