SALM 9 - Laibaibal Thiang (BSI)

¹ Maw BAWIPA, ka lungthin dihlak in kan thangṭhat lai; na tuahmi khuaruahhar vialte hi ka chim lai.

² Nangmah ah i lawmin kâ nuam lai; maw Cungnung Bik, na min thangṭhat in hla ka sa lai.

³ Ka ral hna an rak kir tikah, na hmaiah tlu in an lotlau dih lai.

⁴ Zeitintiah bawi ṭhutdan ah `huin dinnâk in bia na ceih i ka diknâk le sinâk kha na dirter.

⁵ Miphun hna na sîk i misuaksual na hrawh hna, anmin kha zungzal in zungzal tiang na hrawh hna.

⁶ Maw ralchanhtu hna, rawhralhnâk cu zungzal caah lîm a si cang! Khualipi cu na hrawh i anmah philhlonâk tiangin a lotlau dih.

⁷ Asinain BAWIPA cu zungzal in a hmun lai; biaceihnâk dingah a bawiṭhutdanh cu a timh cang.

⁸ Dinnâk in vawlei hi bia a ceih lai i diknâk i biaceihnâk cu mizapi caah a dirter lai.

⁹ BAWIPA cu lamhchihmi hna ca zongah himnâk ralhruang a si lai, buaibai lio ah thuhnâk a si.

¹⁰ Na min hngaltu hna nih nangmah an in bochan lai; zeitintiah BAWIPA nangmah kawltu hna cu na kaltâk bal hna lo.

¹¹ Zion i a ummi hna BAWIPA thangṭhat in hla sa u! A tuahmi thil kha mizapi sinah phuang u.

¹² Thisen phu a hlam tikah, a philh hna lo; toidormi hna au thawng zong a philh lo.

¹³ Maw BAWIPA, ka zângfah law! Aka huatu hna ruang i ka buainâk hi ka ruahpiak ko. Nang cu thihnâk kutka chungin aka chuahtertu na si.

¹⁴ Cuticun nangmah thangṭhatnâk vialte kha, Zion fanu kutka hrimhrim in ka phuan khawh nâkhnga, na khamhnâk ah kâ lawm lai.

¹⁵ Miphun hna cu an sermi khor ah an pil dih; an thlithup i an phahmi sur nih anmah ke lila a awh dih hna.

¹⁶ BAWIPA cu bia aceih ningin hngalh a si; misuaksual cu amah kutchuak nih a foih tawn. Selah

¹⁷ Misuaksual hna cu Pathian philh a hmangmi miphun vialte he hell chungah an kir lai.

¹⁸ Zeitintiah chambaumi hna cu philh an si zungzal lai lo; sifak hna ruahchannâk zong zungzal in a tlau lai lo.

¹⁹ Maw BAWIPA, tho law, minung menmen nih in ngamh hna hlah seh; miphun hna hi na mithmuh ah biaceih si hna seh.

²⁰ Maw BAWIPA, miphun hna nih minung menmen an si kha an i hngalh khawh nâkhnga thinphânnâk ah chia hna. Selah