SALM 54 - Laibaibal Thiang (BSI)

¹ Maw Pathian, na min in ka khamh law, na ṭhawnnâk in ka bia ka ceih piak tuah.

² Maw Pathian, ka thlacamnâk ngai law, ka chimmi bia hna hi ka theihpiah ko.

³ Zeitintiah aka ralchanh dingin khual kha an tho i aka lamhchihtu hna nih thah anka timh. Pathian an hngal hrimhrim lo. (Selah)

⁴ Ngaihmanh, Pathian cu aka bawmtu a si. BAWIPA cu ka nunnâk kilvengtu hna lakah a um.

⁵ Amah nih ka ral hna an sual man a lehrulh hna lai. Na biatak in hrawk hna.

⁶ Keimah lungtho tein na sinah raithawinâk ka tuah lai; Maw BAWIPA, na min cu ka thangṭhat lai, zeitintiah hihi a ṭha.

⁷ Zeitintiah ka harnâk vialte chungin aka chuahter, ka duhning tein ka ral hna cung i a tlungmi cu ka mit nih a hmuh cang.