PHUNGTHLÛKBIA 5 - Laibaibal Thiang (BSI)

¹ Ka fapa, ka fimnâk hi ngai law, ka theihthiamnâk ah na hna chi.

² Ruahthiamnâk na ngeih khawh nâkhnga le na hmur nih hngalhnâk â cinken khawh nâkhnga.

³ Zeitintiah nu ṭha lo hna hmurkâ cu khuaihliti bangin a thlum, a kâ hna cu chiti nâk in a nal deuh.

⁴ Asinain a donghnâk cu anfangkhâ bantukin a khâ i kaphnih har vainam bantuk in a har.

⁵ Ake nih thihnâk lam a panh i ake phau nih hell mei a panh.

⁶ A nun lamthluan na ruat lo i a lam a feh lo kha na hngal hna lo.

⁷ Cucaah ka fale hna, atu ka ngai tuah u, ka hmurkâ chuak bia hna hi pialtâk hlah u.

⁸ A sinin hla pi ah i ṭhial u law, a inkâ hram zong va naih hlah u.

⁹ Culoahcun upatnâk na hmuhmi hi midang sinah â ṭhial sual lai, mi nunchia hna lakah na nunnâk na hman dih sual lai.

¹⁰ Culoahcun ramdangmi nih na rumnâk in an i nuam lai i na ṭuanmi theipar hna cu ramdangmi inah a kal sual lai.

¹¹ Cun na thisa le pum a derthawm tikah na ṭahpi hna sual lai.

¹² “Zeitindah cawnpiaknâk kha ka rak huat i nunchimnâk kha ka lungthin in ka rak zomhtaih!

¹³ Aka cawnpiaktu aw ka rak zulh duh lo i a cawnpiaknâk ka rak ngaih lo kha mu!

¹⁴ Mizapi le â pummi hna sinah rawhnâk ka ton lo lawng a si ko hi ta,” na ti te lai.

¹⁵ Nangmah tikhor, nangmah tikhor in a chuakmi ti hrimhrim kha ding.

¹⁶ Na tikhor hna cu ramkip ah luang in, zatlâng lam hna ah an luang dih ko lai maw?

¹⁷ Nangmah ca lawng lawngah si seh, midang hrawmh awk a si lo.

¹⁸ Na tikhor cu thluachuah in um sehlaw, na no lio nupi ah na lung tling seh.

¹⁹ Duhnung mi sazuk la bantuk le â dawhmi sazuk pa bantukin a ṭangnem nih na lungdi remhter seh, cun a dawtnâk nih na lungdi riamter ko seh.

²⁰ Zeitindah nang ka fapa nih nu ṭha lo cu na duh lai i a ṭangnêm cu na pom lai?

²¹ Zeitintiah minung nuncan vialte hi BAWIPA nih a hmuh dih, a zulhmi lam vialte hi a hngalh dih.

²² Amah ruahnâk nih misual cu a tlaih lai i a sualnâk hrihrual in khih a si lai.

²³ Cawnpiaknâk a bau ruangah a thi lai i a nganmi a hruhnâk ruangah a tlau lan lai.