TITAS 3 - Laibaibal Thiang (BSI)

¹ Uktu hna le nawlngeitu hna tangah um in, an nawl ngaiding le, ṭhatnâk phunkip tuah awkah timhcia te i um ding le,

² ahosinhmanh ah bia chia-khâ chimlo ding le, dai te i um awkah, nunnemnâk in mi vialte sinah toidarnâk vialte langhter dingin theihter ṭhân hna.

³ Zeitintiah kanmah zong hlan ah mihrut, nawlngailo, hlenmi, nomhhnaihnâk le duhnâk phunkip tuahmi, mi hnachuah le huat tlai ngai le pakhat le pakhat â huami kan rak si.

⁴ Asinain kan Khamhtu Pathian dawtnâk le velngeihnâk cu minung cung i a langh tikah,

⁵ dinnâk in tuahmi, kanmah hrimhrim nih kan tuahmi ruangah si loin, hrinṭhannâk i kholhthiannâk le Thiang thlarau tharchuahnâk in a velngeihnâk in Amah nih a kan khamh,

⁶ cucu kan Khamhtu Jesuh Krih thawngin kan cungah duhdim tein Amah nih a kan toih,

⁷ cuticun zungzal nunnâk ruahchannâk ningin rocotu kan si khawh nâkhnga a zângfahnâk i thiamcoter kan si.

⁸ Hihi zumhawk a tlâkmi bia, nangmah zongnih na fehter lengmang awkah ka duh, Pathian a zum cangmi hna nih thilṭha tuah peng dingin ṭha tein ruat hna seh. Hi thil hna hi minung caah a ṭha i san a tlai.

⁹ Asinain hruh thil i buaibainâk le pupa hna kong hlathlai le elhnialnâk le nawlbia kong i el-len kha hrial hna, cu hna cu ṭhathnemnâk le santlaihnâk an ngei lo.

¹⁰ Zumhnâk dang a ngeimi cu chimhring law, voi hnih tiang na chimhhrin hnu ah ngol tâk.

¹¹ Cubantuk mi hna cu ruahnâk ngawi le a sual pengmi an si i mah le mah thiamlo â cotermi an si

¹² Artemas maw, Taikhikhas maw na sinah ka rak thlah tikah Nikopolis khua ah ka sinah rat i zuam te, zeitintiah cuka ah khuasik chung um kâ tim.

¹³ Nawlbia thiam Zenas le Apollo hna zong zeihmanh khualtlawn nâkah chambau in an um sual nâkhnga lo a rannâk in ratter hna.

¹⁴ Cun kanmi le hna zong theipar chauh loin an um nâkhnga lo an herhnâk zawn i hman awk an ngeih khawh nâkhnga rianṭha ṭuan pengin um hna seh.

¹⁵ Ka sin i a ummi vialte nih nakut an in tlaih, zumhnâk i a ka dawtu kha an kut ka tlaihpiak hna. Nan dihlak cungah zângfahnâk um ko seh. Amen.