'Etsekieri 27 - Kakaɨyari Niukieya

Hiwerika Tiru matihɨiyakɨ

¹ Yawé mɨpaɨ kanetiniutahɨawe:

² «Tewi pemunu'aya, 'ikɨ hiwerika kwikariyari Tiru hetsiemieme keneutakwika,

³ kiekari haramara tetsita memukuma mɨti'uximaya yumɨireme kiekarite wahamatɨa meta tewanarixi haramara tetsita mukumane. »Yawé naimekɨmɨyɨwe mɨpaɨ kanaineni: »“'Ekɨ, Tiru kiekariyari, witsipeti'axexeiyame pepɨ'a'erie meta 'aixɨa pe'anekame.

⁴ Haramaratsie mariwemekɨ pepɨti'aita, tewewiwamete 'aixɨa ti'anenekame mepɨte'utiwewi.

⁵ Huku mexayari Tsenixi hɨriyaritsie miemekɨ mepɨte'utiwewi. Meta kariuxa Riwanu miemekɨ kɨye 'apame hixɨapa nawiya heima mieme meputawewi.

⁶ Xiu Watsani miemekɨ tiwekemete meputiwewi, meta tsipɨrexi kɨyeyarikɨ Tsipɨre miemekɨ 'aheima muyema meputawewi, meta witsipuka'itɨarie witsimɨrekemakakɨ 'eripanite 'awateyakɨ.

⁷ Rinu 'ixurikiyari 'Ekipitu mieme mɨtixutɨkakɨ 'eka kwekwewiwame meputiwewi, mɨkɨkɨ 'apatera pepayeitɨa. Haramara tetsita 'Eritsaha kwieyaritsie mieme, 'ixuriki mɨyɨtsikimaɨye meta mɨxeta pɨ'atɨarie 'akiitsie meuwɨre.

⁸ Tiru 'aku, tewekemete Tsiruni mepanexɨa meta 'Axiwari. Wapaitɨ mepatitekai yemekɨ memɨmatsi'unɨ'axime, teɨteri memɨte'akumate haramaratsie timiemekɨ.

⁹ Kɨyekɨ 'aixɨa memɨteheutawewiwawe Kewari kiekatari 'aixɨa mepiyuri hakewa meumurikai kanuwa 'amɨpa. Haramaratsie kanuwa 'amɨpapatsie hauwemete yumɨiretɨ tita pemɨtituakai mepɨtetuakai.

¹⁰ Teɨteri Peritsiya kiekatari, Ririyatari meta Puti kiekatari 'akuyaxi wahamatɨa mepaye'ukai. 'Aixɨa mepɨmatsi'ukuyuri yuhetsie nunuwamekɨ meta kuya xupureruyakɨ, mɨkɨ mepihekɨatakai kepemɨtimariwekai.

¹¹ »”'Axiwari kiekatari, meta 'akuyaxima wahamatɨa, mepi'ɨwiyakai 'akuraru 'awarita maka, meta Kamari kiekatari 'atuxiyute mepɨtahɨkai. 'Akuraru 'utɨma yuhetsie nunuwame mepukuwɨwɨtɨwakai, witsi'anekame mematsihayeitɨatɨ.

¹² Pɨtimɨirekai kepemɨrexeiyakai Taritsi 'ahamatɨa ti'uximayakaku. Pemɨtituiriekaikɨ mɨkɨ pɨmatsixatɨakai pɨrata, tepɨa, 'etsitaniyu meta tepɨa mahete.

¹³ Metatsiere Kɨretsiya, Tuwari meta Metseki 'ahamatɨa mepɨte'uximayakai, pemɨtiwatuiriekaikɨ mepɨmatsixatɨakai te'uximayatamete meta purunitsekɨ mɨtiwewiyatɨka.

¹⁴ Teɨteri Weti-Tukaxima mepɨmatepitɨakai kawayutsixi te'uximayatametekɨ, kawayutsixi yeixamete meta muratsixi.

¹⁵ Xuraxi kiekatarita yaxeikɨa 'ahamatɨa mepɨte'uximayakai. Yuwaɨkawa pepɨtiwatuiriekai kwie haramaratsie mɨyemane wahamatɨa, mɨkɨ mepɨmetepitɨakai kɨye mayeyɨyɨwikɨ meta 'eripanite tameteyakɨ.

¹⁶ Waɨkawa piinite pemɨrexeiyakaikɨ, Tsiriya pɨmatinanairiekaita, pɨmatipatsiriekai tupatsiyukɨ, 'ixurikite muyuyuawikɨ, 'ixurikite tixutɨkaimekɨ rinu 'aixɨa mɨ'ane meta tetexi witsimɨ'anenekɨ.

¹⁷ Kura meta 'Ixaheri mepɨmatetuiriekai tɨriku Miniti miemekɨ, paa witsimɨ'anene, hatseiti meta waritsamu.

¹⁸ Waɨkawa piinitɨarika pemɨrexeiyakai, waɨkawa pemɨxikutɨkai, Ramatsiku tsiere pɨmatinanairiekai. Winu Keriwuni mieme meta Tsakaxi mieme muxa huxarieyakɨ mepɨmatekupitɨwakai.

¹⁹ Mematepatsirietɨ 'apiinitekɨ Rani nuiwarimama meta kɨriyekutsixi mepɨte'atɨwakai, 'Utsari mieme tepɨa 'aixɨa mɨ'ane, kanera meta 'uwá witsimu'ɨatɨka.

²⁰ Rerani kiekatari mepɨmatsituiriekai xira yeixame.

²¹ 'Ahetsɨa memɨtenanetɨwe mepɨhɨkɨtɨkai 'Arawiya meta yunaitɨ te'aitamete Tseraxi miemete, mɨkɨ mepɨmatepitɨakai muxatsi yakɨ memɨpapakɨ, muxatsi 'ukitsikɨ meta tsipuri wahekɨ.

²² Meta 'ahetsɨa mepɨtenanetɨwekai yunaitɨ tetuayamete, Tsawa miemete meta Xakama. Mɨkɨ mepɨmatepitɨakai hurukɨ, tetexi witsimɨ'anenekɨ meta witsimu'ɨatɨka 'aixɨa mɨ'anenekɨ.

²³ Meta Karani, Kane, Hereni meta tetuayamete Tsawa kiekatari, 'Atsiriya meta Kirimari 'ahetsɨa mepɨtenanetɨwekai.

²⁴ Waɨkawa pemɨrexeiyanikɨ mepɨmatsituiriekai 'ixuriki witsi'anenekame, matate mɨyɨtsikimawi, tixuiyatɨkaime, tiwiparietɨkaime yɨkɨ'anenemekɨ meta kaunarite 'aixɨa reukukakaunime.

²⁵ Kanuwate 'amɨpapa Taritsi miemete 'apiinite mepɨte'anutuayakai. »”Piinitɨarika mɨraye'atɨka tihɨpɨneme peratɨtɨ, haramara 'amatiyewatsie pepɨyanekai.

²⁶ 'Awekemete haramara 'ameutatewatsie mepɨmatsihetɨ, haramara 'amatiyewatsie 'eka tau manatineika mieme pɨmatsi'utamuraxɨ.

²⁷ Kepauka pemɨkayune pɨtikayunixɨani haramara 'ameukatewatsie, mɨmatixikutɨriyakai pemɨtituakai meta pemɨtiwewiekai, 'ahetsie mematitei meta memɨmatsi'unɨ'axime, kemɨ'ane 'akanuwa 'amɨpa 'aixɨa memɨtiyuruwa meta kemɨ'ane memɨmatetuiriekai, 'akuyaxima metatsiere yunaitɨ matsiparewiwamete.

²⁸ Memɨmatsi'unɨ'axime me'utihiwakaku haramara tetsita memɨtama mepɨtimamani.

²⁹ Yunaitɨ kanuwa 'amɨpapa wekemete mepɨwaku'eirieni, haramaratsie kɨkamete meta tenɨ'awamete kwiepa mepɨ'axɨani.

³⁰ 'Ahetsiemieme mepɨtihiwa mepɨtitsuani yemekɨ meyuhiwerietɨ, naxi yumu'utsie mepeuyutiwiwiriexɨani, meta hetsiena mepɨtikurupe.

³¹ 'Ekɨ ya'ane pewiwiekaku yumu'utsie mepuyukaxini, hiwerika kamixayari mepanakatɨxɨani. 'Ahetsiemieme mepɨtitsuani meyuhiwerietɨ, 'aixɨa 'iyari meka'u'uwatɨ.

³² Hiwerika kwikariyari mepitikwika, yemekɨ kwinimieme mɨtinutuixiwetsie mɨpaɨ mepɨtiyuani: ‘Nixewitɨ haramara hixɨapa pumawekai Tiru hepaɨ 'anetɨ’.

³³ Kepauka mɨti'atɨariwakai 'apiinite nuiwarite yumɨiretɨ mepɨtekunanakekai. Waɨkawa pemɨrexeiyakaikɨ meta piinitɨarikakɨ, pepɨwaxikutɨriyakai te'aitamete kwiepa memɨtama.

³⁴ Peru hikɨ haramara pɨmatsi'utamuraxɨ, haramara 'ameukatewatsie pepɨyeka. 'Apiinite meta kemɨ'ane pemɨtiwa'aitɨakai 'ahamatɨa mepukayunixɨa.

³⁵ 'Ahetsiemieme mepɨmama yunaitɨ haramara tetsita kiekatari, te'aitamete marikakɨ mepuyɨyɨakatɨka, wahɨxie pɨmatsiɨkɨ kememɨtemama.

³⁶ Waɨkawa mekanimamaka hipatɨ kwieyaritsie tenawemete, 'a'imatɨrieka tukari kanaye'ani, tawariri pepɨkanuani”».