SALM 88 - Laibaibal Thiang (BSI)

¹ Maw BAWIPA, ka khamhtu Pathian, chunzan hlan in na hmaiah ka au tawn,

² Ka thlacamnâk hi na sin phân sehlaw, ka aunâk lei ah hin na hna rak chi tuah.

³ Zeitintiah ka nunnâk hi buainâk in a khat i thlân khor ka naih ngai ngai.

⁴ Khor chung i a ṭummi hna lakah relchih ka si i ṭhawnnâk zeihmanh a ngei ti lomi bantuk ka si.

⁵ Ralthah mi thlânah an vuimi hna bangin mithi hna sinah thlâk ka si, cu hna cu na hngalh ti lomi hna le, na kut in na hlawnh cangmi hna an si.

⁶ Khorchung i a tangbik ah naka chiah i a thuhnâk le a muihnâk bik ah.

⁷ Na thinhunnâk nih aka nenh i na tilet vialte nih aka khuh dih. (Selah)

⁸ Ka theihhngalhmi kha hla pi ah naka chiahpiak hna i an ca fihnungmi ah naka canter; naka hrenhkhumh i ka chuak kho ti lo;

⁹ Harnâk ruangah ka mit an mui dih. BAWIPA, nichiar tein kan auh i kakut hi nangmah lei ah ka thlir hna.

¹⁰ Mithi caah khuaruahhar na tuah lai maw? Mithi kha tho in an in thangṭhat lai maw? (Selah)

¹¹ Na duhdawtnâk cu thlân ah phuangin, zumhtlâk na sinâk cu thihnâk hmun ah phuan a si hnga maw?

¹² Khuaruahhar na tuahmi kha mui lakah hngalh a si hnga maw? na dinnâk cu philhnâk hmunah hngalh a si kho lai maw?

¹³ Asinain maw BAWIPA, nangmah kha kan auh, zingah ka thlacamnâk na sin a phân lai.

¹⁴ BAWIPA, zeiruangahdah ka nunnâk hi hnu lei na chît? Zeiruangahdah kan sin in na hmai na thuh?

¹⁵ Ka no lio in harnâk tuarin ka thi hnik tawn, ṭihnung na sinâk tuar in, ka hmai thikhal a chuak tawn.

¹⁶ Na thinlinhnâk nih aka khuh i ṭihnung na sinâk nih aka hloh ko.

¹⁷ Cu hna nih cun ti bangin nitlâk te an ka khuh i anka dûm peng ko.

¹⁸ Aka dawtu le hawikawm kha hlapi ah na chiah hna, ka theihhngalhmi hna zong mui lakah na umter hna.