SALM 57 - Laibaibal Thiang (BSI)

¹ Ka zângfah ko, maw Pathian, ka zângfah hrâm ko! zeitintiah ka nunnâk nih an bochan; hi vanchiatnâk hna hi a dih hlan lo, na thlatang ah kâ thup lai.

² Cungnung bik Pathian, zeizongvialte aka tuah piaktu ka Pathian cu ka auh lai.

³ Van in a run thlah lai i aka khamh lai i dolh dih aka timtu kha a sik lai. Pathian nih a velngeihnâk le biatak kha a run thlah lai.

⁴ Ka nunnâk hi chiandeih hna sinah a um; khangh aka timtu hna sinah ka it, an ha hna cu fei le thal bantuk a si, an lei kha vainam bangin a har.

⁵ Maw Pathian, nangmah cu van hna cungah khin hlawrh si law, na sunparnâk cu leipumpi ah um ko seh.

⁶ Ka ke awhnâk ah sur an phah i ka nunnâk cu a kun, ka lamah khor an cawh; asinain a laifang ah anmah tu an tla. (Selah)

⁷ Ka lungthin hi a fek ko, Maw Pathian, ka lungthin hi a fek ko; thangṭhatnâk pe in hla ka sak lai.

⁸ Ka sunparnâk i hlau tuah! Tingtang le thanglawi hna i hlau tuah u! keinih cun khua ka deipi lai.

⁹ Maw BAWIPA, mizapi sinah kan thangṭhat lai; miphun kip sinah nangmah thangṭhat in hla ka sa lai.

¹⁰ Na velngeihnâk nih van a phân i na biatak nih khuadawm an phân.

¹¹ Maw Pathian, nangmah cu van hna cungah khin hlawrh in um law, na sunparnâk cu lei pumpi ah um ko seh.