PHUNGTHLÛKBIA 4 - Laibaibal Thiang (BSI)

¹ Ka fale hna, pa cawnpiaknâk cu ngai u law, theihthiamnâk hngal dingin ngai tuah u.

² Zeitintiah cawnpiaknâk ṭha kan pêk hna, ka nawlbia hi kaltâk hlah.

³ Kapa fapa ka si lio ah, kanu fapa ngeihchun le dawtmi ka si.

⁴ Ka sinah chim in cawn zong a ka cawnpiak, “Na lungthin in ka bia hna hi i cinken, ka nawlpêk hna hi zul law, nung.

⁵ Fimnâk ngei law! theihthiamnâk ngei! ka hmurkâ chuak bia hna hi philh in mertâk hna hlah.

⁶ Kaltâk hlah law, an kilven lai, daw law, an huhphenh lai.

⁷ Fimnâk hi biapi bik a si, cucaah fimnâk hi ngei, na ngeihmi thil vialte ah, theihthiamnâk hi ngeih chih.

⁸ Cawisâng law an santer lai, pom law, upatnâk ah an kalpi lai.

⁹ Nalu ah ṭamhmi zângfahnâk an chinh lai, sunparnâk bawiluchin an pêk lai.”

¹⁰ Ka fapa, ka chimmi hi ngai in cohlang hna law na nun chung kum hna a tamter lai.

¹¹ Fimnâk lam kan cawnpiak i a dikmi lamah kan hruai.

¹² Na kal tikah, nake caah dawntu a um lai lo, na tlik tik ah na ril lai lo.

¹³ Nuncawnnâk cu fek tein i tlaih law, thlah ti hlah; i tlaih peng ko, zeitintiah na nunnâk a si.

¹⁴ Misuaksual lamthluan ah lut hlah law sualnâk lam ah kal hlah.

¹⁵ Hrial law, a cungah kal hrimhrim hlah; mertak law lo diam kaltâk.

¹⁶ Zeitintiah thilṭhalo an tuah lo ahcun an i hngilh ballo, mi pakhat khat an rilhter lo ahcun an mit aku kho lo.

¹⁷ Zeitintiah suahsualnâk changreu an ei i zângennâk zu an din tawn.

¹⁸ Asinain midik hna lam cu ni ceu bantuk a si, cucu chun laifang ceunâk bantuk a si.

¹⁹ Misuaksual hna lam cu khuamui bantuk a si, an tlukrilhnâk chan zong an hngal lo.

²⁰ Ka fapa, ka bia ṭha tein ngai hna law, ka chimmi hi biatak in ruat hna.

²¹ Na mit hmuh in chuahter hlah, na lungthin laifang ah i cinken hna.

²² Zeitintiah a hmutu hna caah nunnâk a si, an taksa dihlak caah ngandamnâk a si.

²³ Thildang vialte nâkin na lungthin ṭha tein kilveng, zeitintiah nunnâk rak chuahnâk hram a si.

²⁴ Hlennâk hmurkâ hi hlawt hna, cun palhsualnâk hmur kha hlapi ah chia.

²⁵ Na mit in hmailei kha ding tein zoh law ding tein na hmailei khi cuan hna.

²⁶ Na lamthluan kha hlathlai hmasa law, na lam vialte cu fehter si hna seh.

²⁷ Orh lei ah siseh, kehlei ah siseh pial hlah, Ṭhatlonâk in nake kha ṭhial.