SALM 7 - Laibaibal Thiang (BSI)

¹ Maw BAWIPA ka Pathian, nangmah cu kan bochan; aka serhsattu vialte sinin ka khamh law ka luatter ko,

² culoahcun chiandeih bangin anka thlehbauh lai i khamhtu an um lo lioah, anka sâm dih sual lai.

³ Maw BAWIPA ka Pathian, hihi ka tuah ahcun; ka kutah sualpalhnâk a um ahcun,

⁴ ka sinah dai tein a ummi ṭhalonâk in ka lehrulh hna ahcun, asiloah ka ral kha a chan umlo in ka rok hna ahcun,

⁵ ral nih ka dawi in ka phân hna seh; asi, ka nunnâk hi leiah lamhchih hna seh law, hmaizah ka sinâk zong leidip ah chia ko hna seh.

⁶ Maw BAWIPA, thinhung in tho; ka ral hna thinhunnâk ruangah rung lang law, nawl napêk cang bang khan ka ca biaceih dingin tho tuah!

⁷ Cuticun â pummi zapi nih an in kulh lai; cucaah anmah hna ruangah a sannâk ah kir ṭhân.

⁸ BAWIPA nih bia a ceih hna lai; maw BAWIPA, ka dinnâk le ka chung i a ummi zumhtlâksinâk bangin bia ka ceih ko.

⁹ Aw misuaksual hna suahsualnâk kha donghter si seh law diknâk cu fehter si ko seh. Zeitintiah dinnâk Pathian nih lungthin le ruahnâk a hniksak tawn.

¹⁰ Kâ kilvennâk cu lungput i a dingmi khamhtu Pathian ta a si.

¹¹ Pathian cu a dikmi biaceihtu a si i Pathian cu misuaksual cungah nifa tein a thin a hung.

¹² A kir ṭhân lo ahcun, a vainam a harter lai, a likuk kha a kuaih i timhcia in a um.

¹³ Thihnâk ralthuam zong kha amah caah a timhlamh hna i a alh khomi thal kha a ser hna.

¹⁴ Zohhmanh, misuaksual nih sualpalhnâk a hrin; asi, buainâk a pawi i lih a hrin tawn.

¹⁵ Thuk ngaiin khor a cawh i a cawhmi khor lila ah amah kha a tla.

¹⁶ A tuahmi buainâk kha amah lu cungah a kir ṭhân lai, cun a chuahtermi zangennâk kha amah lu cungah a phân lai.

¹⁷ BAWIPA cu a dinnâk bangin ka thangṭhat lai i Cungnung Bik BAWIPA min thangṭhat in hla ka sa lai.