ROM 6 - Laibaibal Thiang (BSI)

¹ Zeidah kan chim kun lai? Zângfahnâk cu a tam chih chin nâkhnga kan sual peng ko lai maw?

² Sualpeng naisai hlah! Kannih sual i a thi cangmi hi zeitindah sualin kan nun khawh lai?

³ Asiloah Krih Jesuh i baptisma a ing cangmi kannih hi a thih nâkah baptis kan si cang ti kha nan hngal lo maw?

⁴ Cucaah a thihnâk i baptis kan si tikah a sinah phum in kan um. Pa sunparnâk nih Krih cu thih nâkin a thawhter bangin, kannih zong nunthar in kan nun ve awk a si.

⁵ Zeitintiah a thihnâk he i lo in amah he kan i pehtlaih ahcun, a thawhṭhannâk he i lo zongin kan i pehtlai hrimhrim ve lai.

⁶ Hihi hngal usihlaw, kan minung hlun cu a sinah khenhchih in a um cang, sualpum cu hlawnh i a um nâkhnga le sual sal i kan um ti nâkhnga lo.

⁷ Zeitintiah a thi cangmi cu sual nâkin luatter a si cang.

⁸ Cubangin Krih sinah kan thih ahcun, a sinah kan nung ve lai ti kha kan zumh.

⁹ Krih cu thihnâk in thawhter a si i a thi ti lai lo ti kha kan hngalh. Thihnâk nih Amah cu a uk kho ti lo.

¹⁰ Zeitintiah thihnâk i a thihmi kha voikhat ah zungzal ca in sualah a thi; asinain nunnâk i a nun kha Pathian ah a nung.

¹¹ Cubangin nannih zong sualah a thi cangmi ah i ruat u law, kan Bawipa Jesuh thawngin Pathian ah a nungmi ah i ruat u.

¹² Cucaah nan pumsa duhnâk zul dingin, a thi khomi nan pum ah hin sual nih in uk ti hna hlah seh.

¹³ Cun nan taksa ṭengnge hna kha dinlonâk hriamnam caah sual tuahnâk dingah pe siang ti hlah u, thihnâk in a tho ṭhanmi bangin Pathian sinah i pe ulaw, nan pum ṭengnge zong cu dinnâk hriamnam caah Pathian sinah pêk siang deuh u.

¹⁴ Zeitintiah sual nih nan cungah nawl a ngei ti lai lo, zeicatiah nawlbia tangah nan um ti lo i zângfahnâk tangah nan um cang.

¹⁵ Zeitindah a si kun lai? Nawlbia tangah um loin zângfahnâk tang i kan um caah kan sual kun lai maw? Sual naisai hlah!

¹⁶ Nawlngai ding sal si awkah nan i pe cang ti kha nan hngal lo maw? Thihnâk ding sual sal ah siseh, nunnâk ding dinnâk sal ah siseh, a nawl nan ngaih hngami sal nan si kha nan hngal lo maw?

¹⁷ Sual sal nan si ko nain khamh nan sinâk kong cawnpiaknâk nan sinah phuanmi kha nan lungthin in nan rak zulh caah Pathian sinah lawmhnâk bia um ko seh.

¹⁸ Sualnâk in zalonter nan si cang caah dinnâk sal nan si cang.

¹⁹ Nan thisa zângdernâk ruangah minung phungin ka chim lai. Zeitintiah nan pum ṭengnge hna cu thurhnawmhnâk le nawlbuar nâkin nawlbuar chinnâk sal ah nan rak pêk cang bantukin, atu ah cun nanpum ṭengnge hna kha thianhlimnâk phâkpi dingin dinnâk sal ah pe ve cang u.

²⁰ Zeitintiah sual sal nan si lioah khan, dinnâk lei ah khan zalonter nan si.

²¹ Atu i zahpi awktlâk nan tuahmi nih zeibantuk theitlai dah a chuahter hna? Zeitintiah cu hna an donghnâk cu thihnâk a si.

²² Asinain sualnâk in zalonter nan si hnu i Pathian sal nan si ah hin, thiannâk theitlai chuah khawhnâk nan ngei, a donghnâk i zungzal nunnâk he.

²³ Zeitintiah sualman cu thihnâk a si, asinain Pathian thilpêk cu kan Bawipa Jesuh Krih thawngin zungzal nunnâk a si.