PHUNGTHLÛKBIA 9 - Laibaibal Thiang (BSI)

¹ Fimnâk nih a inn a sak i tung pasarih a bunh.

² Sa a thah i misur hang phunphun hna a cawh hna i cabuai ah ei awk in a tuah.

³ A umpi mi ngaknu a thlah hna i khualipi hmun sangbik in an au,

⁴ “Mi sawhsawh a simi pauh hika leiah imer hna seh!” theihthiamnâk a baumi hna sin zongah,

⁵ “Ra ulaw, ka changreu rak ei u, a phunphun cawhchihmi ka misur hi rak ding u,” tiah a ti.

⁶ Hruhnâk hi kaltâk ulaw, nung u; cun theihthiamnâk lam hi zul hna u.

⁷ “Zomhtaih hmang chimhringtu nih serhleihnâk a ton lai, misual chimhringtu nih kutthlâk a ton tawn.

⁸ Zomhtaih a hmangmi cu chimhring hlah, huat na ton lai, mifim nun na chimh ahcun an dawt lai.

⁹ Mifim chimhring law a fim chin lai; midik cawnpiak law a thiamnâk â chap lai.

¹⁰ “BAWIPA ṭihzah hi fimnâk hram a si, Mithiang hngalh cu theihthiamnâk a si.

¹¹ Zeitintiah na ni hna cu ka tamter lai i na nun chung kum hna an chap lai.

¹² Na fim ahcun na caah a fimmi na si lai, nihsawh a hmangmi na si ahcun nangmah nih na tuar lai.”

¹³ A hrutmi nu cu an aukhuang, mi sawsawh a si i zeihmanh a hngal lo.

¹⁴ Zeitintiah a innkâ hramah a ṭhu i khualipi hmun sangbik ah a ṭhu tawn.

¹⁵ Lam i a kalmi anmah le an lam cio i a kalmi kha a rak kawh hna.

¹⁶ “Mi sawsawh a simi pauh hika ah ra hna seh,” tiah a ti; cun theihthiamnâk a baumi hna sinah,

¹⁷ “Fir mi ti cu a thlum i a thlithup i eimi changreu cu a thaw khun,” tiah a ti tawn hna.

¹⁸ Asinain cuka ah mithi an um ti kha a hngal lo, a khual hna cu a thuhnâk hell ah an um ti zong kha a hngal lo.