'Etsekieri 15 - Kakaɨyari Niukieya

Kerutsareme, kaxie nanari tixaɨtɨkɨ mɨkatiyunaki'erie

¹ Yawé yuniukikɨ mɨpaɨ kanetiniutaxatɨani:

² «Tewi pemunu'aya, ¿tita matsi waɨkawa tiyunaki'erie kaxie nanayari, nutsu kɨyexi yeuta mieme mexayari?

³ Kaxie kɨyeyarikɨ 'ɨpari mutawewieni pɨkayɨwe, yatɨni hetsiena tsikere tixaɨtɨ mɨtiuyewieni pɨkayɨwe.

⁴ Kɨmana matinaini xeikɨa pɨyɨwe. Peru neuxei, ¿tawarita ketitakɨ tiyunaki'erie kepauka kɨtsiena manutaixɨani meta kepauka tsutɨana paitɨ matani?

⁵ Kepauka mɨnaimikaitsie nitixaɨtɨkɨ pɨkatiyunaki'eriekai, matsi hikɨri mutatai.

⁶ »'Ayumieme, Yawé naimekɨmɨyɨwe mɨpaɨ kanaineni: Kaxie nanayari kɨye mɨwakini hepaɨ kenemɨtitataiyaxɨ, mɨpaɨ nepɨwayurieni Kerutsareme kiekatari.

⁷ Ne nekaniwatakwimɨkɨ newaraye'unietɨ, xeimiemeri taikɨ mekaniutawikweni, peru tawarita xeimekɨ mepɨtitani. Kepauka nemɨwara'iwa, 'ana xeme mɨpaɨ xepɨtehetimani kename ne, Yawé nehɨkɨ.

⁸ 'Ikɨ kwieyari kakiepatɨme nepayeitɨani, mɨkaheu'enakɨ. Yawé naimekɨmɨyɨwe mɨpaɨ kanaineni».