'Amuxi 7 - Kakaɨyari Niukieya

Haikakɨa 'Amuxi kemɨtiunieritɨarie

¹ Yawé naimekɨmɨyɨwe mɨpaɨ kanetiniunieritɨani: Tupiriya kanitineikakaitɨni 'ari ti'aitame hetsiemieme tiuka'itsanatɨku, hikɨ Ti'aitame nekaniuxeiya 'utsikari wakuha'aritɨwame.

² Kepaukari 'utsikari tupiriya kwiepa memukaxɨkai mɨpaɨ nekatiniuhiwa: ―Yawé nekakaɨyari, waɨkawa nepɨmatsiwawirie ketiniwareuyehɨwiri Kakuwu nuiwarimama. Pɨkayɨwe xɨari memukuwikweni, 'etsimekaniyupaɨmeni.

³ Hikɨ Yawé kaniwarutinenimayata, mɨpaɨ kaniutayɨni: ―Matsi mɨpaɨ pɨkatiyɨni.

⁴ Meta Yawé naimekɨmɨyɨwe mɨpaɨ kanetiniunieritɨani: Mana Yawé kaniuwekaitɨni, mɨpaɨ haitɨ kename 'aixɨa tiyurienikekai taikɨ, mɨkɨ haramara meukatewatsie naime pɨtaxɨxɨtsitɨwakai metatsiere kwiepa mu'ɨtsiyatsie.

⁵ Hikɨ mɨpaɨ nekatiniuhiwa: ―Yawé nekakaɨyari, waɨkawa nepɨmatsiwawirie, mɨpaɨ pepɨkatiyurieneni. Xɨari mepɨkakuwikweni Kakuwu nuiwarimama, 'etsimepuyupaɨme.

⁶ Hikɨ Yawé kaniwarutinenimayata, mɨpaɨ kaniutayɨni: ―'Ikɨ mɨpaɨta pɨkatiyɨni.

⁷ Yawé tawarita kanetiniuxeitsitɨani: Mɨkɨ 'akaniuwekaitɨni kuraru 'amatayewa 'aurie, mɨkɨ kii 'inɨnɨatame mahete pahanakai.

⁸ Yawé mɨpaɨ kanetiniuta'iwawiya: ―¿'Amuxi, tita petixeiya? Mɨpaɨ nekatinita'eiya: ―Kii 'inɨnɨatame mahete pepahana. Hikɨ Ti'aitame mɨpaɨ kaniutayɨni: ―Keneuxeiya, 'ikɨ kii 'inɨnɨatame mahete neteɨterima 'ixaheritsixi wahixɨapa nekaneikahɨamɨkɨ, 'ari tawariri nepɨkatiwareuyehɨwirieni.

⁹ »'Itsahaki kakaɨyarixi mɨtiwaratimawiriwakaitsie naitɨ kaniti'unimɨkɨ, meta kaniti'unimɨkɨ 'ixaheritsixi watukite, nekaninuamɨkɨ 'ixipara nehakwetɨ Keruwuhani paratsiyuyata».

'Amatsiyaxi 'Amuxi maye'unie

¹⁰ Hikɨ 'Amatsiyaxi, mawari wewiwame Weteri kiekame, Keruwuhani niuki kanenɨ'airieni 'Ixaheritsie ti'aitame: «'Amuxi 'axakametinikuxatani 'ixaheritsixi yunaime wahɨxie. 'Ari 'ena kiekatari mepɨwaɨripie me'i'enietɨ,

¹¹ mɨpaɨ kaniutaineni: »“Keruwuhani 'ixiparakɨ kanimɨmɨkɨ, 'Ixaheri kwieyaritsie memɨtama mekananuhapaniekuni 'ateewa paitɨ kayukwietsie”».

¹² Hikɨ 'Amatsiyaxi mɨpaɨ 'Amuxi katiniutahɨawe: ―Keneumieni 'ekɨ pemɨniere, mɨpaɨ petikuxatatɨ xɨka pereu'iwamɨkɨni, kenemie Kura kwieyaritsie.

¹³ Tawariri Weteri pepɨkarehekɨatani, 'ena ti'aitame tukieya manuwe kanihɨkɨtɨni, meta 'ikɨ kwieyaritsie tuki manuwe.

¹⁴ 'Amuxi mɨpaɨ 'Amatsiyaxi katiniuta'eiya: ―Ne Kakaɨyari niukameya nepɨkahɨkɨ meta Kakaɨyari niukameya nu'aya nepɨkahɨkɨ, matsi ne muxatsi nepɨwahɨweme meta piní nekaniuka'etsani.

¹⁵ Peru Yawé muxatsi watsata kanenayewitɨni, mɨpaɨ kanetiniutahɨawe: “Kenemie neniukame pepayani ketiniwarutaxatɨa 'ixaheritsixi neteɨterima”.

¹⁶ 'Ayumieme Yawé niukieya keneu'eni. 'Ekɨ mɨpaɨ peputaine: »“'Ixaheritsixi pepɨkatiwakuxaxatɨwani, 'Itsahaki nuiwarimama wahamatɨa petikuxatatɨ ketineuhayewa”.

¹⁷ »'Ayumieme, Yawé mɨpaɨ kanaineni: »“'A'ɨya tuminikɨ muyumayɨinɨa payani kiekaritsie, 'aniwema 'ukari meta 'ukitsi 'ixiparakɨ mepɨkwi'iwa. 'Akwie pɨti'inɨatsieni meta hipatɨ mepɨxatɨarieni, 'ekɨta pepɨmɨni kakaɨyarixi wakwieyaritsie. Metatsiere 'ixaheritsixi mepanuhapanieni 'ateewa paitɨ mepuyuhayewa kayukwieyaritsie”».