ROM 11 - Laibaibal Thiang (BSI)

¹ Pathian nih a mi le a hlawt hna maw? hei ti ning law. Hlaw naisai hlah. Zeitintiah keimah zong hi Israel mi, Abraham tefa, Benjamin miphun ka si.

² Pathian nih a hngalh chungmi a mi le kha a hlaw hna lo. Elijah nih Israel mi hna kong i Pathian sinah nawlnâk a tuahning, Cathiang nih a chimmi hi nan hngal lo maw?

³ “Bawipa, na profet hna an thah i na biakṭheng hna an chimh. Keimah lawng ka tâng i kei zong thah anka timh,” tiah a rak chimmi kha.

⁴ Asinain Pathian nih a sinah zeitindah a leh? “Baal hmai ah khuk bil in a kun bal lomi 7000 Keimah caah kâ chiah ko hna,” tiah a ti.

⁵ Cubantukin atu chan zongah zângfahnâk thawngin thimmi hna cu a tângmi tlawmte an si.

⁶ Cun zângfahnâk a si ahcun, tuahsernâk thawng a si ti lai lo, culoahcun zângfahnâk hi zângfahnâk a si kho lai lo. Tuahsernâk a si ahcun zângfahnâk a si kho hlei lai lo. Culoahcun tuahsernâk zong cu tuahsernâk a si kho hlei lai lo.

⁷ Zeitindah a si kun lai? Israel mi nih an kawlmi cu an hmu lo i thimmi hna nih an hmuh. A dang vialte hna cu an lung a khong dih cang.

⁸ Hitihin ṭial a si. “Pathian nih nihin tiangin an sinah hngilhnâk thlarau a pêk hna i hmuhkhawh lonâk mit le, theihkhawh lonâk hnâ he”

⁹ Cun David nih hitihin a ti. “An cabuai cu an caah rap le foihnâk si sehlaw, tluknâk le lehrulhnâk zong si seh.

¹⁰ Hmu kho lo dingin an mit mui sehlaw, an kêng cu i kuai zungzal ko seh.”

¹¹ An tluknâk cu an rilh thainâk a si maw? hei ti ning law. Si naisai hlah! Asinain anmah hnahchuahter nâkah, an tluknâk thawngin Gentel mi hna sinah khamhnâk a rak phân.

¹² Cubangin an tluknâk hmanh vawlei rumnâk a si i an sunghnâk hmanh Gentel caah rumnâk a si ahcun an tlamtlinnâk nih cun a rumter chinchin hna lai.

¹³ Zeitintiah nannih Gentel mi hna sinah ka chim. Gentel mi hna caah lamkaltu ka si caah, ka rian hi biapi ngai ah ka ruah,

¹⁴ hi thil ruangah hin zeiti tal khin ka phunhawi hna hnah ka chuahter i mi cheukhat khamh an si khawh nâkhnga.

¹⁵ Zeitintiah anmah hlawtnâk hmanh vawlei he remṭhannâk a si ahcun, anmah cohlan `hannâk cu thihnâk in nunnâk ti ko lo cu zeidah a si lai?

¹⁶ Zeitintiah theitlai hmasa bik a thian ahcun, a dang zong an thiang. A hram a thian ahcun a nge zong an thiang.

¹⁷ Cun Oliv nge cheukhat kha tan piakin nang olive deu kha olive tak takah peh na si i a kung cawmtu a hram zong nâ hrawm ahcun,

¹⁸ a nge ralchanh in i porhlaw hlah. Na porhlawt a si ahcun a hram cawmtu na si lo kha philh hlah, a hram tu nih an cawmmi na si.

¹⁹ Nang nih, a kung i peh ka sikhawh nâkhnga a nge kha tan an si cang lo maw, na ti khawh men.

²⁰ A si ko. An zumh lo ruangah tanmi an si, nang tu cu na zumh ruang i pehmi na si. I porhlaw hlah, a ṭih tu ṭih deuh.

²¹ Zeitintiah Pathian nih a nge tak tak hmanh a zuah lo ahcun, nang zong an zuah hlei lai lo.

²² Cucaah Pathian ṭhatnâk le ṭih a nunning hi ruat hmanh, a tlumi caah cun ṭih a nung ngai ngai, A ṭhatnâk i na hmunh ahcun, na caah a ṭha. Culoahcun tan na si ve sual lai.

²³ Cun annih zong zum lo i an um peng lo ahcun, peh an si ṭhân te ko lai. Pathian nih anmah a peh ṭhân khawh ko hna.

²⁴ Zeitintiah nang Olive deu tanmi hmanh Olive kungah peh na si ahcun, cu olive taktak nge hna cu olive kungpi ah peh an si chinchin ko lai.

²⁵ Ule nau hna, hi biathli hi nan hngalh lo ka duh lo, culoahcun nanmah le nanmah nan i fimter sual lai: Gentel mi hna tlamtlinnâk a phâk hlan pauh cu Israel mi hna cungah lungpinnâk a um rih.

²⁶ Cun Israel mi vialte khamh an si te lai, hitihin ṭial a si. Zion in Khamhtu cu a ra lai i Jakop sinin Pathian-zeirellonâk a lakpiak hna lai.”

²⁷ Zeitintiah hihi an sin i ka biakam cu a si, an sualnâk ka lakpiak tikah,”

²⁸ Thawngṭha lei in ti ahcun nanmah ruangah ral an si i thimnâk lei in ti ah cun hringtu hna ruangah dawtmi an si.

²⁹ Zeitintiah Pathian thilpêk le kawhnâk hi lêt khawh a si ti lo.

³⁰ Zeitintiah nannih zong Pathian nawl ngailo nan rak si, asinain atu ah annih nawl an ngaihlo ruangah nannih nih zângfahnâk nan hmu.

³¹ Cubantuk ṭhiamṭhiamin atu ah annih zong nawl ngaihlonâkah an um, cucu nan sin i langhtermi zângfahnâk hi an nih zong nih an co khawh ve nâkhnga caah a si.

³² Zeitintiah Pathian nih mivialte a zângfah khawh hna nâkhnga nawl ngaihlo nâkah mivialte a khumh dih hna.

³³ Aw, Pathian fimnâk le hngalhnâk rumning hi a va thûk hringhran dah! A biaceihnâk cu hngalhcawk le, a lam hna cu hmuhkhawh dih a va si lo dah!

³⁴ “Ahonihdah Bawipa ruahnâk kha a hngalh? Asiloah ahodah Amah ruahnâk cheutu a si bal?

³⁵ Asiloah Amah cham awkah ahonihdah thil an pêk hmasat?

³⁶ Amah sin le Amah thawng le Amah caah thil vialte hi an um i Amah sinah sunparnâk cu zungzal in um ko seh. Amen.