Hiwerika 4 - Kakaɨyari Niukieya

¹ Huru 'ari pɨka'utixawatɨre. Huru 'aixɨamɨ'ane putayɨrixɨ puyutakwitama. Tetexi mɨpatsietɨka kwinimieme mɨraye'atɨka tukita timieme kaye'utɨma katineutiteni.

² Tsiyuni kiekatari, meripaitɨ mepɨtehaye'akai huru kemɨraye'axe, hikɨri haxu xariteyari hepaɨ mepɨtexeiyarie, 'iwewame nenikamɨti'ane mitiwewi.

³ Yeutari memayu'eririya yutsitsi mepɨyexata yuniwema mepɨwatsitsitɨa, peru 'ukari Kerutsaremetari mepɨka'u'iyari. Yuniwema mepɨwata'e'eiriwa 'aruxi 'amemɨnene makumawetsie memu'uwa wahepaɨ.

⁴ Tɨɨri yemekɨ waɨkawamekɨ mepeuhariku, waneni 'ari puwawaki. Paa tɨɨri mekaniku'iwawani, peru neuxei nixewitɨ pɨkawamimɨkɨ.

⁵ Kemɨ'ane meripaitɨ memɨte'utikwa'akai witsiti'anekame hikɨ mekanikwiximeni haakakɨ kaye'utɨma. Meripaitɨ witsimemɨte'ukemarikai mɨyɨtsikimaɨyekɨ hikɨ xatsitsata mekanikurupetɨweni.

⁶ Ke'axamemɨte'uyuri Tsurumatari matsi kwinimieme 'axamepɨte'uyuri Kerutsareme kiekatari, yapauka kaniuka'unarieni, nixewitɨ pɨka'iparewi.

⁷ Kwinimieme matsi mepɨtetuxakai mana te'aitamete 'ɨwi hepaɨ, meta retsi hepaɨ, wawaiyari yemekɨ pɨtataɨrawikai, Tete mɨraye'axe mutimerɨka hepaɨ mepɨteyuxexeiyakai.

⁸ Peru hikɨ kwinimieme mepɨteheutɨtɨni keyuri yɨxari, nixewitɨ pɨkawamate kaye'utɨa. Yuwaiyaritsie kwinimieme mekateniwawakini kɨye hepaɨ, wa'umeyaritetsie kaniuwerixɨani.

⁹ 'Aixɨa mekani'itɨarieka kemɨ'ane memukwi'iwaxɨ 'ixiparakɨ, keyuri haakakɨ memukwi. Haaka wara'iwakaku mekanitakukuweni, karikɨ mɨtiumawekɨ 'ikwaxite 'ɨtsita timieme.

¹⁰ 'Ukarawetsixi 'aixɨa memɨte'u'iyarikai, yumamá mekaniuhɨniri yuniwematɨme mekaniwaruka'etsa. Yuniwema wahekɨ mekatenikwakaitɨni, kepauka Kerutsareme muka'unarietsie.

¹¹ Yawé yuhaxɨa kaniutatuani, yuhaxɨa mɨtiyukukuine kananayetuani. Tsiyuni taikɨ kaniutataiya meta kanitaxɨtsitɨani tsutɨmeyari naime.

¹² Mɨpaɨ mepɨkateha'eriwakai naitsarie te'aitamete, meta yunaitɨ teɨteri naitsarie kiekatari, kename Kerutsareme memaye'unie kiteniena meheutahaxɨanikekai.

¹³ Peru mɨpaɨ katiniɨyɨni. Kakaɨyari niukametemama 'axamete'uyurieku. Mawari wewiwamete 'axamete'uyurieku. Teɨteri 'axamekateyuriekame memɨwarukwikɨ kiekaritsie kaye'utɨma.

¹⁴ Yumamatetsie meheuxuxuretɨ, kaye 'utɨma mekaniu'uwani memɨkaheuneniere wahepaɨ meyɨatɨ. Xewitɨtɨma pɨkayuwaɨriya muwamayɨanikɨ tsikeretɨma wa'ixurikitsie.

¹⁵ Teɨteri mɨpaɨ mekateniwaruhiwiwani: «'Ena xepɨka'u'uwani, xemɨka'itiya. Xekeneuhuni. Xekeneuhuni. Xepɨkatatsikumaɨwani tame». Hipame nuiwarite watsata mɨpaɨ mekatenikɨhɨawarɨwani: «Ku'uwamete mekanihɨkɨtɨni, memuyu'unaxɨaxime. Mepɨkayɨwawe 'ena memu'uwani yuheyemekɨ».

¹⁶ Yawé tɨtɨ katiniuyurieni muwareutaxɨriexɨa, hikɨri pɨkayu'iyaritɨa wahetsiemieme. Mawari wewiwamete mamariwawemete mepɨkaxatsiwa meta 'ukirawetsixi mepɨkanenimayatsieri.

¹⁷ 'Imatɨrieka, tahɨxite pɨtitɨximeri teta'ikwewatɨ yakɨxeikɨa xewitɨ tatsiparewienike te'erietɨ. Tuxiyutsie paitɨ tetanenieretɨ tekanita'ikwewani hipatɨ teɨteri memɨtatsitawikweitsitɨanikɨ.

¹⁸ 'Etsiwa temuku'uwatsie tepuhupierie, kaye 'utɨma temɨye'uwani pɨkayɨweri. Ta'imatɨrieka tukariyari kanehuraniri, 'ariri kanaye'ani, tatukari naitɨ pɨ'inɨatsie.

¹⁹ Memɨtatsi'aye'unie matsi kwinimieme mepayɨwawekai keyuri kwixɨtsi muyuawitsie miemete, hɨritsie mepɨtatsi'uweiyatɨkɨkakai, makumawetsieta mekataniuhupieni.

²⁰ Meta kaniuwiyarieni ti'aitame Yawé menayexei, mɨkɨ hetsie tetewiyatɨ temu'uwakai. Mɨkɨ pɨhɨkɨtɨkai hetsiena mieme mɨpaɨ temutiyuanekai: Mɨkɨ 'etɨriyayatɨa te'u'uwatɨ nuiwarite watsata tepu'uwani.

²¹ Kene'atemawieka meta keneutanaweni, 'Erumi kiekariyari, 'Utsi kwieyaritsie, 'uka ti'aitame hepaɨ pemɨtika. Peru 'arike 'ikɨ tekɨxita 'ekɨta pepanu'ieni, hikɨ 'ana pepɨtitaweni meta pemawetɨ pepayani.

²² Tsiyuni witsipemɨti'ɨimarikai, kanaye'atɨarieni kepemɨtikwinitɨarienikekai, Kakaɨyari tawariri xeime kwieyaritsie pɨkamatsi'anɨnɨ'ani. Peru 'ekɨ, mɨmariwe 'Erumi kiekariyari, kamani'uximatɨamɨkɨ ke'axapemɨtiuyurikɨ meta naime ke'axapemɨtiuyuri katinitahekɨatamɨkɨ.