Zabura 120 - Littafi Mai Tsarki

Addu'ar Neman Taimako

¹ Sa'ad da nake shan wahala, Na yi kira ga Ubangiji, Ya kuwa amsa mini.

² Ka cece ni, ya Ubangiji, Daga maƙaryata da masu ruɗi!

³ Ku maƙaryata, me Allah zai yi da ku? Yaya zai hukunta ku?

⁴ Da kibau masu tsini na mayaƙa, Da garwashin wuta zai hukunta ku!

⁵ Zama tare da ku mugun abu ne, kamar zama a Meshek, Ko tare da mutanen Kedar!

⁶ Na daɗe ƙwarai ina zama tare da mutane marasa son salama!

⁷ Sa'ad da nake maganar salama, Su sai su yi ta yaƙi.