Zabura 47 - Littafi Mai Tsarki

Allah ne Mai Mulkin Duka

¹ Ku yi tāfi saboda farin ciki, Ya ku jama'a duka! Ku raira waƙoƙi da karfi, ku yabi Allah!

² A ji tsoron Ubangiji Mai Iko Dukka, Shi babban Sarki ne, ya mallaki dukan duniya.

³ Ya ba mu nasara a bisa jama'o'i, Ya sa muka yi mulkin al'ummai,

⁴ Ya zaɓar mana ƙasar da muke zaune, Wadda take mallaka ce ta fāriya, ta jama'arsa Wadda yake ƙauna.

⁵ Allah ya hau kan kursiyinsa! Aka yi ta sowa ta murna, ana ta busa ƙahoni, Lokacin da Ubangiji yake hawa!

⁶ Ku raira yabbai ga Allah, Ku raira yabbai ga sarkinmu!

⁷ Allah sarki ne na duniya duka, Ku yabe shi da waƙoƙi!

⁸ Allah yana zaune kan kursiyinsa mai tsarki, Yana mulkin al'ummai,

⁹ Masu mulkin al'ummai suka tattaru Tare da jama'ar Allah na Ibrahim. Allah shi ne garkuwar jarumawa, Yana mulkin duka!