'Amuxi 3 - Kakaɨyari Niukieya

Kakaɨyari niukameya 'Amuxi kemutayɨ

¹ Xekeneu'eni 'ixaheritsixi, 'ikɨ Yawé niukieya kemaine xehepaɨtsita, yunaime nuiwari hetsiemieme 'Ekipitu nemɨwarayewitɨ:

² «Xeme xeikɨa nekanixe'anayexeiya yunaime kwiepa memɨtama watsata. 'Ayumieme, nekatinixe'akapitɨamɨkɨ naimekɨ ke'axaxemɨte'uyuri».

³ Pɨkayɨwe yuhutatɨ muhunikɨ yamekatexatawawetɨ.

⁴ Maye yeuta pɨkahayuhaxɨatɨwa xɨka tixaɨtɨ katikwaka. Maye nunutsi pɨkaha'a yuterɨta xɨka tixaɨtɨ katikwaka.

⁵ Wiki winiyaritsie pɨka'uyewiere xɨka mana katiuyewieka. Winiyari pɨkakuyuane xɨka tixaɨtɨ katiwieriweni.

⁶ Kuxineta kiekaritsie kaniutahɨtsieriwani kiekatari mɨpaɨ memɨteyu'ɨwiyanikɨ. Kiekaritsie yɨkɨ pɨkatiyɨni xɨka Yawé mɨpaɨ kahaineni.

⁷ Yurikɨ, Yawé naimekɨmɨyɨwe yɨkɨ pɨkatiyurieni yuniukamete katiwataxatɨawetɨ kemɨtiyurieni.

⁸ Maye xɨka heyutahaxɨatɨani, ¿kemɨ'ane pɨkatimani? Xɨka Yawé naimekɨmɨyɨwe haniukani, ¿kemɨ'ane niukameyatɨtɨ pɨkatitaxata?

'Ixaheri kemɨti'uximatɨarieni

⁹ 'Ikɨ xeketenekuxatani kiekari 'aixɨa mɨrekukurarutɨiyarie 'Atsiruri meta kiekari 'aixɨa mɨ'anene 'Ekipitu mieme: «Tsamariya hɨriyaritetsie xekeneuyukuxeɨri meke'uneniere kememɨtemama, nanaimarika kemɨtixuawe mana».

¹⁰ «Yukii 'aixɨa mɨ'aneneta memɨtehɨniya 'inawari meta memɨtewanawairie hipame waɨriyarika mɨkɨ mepɨka'imate tita heitserie muyeikani mɨranɨyɨne», Yawé mɨpaɨ kanaineni.

¹¹ 'Ayumieme, Yawé naimekɨmɨyɨwe mɨpaɨ kanaineni: «Xewitɨ mɨmetsi'aye'unie 'akiekari kanika'unamɨkɨ, kepemɨtitɨrɨkaɨye kamena'iwamɨkɨ meta 'apiinite kametininawairiemɨkɨ».

¹² Yawé mɨpaɨ kanaineni: «Muxatsi wahɨweme maye kemɨtikunawairiwa heiwa hutame 'ɨkate ya naka 'etsiyeume, mɨpaɨ mekatenitawikweitsitɨariekuni 'ixaheritsixi, Tsamariyatsie kiekatari yu'utá 'etsikinayaritsie xeikɨa meta Ramatsikutsie».

¹³ Yawé naimekɨmɨyɨwe mɨpaɨ kanaineni, Kakaɨyari Naimekɨmɨtɨrɨkaɨye: «'Ikɨ xeketeneu'eni xeketenekuxatani Kakuwu tɨɨriyamama wahepaɨtsita.

¹⁴ »Kepauka nemɨrekapitɨani 'Ixaheri 'axamɨtiuyurikɨ, nekanika'unamɨkɨ mɨratimawatɨre Weteri, mɨratimawatɨre 'awateya kanakainixɨamɨkɨ, kwiepa kanikaxɨrimɨkɨ.

¹⁵ Nekaneti'unamɨkɨ kii muhaɨtɨnitsie mieme meta witarita mieme. Kanati'unixɨamɨkɨ kii maripirikɨ witsimɨreukuwewiyatɨka meta waɨkawa kii witsimɨ'anene kanika'unixɨamɨkɨ», Yawé mɨpaɨ kanaineni.