PHUNGTHLÛKBIA 6 - Laibaibal Thiang (BSI)

¹ Ka fapa, na hawi caah âmah nâ khân i midang ca i bia na rak i kam laklawh cang a si ahcun,

² Na hmurkâ chuak bia lila nih an foih cang, na hmurkâ chuak bia in lâk na si cang.

³ Cuticun ka fapa, hitihin nanmah le nangmah na khamh lai; zeitintiah na hawikawm kutah na phân cang i toidornâk he va kal law, ngaihthiam va hal ko.

⁴ Nguttâk hlah law, hngilhtâk fawn hlah.

⁵ Sapeltu sinin sakhi a zâm bantukin zâmtâk law, vate vehtu sinin vate bantukin lodiam in zuantâk.

⁶ Nang, thathu pa, hngerhte sinah va kal law, an umtuning in fimnâk va cawng,

⁷ Annih cu, hotu, ngiathlai tu, asiloah uktu an ngeilo nain,

⁸ Ṭhal cân ah rawl an pumh i rawlṭuan cân ah rawl an pumh.

⁹ Maw, thathu pa, zeicandah na ih lai? zeitikahdah nâ hlauh lai?

¹⁰ It rih ning law, tlawmpal i hngilh ko rih ning, kutsih in i dinta rih ko ning, na ti lio ah.

¹¹ Sifaknâk nih zan i a vakmi bangin chikkhatte ah an phanh lai i herhbaunâk nih rakkap bangin an phanh lai.

¹² Santlai lo pa, misuaksual pa cu, sullam ngei setlo biachim in â chawk len.

¹³ A mit â sur, a ke â hngirh lengmang i a kut dongin a sawh len hna.

¹⁴ A lungput a ngawi i Ṭhatlonâk lei lawng a ruat peng, sikcâknâk thlaici a tuh tawn.

¹⁵ Cucaah rawhralnâk nih chikkhat te a tlun hnawh lai, chikkhatteah damter khawh lomi rawhralnâk a ton lai.

¹⁶ Hi thil paruk hna hi BAWIPA nih a huat hna, asi a fihmi phun sarih an si.

¹⁷ Â uahmi mit, lihchim mi lei, sual ngeilo thisen chuahnâk kut,

¹⁸ Ṭhatlonâk a ruat tawnmi thinlung, thilṭha lo tuah awkah a zuanzâng mi ke,

¹⁹ Lihchim tawnmi biahngaltu deu le unau karlak i remlonâk thlaici tuhtu hna an si.

²⁰ Ka fapa, napa nawlpêk kha zul law, nanu nawlbia cu kaltâk hlah.

²¹ Na lungchung ah i chiah law, na hngawngah i awih peng.

²² Na vah nâkah an hruai lai, nâ hngilh tikah an ven lai i nâ ṭhangh tikah a rak in chawnh lai.

²³ Zeitintiah nawlpêk cu meiin a si nawlbia cu ceunâk a si; chimhhrin cawnpiaknâk cu nunnâk lam a si.

²⁴ Nu ṭha lo le, bia thlum-al i lemsawi hmangmi chungin an khamh lai.

²⁵ Na lungthin in â dawhnâk hngar hlah, asiloah a mit-au dawhnâk nih in hnûk hlah seh.

²⁶ Zeitintiah hlawhhlang nu ruangah patling hi changreu kuaimi pel ah â cang tawn, mi nupi ṭangah a kaimi nih a sunglawimi a nun kha a hrawh cikcek a si.

²⁷ Minih â hrukmi hnipuan kanglo in mei alh a pom kho hnga maw?

²⁸ Minih a ke kanglo in meiṭil cungah a kal kho hnga maw?

²⁹ Cuticun a inpa nupi a ihpitu zong cabantuk cu a si; a tawngtu nih thiamlo a co lai.

³⁰ Arawl aṭam ruangah minih thil a fir ahcun, cu mifir cu minih an zomhtaih lo.

³¹ Hmuh a si ahcun a leh sarih in a cham hrimhrim awk a si, a inn i a chawva kha pêk a herh kho ko.

³² Mi nupi a ihpitu pauh cu theihhngalhnâk a baumi a si, amah nunnâk a hrawktu a si.

³³ Hliamhma tuar le minchia ngaiin a um lai, amin a chia peng cang lai.

³⁴ Zeitintiah hamtuknâk hi vale thinhun tertu a si, cucaah dimdawihnâk um loin phu a hlam lai.

³⁵ Lungoihter khawh a si lai lo, thilpêk tampi zongin lungoih khawh a si lai lo.