PHUNGTHLÛKBIA 2 - Laibaibal Thiang (BSI)

¹ Ka fapa, ka bia kha na cohlan hna i ka nawlpêk kha na chungah nâ khon i

² fimnâk leiah na hna na tun i theihthiam dingin na lungthin na pêk ahcun;

³ Asi, thleidan khawhnâk ngei dingin na au i theihthiamnâk ngei dingin na-aw na chuah ahcun,

⁴ Ngun bangin na kawl i thuhmi ro bantukin na kawl ahcun;

⁵ BAWIPA ṭihzah na theihthiam lai i Pathian hngalhnâk kha na hmuh lai.

⁶ Zeitintiah BAWIPA nih fimnâk a pêk i a hmurkâ in hngalhnâk le theihthiamnâk a chuak tawn.

⁷ Mi dik hna caah fimnâk taktak a pumh piak i dik ngaiin a kalmi caah Amah cu phaw a si.

⁸ Diknâk lam kha a kilven i a mithiang hna lam kha a himter tawn.

⁹ Cuticun diknâk le dinnâk na theihthiam lai i thleidan ngeihlonâk le a ṭhami lam zong na theihthiam lai.

¹⁰ Na lungthin ah fimnâk a luh tikah, hngalhnâk cu na nunnâk lomh tertu a si lai.

¹¹ Ruahthiamnâk nih an himter lai i theihthiamnâk nih an kilven lai.

¹² Sualnâk lamin khamh awk ah le, bia merh a hmangmi hna chungin khamh awkah,

¹³ Cu hna nih, muihnâk lam zulh awkah, lam dik cu an kaltâk;

¹⁴ Thilṭhalo tuahnâk ah an i lawm i misuaksual dinlonâk ah an i lawm tawn.

¹⁵ An nunning kha a ngawi i an lamthluan ah zumh awk an tlâk lo.

¹⁶ Nu ṭhalo le, bia thlum-al hmangin soilêm a hmangmi hna chungin khamh awk le,

¹⁷ A no lio hawikawm kal takin, a Pathian biakam a philhmi hna sinin.

¹⁸ Zeitintiah a inn nih thihnâk lei ah a hruai i a lam hna nih mithi lei a panh.

¹⁹ A sinah a kalmi an kir bal ti lo i nunnâk lam an zul bal ti lo.

²⁰ Cubangin ṭhatnâk lam na zulh khawh i dinnâk lam kha na zulh peng nâkhnga.

²¹ Zeitintiah a dikmi nih ram cu an hngah lai i sawi awk um lomi an hmun lai.

²² Asinain misuaksual cu vulei cungin hloh an si lai, cun zumh awk a tlâk lomi hna cu an hram in bongh dih an si lai.