Zabura 121 - Littafi Mai Tsarki

Ubangiji Ne Yake Kiyaye Ku

¹ Na duba wajen duwatsu, Daga ina taimakona zai zo?

² Taimakona zai zo daga wurin Ubangiji, Wanda ya yi sama da ƙasa.

³ Ba zai bar ka ka fāɗi ba, Makiyayinka, ba zai yi barci ba!

⁴ Makiyayin Isra'ila, Ba ya gyangyaɗi ko barci!

⁵ Ubangiji zai lura da kai, Yana kusa da kai domin ya kiyaye ka.

⁶ Ba za ka sha rana ba, Ko farin wata da dare.

⁷ Ubangiji zai kiyaye ka daga dukan hatsari, Zai sa ka zauna lafiya.

⁸ Zai kiyaye shigarka da fitarka, Tun daga yanzu har abada.