SALM 144 - Laibaibal Thiang (BSI)

¹ Ka Lungpi BAWIPA cu thangṭhat in um ko seh, ka kut hna hi raldoh a cawnpiak i ka kutdong hna hi dohning a cawnpiak.

² Ka duhdawtnâk le ka ralhruang, ka himnâk innsâng le ka khamhtu, ka phaw le ka zâmnâk, kami le hna ka tang i kun awkah aka teipiaktu.

³ BAWIPA, minung hi zeidah a si i na hngalh tawn? Mi fapa zong hi zeidah a si i na lungkil ah na chiah?

⁴ Minung hi thaw bantuk a si i a nun chung ni hna cu a lo zaumi thladêm bantuk a si.

⁵ Maw BAWIPA, na van hna cu niamter in, rung ṭum tuah, tlâng hna khi tawng law, a khu a chuak lai.

⁶ Nimtlau lekter law, annih cu ṭhek dih hna; na thal kha kap law, hrawk dih hna.

⁷ Cunglei in na kut in banh hna law, ka ral hna kut in ka khamh, tilian lakah ka himter ko.

⁸ Ankâ cu lihchimnâk a si i an orhlei kut cu diklonâk a si.

⁹ Maw Pathian, nangmah thangṭhat in hlathar ka sak lai, tingtang hrihra ngeimi he nangmah thangṭhat in hla ka sa lai.

¹⁰ Amah hi a si, siangpahrang hna sinah khamhnâk a pe i ṭih a nungmi vainam chungin a sal David a khamhtu cu.

¹¹ Ka ral, lih lawng te a chimmi le, an orhlei kut zong a dik lomi thil lawngte in a khatmi hna chungin ka khamh ko.

¹² Ka fapa le hna cu thlai bantukin zawkzawk in ṭhang hna seh law, ka fanu le hna zong siangpahrang in i ṭamhmi lung bang si ko hna seh.

¹³ Kan rawl in khat hna seh law, rawl phunphun in khat ko hna seh; kan Tuu hna nih fa a thongthong in hring hna seh law, lo chungah a singsing in hring hna seh.

¹⁴ Kan cawpa hna nih phur luaimai hna seh law, kan saṭil hna roktu le, lohtlau tertu um loin, khuachung zalam ah vansannâk aw um hlah seh.

¹⁵ Cubantuk covo a cotu hna cu mithluachuak an si. BAWIPA Pathian ah â ngeihmi hna cu mi thluachuak an si.