MATTHAI 3 - Laibaibal Thiang (BSI)

¹ Cu cân ah Baptisma petu Johan cu phung chim in Judia ramcar ah a rak phân,

² “I ngaihchih u, zeicatiah vanbawi pennâk cu a nai cang,” tiah a ti.

³ Zeitintiah hihi profet Isaiah nih a rak chim chungmi, “Ramcar i au thawng nih, BAWIPA caah lam rak sial u law, ding tein a kalnâk lam cu remh u,” tiah a ti.

⁴ Johan cu kalauk hmul in â thuam i a taisawm cu saphaw a si; a rawl cu khaubawk le ram khuaihliti a si.

⁵ Cuticun Jerusalem, Judia ram vialte le Jordan tiva pawngkam mi vialte kha Johan sinah an kal;

⁶ an sualnâk i phuangin Jordan tiva ah Baptisma a rak pêk hna.

⁷ Asinain Johan nih Farasih le Sadusih mi baptisma ing ding i an rat kha a hmuh tikah, “Rul fale hna! A ra laimi thinhunnâk zâmtâk dingin ahonihdah ralrin an pêk hna?

⁸ Cucaah theitlai chuah lak in i ngaihchih u,

⁹ ‘Abraham tefa kan si tiah i ruat hlah u.’ Zeitintiah Pathian nih hi lung hna hmanh hi Abraham tefa ah a canter khawh ko, tiah kan chimh hna.

¹⁰ Atu zongah thingkung hram kipah hreitlung an chiah cang. Theiṭha a tlai lomi pauh cu an hau lai i meiphu ah hlawnh a si lai.

¹¹ Kei nih ngaihchih hmelchunhnâk caah ti in baptisma kan pêk hna, ka hnu i a ra laimi cu keimah nâkin a ngan deuh, a kedan putu hmanh ah kâ tlâk lo. Amah nih Thiang Thlarau le mei in baptisma an pêk hna lai.

¹² A kut in sisiap â put i hrih ah facang kha a zah lai, a fangṭha kha bukah a khumh hna lai, asinain a hi vialte cu a mit kho lomi mei ah khangh an si dih lai,” tiah a ti hna.

¹³ Cuhnuah Jesuh cu Galili ram in Jordan tiva ah baptisma ing dingin Johan sinah a ra.

¹⁴ Johan nih, “Nangmah nih baptima naka pêk ka herh lio ah, ka sin tu ah na ratmi cu a si kho lai lo,” tiah el a rak timh.

¹⁵ Asinain Jesuh nih, “Atu ah rem ti ko, dinnâk vialte zulh dih hi kan caah â tlakmi a si,” tiah a ti i Johan nih rem a ti.

¹⁶ Baptisma a in dih in, Jesuh cu ti chungin a hung chuah le cângkâ, ngaihmanh a caah van â ong, Pathian Thlarau ṭhuro bangin a rung ṭum i a cungah â fut kha a hmuh.

¹⁷ Cun ngaihmanh, van in aw a rung chuak i, “Hihi ka Fapa dawt, ka lawmh tukmi a si,” tiah a ti.