'Awiriyaxi 1 - Kakaɨyari Niukieya

¹ 'Awiriyaxi kemɨtiunieritɨarie. Niuki tepu'eni Yawé hetsɨa mieme, xeime niuki tuayame kaneyenɨ'ani para mɨtiwataxatɨanikɨ naitsarie nuiwarite, mɨpaɨ tiwakɨhɨawetɨ: «Hikɨmɨ, tepayekɨne tekaniwaretakwikuni». Mɨpaɨ kanaineni Yawé naimekɨmɨyɨwe 'Erumi kiekariyaritsie mieme:

'Erumi kemɨtiuka'unarie 'uyuta'ɨreka

² «Tixaɨtɨ pekatihɨkɨtɨme nekamanayeitɨamɨkɨ nuiwarite watsata, waɨkawamekɨ pekani'uxiwe'eriwakamɨkɨ,

³ kepemɨtiyuta'ɨre pekaniu'akwamana. 'Aita pemɨkiekɨ kwinimieme mutɨtɨtsie, 'akiita 'ateewa paitɨ pe'akanieretɨ, mɨpaɨ pekatini'akuhɨaweni: ¿Kemɨ'ane 'ena kwiepa pɨnetsi'a'iwa?

⁴ Peru tsepanetɨ wapaitɨ pemuwietɨyeika kwixɨ hepaɨ, tsepa xurawetsixi watsata paitɨ 'a'itua pemexeiya, mana paitɨ nekamanakahɨamɨkɨ —Yawé mɨpaɨ kanaineni—.

⁵ Xɨka tenawayamete me'u'axɨani tɨkarikɨ mɨkɨ naime mepɨkatenawani, naime mepɨkate'anutɨni ketita xeikɨa memɨteheuyehɨwa 'aixɨa mɨti'anene, peru 'ekɨri, kehepaɨ petika'unarieni. Xɨka 'itsanamete mematsi'utaxeiya, mɨkɨ tinaime mepɨkate'anupini.

⁶ Peru 'Etsahu kepemɨtiukaxeiyarie, tinaime pepɨtiunawatsiyarieri mɨraye'atɨka mɨti'awietsiekai paitɨ.

⁷ Memɨmatsiparewie mekamanitaweiyakuni kwie manu'atɨka paitɨ, mepɨmate'itaiya mepɨmatsiha'iwa mekamateni'irɨwiyakuni. 'Ahamatɨa mexatsie memutiyaxikekai mɨkɨ mekamanihupiekuni. 'Erumi 'ari tixaɨtɨ pɨkarexeiya pɨkatimaiwe.

⁸ 'Iya tukaritsie nepɨwaka'una temaiwawemete 'Erumi kwieyaritsie kiekatari, 'Etsahu hɨriyaritsie miemete memɨtemaiwawe —Yawé mɨpaɨ kanaineni—.

⁹ Temani kiekatari, yukukuyamete 'ahetsɨa miemete marikakɨ mekanatixɨrikuni, nixewitɨ tewi pɨkayuhayewa 'Etsahu yemurieyatsie yunaitɨ mekanikwi'iwakuni.

¹⁰ »'A'iwa Kakuwu kepemɨtiunanaimakɨ, pekanitewiyatsitɨariemɨkɨ, meta 'aheyemekɨ pekanikumaweriyariemɨkɨ.

¹¹ Kepauka pemɨyukuxaɨtametaxɨ, kepauka 'ateewa kiekatari kuyaximama memɨwarehapa 'ateewa memanutaxɨriyanikɨ, kepauka 'ateewa kiekatari Kerutsareme kitenie memeutahaxɨa, meta kepauka hetsiena mieme memuyuta'iwaxɨ, 'ekɨ 'ana mɨkɨ pekaniwanɨkaitɨni.

¹² Pɨkaheuyewekai 'a'iwa hetsiemieme pemutanaweni pe'inanaimatɨ mɨtiuka'eniwakaitsie, kepauka waɨkawa mu'uximatɨariekai. Pɨkaheuyewekai 'ekɨ pemɨ'atemawieka kepauka Kura teɨterimama memakumaweriyarietsie. Hawaikɨ pɨkaheuyewekai 'axapemutaineni kepauka 'iya tukaritsie mete'uka'eniwakaku.

¹³ Pɨkaheuyewekai pemeutahanikɨ nekiekari kitenie kepauka 'iya tukaritsie memɨte'uka'eniwakai. Hawaikɨ pɨkaheuyewekai pe'utanawetɨ pemɨwaxeiyanikɨ me'uxiwe'eriwakaku meta 'iya tukaritsie mete'uka'eniwakaku. Tixaɨtɨ pepɨkatinawanikekai wapiini mɨkɨ tukaritsie me'uximatɨariekaku.

¹⁴ Pɨkaheuyewekai 'ekɨ huyeta tsimanuyeyeutsie pemɨwahupieni, para memɨyuta'unakai pemɨwakwinikɨ. Pɨkaheuyewekai pemɨwayetuani waneneɨkixiwima wahetsɨa 'iya tukaritsie mete'uka'eniwakaku.

¹⁵ »'Ari kanehuraniri Yawé tukarieya meye'atɨanikɨ yunaime nuiwarite wahetsiemieme. 'Erumi, kepemɨtiuyuri, yakatiniyɨmɨkɨ 'ahetsie katininakeni 'uximatɨarika.

¹⁶ Yaxeikɨata 'ixaheritsixi kexemɨte'ukwinixɨ, hɨri mɨpatsietsie netekɨxita kexemɨtehanu'i, mɨpaɨta yaxeikɨa mekatenenu'ikuni yunaitɨ nuiwarite mukumane mekatehayewatɨ. Hikɨ yunaitɨ mehenu'ieme mekanikumawerikuni, hikɨ mɨpaɨ pɨtimatsiɨkɨre kename hatsuaku meka'u'uwakai.

¹⁷ Matsi Tsiyuni hɨriyaritsie wikweitsitɨarika kanitixuawerimɨkɨ, meta kanipatsiekamɨkɨ. Kakuwu teɨterimama yupiinitɨarika mepɨtekaxeiya.

¹⁸ Kakuwu xiɨyarimama tai kemɨtititaiya mɨpaɨ mekani'anenekuni, Kutse hetsɨa miemete, nerɨkwari hepaɨ mepɨ'aneneni, peru 'Etsahu xiɨyarimama xatsi hepaɨ mekani'aneneni: taikɨ kanitataiyariemɨkɨ, mɨpaɨ tiyɨyɨ nixewitɨ 'ayenieretɨ pɨkayuhayewa yunaitɨ 'Etsahu hetsɨa miemete». Yawé yurikɨ mɨpaɨ kaniutayɨni.

Kememɨte'uparewiya Kakaɨyari teɨterimama

¹⁹ Nekexi kiekatari 'Etsahu hɨrieyatsie mekanitiyaxikuni, Tsapexi kiekatarita piritsiteutsixi wakwietsie mekanikuyaxikuni. Meta 'ixaheritsixi 'Epɨrahini meta Tsamariya wakwie kanayeimɨkɨ, Wenikamini xiɨyarimama Karaha kwieyari mekananunakikuni mana memɨtitenikɨ.

²⁰ Memehapanieta, 'ixaheritsixi kuyaxiyari hikɨ kananeutsixi wahamatɨa memu'uwa, Tsareta wakwie kaniye'atɨkaimɨkɨ. Meta Kerutsaremetari, Tseparari memɨtitei, mekaniyuhayewakuni Nekexi kiekariyaritetsie,

²¹ memɨtehayu'iwaxɨta mekananutikɨnikuni Tsiyuni hɨriyaritsie paitɨ, 'Etsahu hɨriyaritsie memɨtama memɨtewata'aitɨanikɨ. Meta mana Yawé pɨti'aitametɨni.