SALM 60 - Laibaibal Thiang (BSI)

¹ Maw Pathian, hnulei na kan chit; nakan hrawh cikcek i nâ lawm fawn lo; aw, kan tharchuah ṭhân ko sawh.

² Vulei hi na therter i na kuaiter; a kakmi hna hi phit ṭhân hna, zeitintiah â hnin peng ko hih.

³ Na mi le hna hi a harmi thil hna na hmuhter hna i buainâk misur nakan dinter.

⁴ Nangmah ṭihtu hna cu puanzar na pêk hna i biatak thawngin zar a si khawh nâkhnga. (Selah)

⁵ Na dawtmi hna kha khamh an si khawh nâkhnga; na orhlei kut in khamh law, ka let ko.

⁶ Pathian nih a thiannâk in a chim cang. “Kâ lawm lai i Sekem khua cu ka ṭhen lai, Sakut horkuang cu ka tah dih lai.

⁷ Gilead cu kata a si, Manase cu kata a si; Efraim zong kalu caah luchin a si; Judah cu ka nawlbia petu a si.

⁸ Moab cu kâ kholhṭawlnâk bêl a si; Edom cungah ka kedan ka hlawnh lai; Keimah thawngin Filistia cungah teinâk au aw ka chuah lai,”

⁹ A fekmi khuapi ah ahonihdah aka hruai lai? Edom ah ahonihdah anka hruai lai?

¹⁰ Maw Pathian, nangmah hi na si lo maw, hnu lei akan chittu cu? kan ralkap hna sin i a kal lomi kha, nangmah hi na si lo maw?

¹¹ Harnâk ah kan bawm hrâm ko, zeitintiah minung bomhnâk cu zeihmanhlo a si.

¹² Pathian thawngin ralṭha ngaiin kan nam hna lai, zeitintiah amah cu kan ral hna lamhchihtu a si.