PHUNGTHLÛKBIA 1 - Laibaibal Thiang (BSI)

¹ Israel siangpahrang, David fapa Solomon phungthlûkbia:

² Fimnâk le cawnpiaknâk hngal ding le, theihthiamnâk bia hna hmuthiam ding le:

³ Fimnâk, diknâk, biaceihnâk le dinnâk lei cawnpiaknâk cohlannâk ding le;

⁴ Mi sawsawh kha ralrinnâk pe ding le, mino hna nih hngalhnâk le ruahthiamnâk an ngeih khawh nâkhnga-

⁵ Mifim nih a ngaih i fimthiamnâk â chap i theihthiamnâk a ngeimi nih fimchimhnâk kha an hmuh lai.

⁶ Phungthluk le a fianternâk, fimnâk bia le biathûk hna theihthiamnâk dingah.

⁷ BAWIPA ṭihzah cu hngalhnâk hramthawknâk a si, asinain mi hrut hna nih fimnâk le cawnpiaknâk kha zeiah an rel lo.

⁸ Ka fapa, napa cawnpiaknâk ngai law, na nu nawlbia kha kaltâk hna hlah.

⁹ Zeitintiah nalu caah â dawhmi thuam an si lai i nahngawng caah pangpar ṭhi an si lai.

¹⁰ Ka fapa, misual nih an in lêm ahcun, duh hrimhrim hlah.

¹¹ Kan sinah ra ve, “Thisen chuah awkah kan bawh hna lai, a chan um loin sualnâk a ngei lomi a thli in bawh hna u sih,

¹² Seol bangin an nung nain kan dolh hna lai i a thûk ngaimi khor chung i a tlami bantukin.

¹³ Thil mansung kan lâk hna lai i hranchaw in kan in kan khahter lai,

¹⁴ Kan sinah i tel ve law, phaisa bawm kan i hrawm lai,” an ti tikah.

¹⁵ Ka fapa, an sinah i tel ve hlah, anlam kha hrial i zuam.

¹⁶ Zeitintiah anke cu sualnâk leiah a tli i thisen chuah dingin an khul a rang tawn.

¹⁷ Zeibantuk vate hmanh a hmuh lio i sur zar cu pakpalawng a si.

¹⁸ Hi mi hna hi anmah thisen a bawhtu an si, anmah nunnâk a thlithup in a bawhtu an si.

¹⁹ Cubantukin hlawknâk lei i hakkau mi hna nunning cu a si, a ngeitu hna nunnâk an lâkpiak tawn.

²⁰ Fimnâk kha thang ngaiin lenglei in a au, lamṭe kipah a aw chuah in a au.

²¹ Mi tamnâk bikah a au i khualipi luhnâk kutka ah a au,

²² Nannih mi sawsawh hna, zeicandah thil sawsawh kha nan tlaihchan ko rih lai? Zeitintiah zomhtaih hmangmi hna nih zomhtaihnâk ah an i nuam i mihrut nih hngalhnâk kha an huat.

²³ Ka sîknâk ah i mer u, nan chungah ka thlarau ka bungh lai i ka bia kan hngalhter hna lai.

²⁴ Zeicatiah kan kawh hna i nan duh lo, ka kut ka thlir i ahohmanh nih zei ah nan rel lo.

²⁵ Zeicatiah ka remruatmi vialte zeiah nan rel lo, kan sîknâk hna zong nan cohlang fawn lo.

²⁶ Vanchiatnâk nan ton tikah kan nihsawh ve hna lai i ṭihphannâk nan ton tikah kan nih sawh hna lai.

²⁷ Ṭihphannâk thlichia nih an nam hna i phusim nih an chawih hna tikah, khuaruahhar vansannâk a phâk tikah kan nihsawh hna lai.

²⁸ Cu cân ah nan ka auh lai, asinain kan let hna lai lo; biatak in nan ka kawl lai nain nanka hmu lai lo.

²⁹ Zeicatiah hngalhnâk an huat i BAWIPA ṭihzah an i thim lo ruangah.

³⁰ Ruahnâk ka cheuhmi hna an duh lo, ka chimhhrinnâk zei i an rel lo caah.

³¹ Cucaah an nuncan theitlai cu anmah nih an ei lai, an khuaruahmi lila nih a khimter hna lai.

³² Zeitintiah mi sawsawh hna nih an pialter hna nâk nih a thah hna lai, khua lu khua taw ruat loin an umnâk nih a hrawh hna lai.

³³ Asinain ka bia a zulmi hna cu him tein an um lai, Ṭhatlonâk ṭih loin him tein an um lai.