'Awakuki 2 - Kakaɨyari Niukieya

¹ Netanieretɨ nekaniyuhayewamɨkɨ, wapaitɨ nenieremetsie ne'akakaitɨ, nepɨta'ikwewani kemɨnetitahɨawe, kemɨnetita'eiya mɨyanemɨtitahɨawixɨkɨ.

Yawé kemɨtiuta'a

² Hikɨ Yawé mɨpaɨ kanetiniuta'eiya: «Kepemɨtiunierixɨ ketinaka'utɨa, yuhekɨakamekɨ haxu 'etsitsutsuimetsie para xeiya mekaterɨwa mɨyɨwenikɨ.

³ Karikɨ kepemɨtiunierixɨ yakatiniyɨmɨkɨ yemekɨ kepauka tukaritsie yamɨtiyɨnikekai, tukari kaniyemieni maye'anikɨ, mɨkɨ tukari pɨkahayewarieni mɨka'aye'anikɨ. Tsepanetɨ 'amɨreɨtewini yakatiyɨwetɨ, keneta'ikwewani, mɨkɨ tukari kanaye'amɨkɨ kahauyewekamekɨ.

⁴ »Memuyuti'ɨre 'iyari heitseriekame mepɨkahexeiya, peru kemɨtiheitserie 'amuyeika yuri mɨti'eriekɨ payeyurini.

⁵ Matsi, xikutɨriya pɨtiyu'itaiya, 'ayumieme memuyuti'ɨre 'amepɨkateheutere. Yukɨipitsie 'emepanatiyeyeure, mɨki teukiya hepaɨ, meta mepɨkahuxaiwawe mɨki yɨwikame hepaɨ. Yu'aurie yunaime nuiwarite mekaniwarukuxexeɨriwani meta yunaime teɨteri mekaniwarehapanani.

⁶ Peru mɨkɨ hatsuakutɨni tixaɨtɨ mepɨkatehayeitɨarieni. Nuiwarite mepɨwatinanaimani hikɨ 'ikɨ kwikari wahetsiemieme mepɨtakwika: »Xɨa'ui waɨkawa rexeiyatɨ mayuyeitɨa hipame tiwapiinitekɨ, meta piinitɨarika waɨkawa mɨtiukuxeɨri 'itarikakɨ. ¿Kepaukakeri pɨtihayewa mɨyatiyurienetɨ?

⁷ Yapauka mekananuku'uikuni memɨmetehapinirie. Memetsi'aye'unietɨ mekanakɨnikuni tinaime mekameteninawairiekuni tita pemɨrexeiya, mexi 'ekɨ pe'uyɨyɨakani pekatɨrɨkaɨyetɨ.

⁸ Nuiwarite mekaniyumɨireni pemɨtiwarunawatsiri, keyupaɨmetɨ teɨteri memɨyutawikweitsitɨani mɨkɨta mepɨmetenawatsirieni, mɨmɨirekɨ xuriya pemutayeuri, meta 'ikɨ kwie hetsie waɨkawamekɨ pemɨtiunanaimakɨ, meta 'ikɨ kiekari hetsie meta mana kiekatari pemɨwarunanaimakɨ.

⁹ »Xɨa'ui kemɨ'ane yukiita mɨtihɨniya kwamanarikakɨ rana'iwaka yuniwema watawikweitsitɨanike wahetsie mɨkatinakenikɨ 'axamɨti'ane.

¹⁰ »Kepemɨtiu'eri 'akie kiekatari pepɨwarutewiyatsitɨa xeikɨa: yumɨireme nuiwarite pepɨwareuyehɨa, peru 'ekɨtɨtɨ pepɨ'ayuri.

¹¹ 'Ayumieme tetexitɨtɨ kuraru 'amatayewa hetsiemiemete mepahiwatɨka, meta kii pikaxiyaritetsie puwa'eiya wahiwari.

¹² »Xɨa'ui kemɨ'ane kiekari mutawewiwa hipame wakwitɨ meta kemɨ'ane kiekari mukama hipame wananaimatɨ.

¹³ Yawé Naimekɨmɨtɨrɨkaɨye mɨpaɨ kanaineni, teɨteri tai hetsiemieme mekete'uximayaka meta nuiwarite yakɨ xeikɨa meketeyu'uxitɨaka.

¹⁴ Haa haramara kemɨranukanama hepaɨ, mɨpaɨta kwie hetsie mekateniyɨkuni teɨteri Yawé tɨrɨkariyaya memaitɨ.

¹⁵ »Xɨa'ui 'ekɨ, 'a'iwa pemutitawaitɨwa. Xɨa'ui 'ekɨ, winukɨ pemititawaitɨwa waiyarieya maweme pexeiyamɨtɨ.

¹⁶ Mɨkɨkɨ pepɨtewiyatsitɨarieni pɨta, hawaikɨ witsipepɨkatixeiyarieni. Kamɨtsɨ 'ekɨta kenanu'i, pemɨwaxeitsitɨanikɨ xitekiya 'inɨariyari kepemɨkarexeiya. Yawé yutekɨxi yutseriekɨ mehana 'ahetsie ke'itiyeurieni, meta witsikepemɨtixeiyariekai hetsiemieme, tewiyarika kematsi'upitɨani.

¹⁷ Riwanu hepaɨtsita kepemɨtiunanaima mɨkɨta kematsi'utapɨna. Tewaxi kepemɨtiwareuyehɨa mɨpaɨta peketiuka'unarieni. Karikɨ kanimɨireni xuriya pemitayeuri, meta pɨwaɨkawa 'ikɨ kwie hepaɨtsita kepemɨtiunanaima, meta 'ikɨ kiekari hetsie meta teɨterimama.

¹⁸ »¿Tita tiyunaki'erie kakaɨyari mɨwewiya, kemɨ'ane mitawewi tewi kɨyekɨ tiwewiwame xɨka hɨkɨtɨni? ¿Tita tiyunaki'erie kakaɨyari mukwaxiyarie, 'itarika xeikɨa mɨti'ɨkita? Tiwewiwame kakaɨyarixi mɨwawewie mekaniuwaweme mɨkɨ xeikɨa yuri katini'erieka yuwewiyatsie.

¹⁹ Xɨa'ui kemɨ'ane kɨye mɨpaɨ mɨtikɨhɨawe: “Kenanutanieri”, meta tete mɨkaniuwe: “Kenanukukexi”. Tsepanetɨ huru meta pɨrata memɨkawiriyarietɨka, tixaɨtɨ memɨxete'uta'ɨkitɨani mepɨkayɨwawe, memɨkahayeyuyurikɨ.

²⁰ Peru, Yawé yutuki muyepatsieta kanayekani, naitsarie kwiepa mɨtiuyehane hɨxiena kayuwatɨ meke'umaka».