MATTHAI 25 - Laibaibal Thiang (BSI)

¹ Cuticun vanbawi pennâk cu ngaknu thiang pahra, mo ngeitu don awkah a chuakmi hna he tahchunh a si lai.

² Anmah lakah panga an fim i panga an hrut.

³ A hrutmi nih meiin an i put lioah zinân an i put lo,

⁴ asinain a fimmi nih cun meiin le zinân a thawl in an i ken.

⁵ Mo ngeitu cu a rauh caah an dihlakin an ngu i an i hngilh.

⁶ Cun zan `imah, Mongeitu a ra cang, don awkah rak chuah cang u, tiah au thawng a um.

⁷ Cuticun ngaknu thiang hna cu an tho i an meiin an van.

⁸ A hrutmi hna nih a fimmi hna sinah, nan zinân kha kan pe ve u, zeitintiah kan meiin a mit cang lai hi, tiah an ti.

⁹ Asinain a fimmi hna nih, kan ca le nan caah a za lai lo, a zuartu sinah va kal ulaw, va caw u, tiah an leh hna.

¹⁰ Cun caw ding i an kal lioah, Mongeitu cu a rak phân, â tim cangmi hna he rawl danghnâk hmunah an lut i innkâ an khar.

¹¹ Cuhnuah ngaknu thiang a dang zong an rak phân ve, kapu, kapu, rak kan on piak ve ko, tiah an ti.

¹² Asinain anih nih, “Biataktein kan chimh hna, kan hngal hna lo,” tiah a leh hna.

¹³ Cucaah, Mi Fapa ratnâk a ni le a suimilam cân nan hngalh lo caah, ralring tein um u, tiah a ti hna.

¹⁴ Zeitintiah vanbawi pennâk cu, ram hla piah khual tlawn â tim i sin um hna sinah a chawva a chiah tami bantuk a si.

¹⁵ Sinum pakhat sinah talen nga a pêk, sinum pa khat sinah talen hnih a pêk i a dang pakhat sinah talen khat, an ti khawh tawk cio in a pêk hna i khual cu a tlawng.

¹⁶ Cuhnuah talen nga pêkmi nih a karhter i a dang talen nga a hmuh.

¹⁷ Cubantuk in talen hnih a pêkmi zong nih a dang talen hnih a hmuh ve.

¹⁸ Asinain talen khat pêkmi nih a kal i vawlei a cawh i a bawipa phaisa kha a thuh.

¹⁹ A rauh hnu ah sinum hna anpu cu a rak phân i an chawva kong kha a ruahpi hna.

²⁰ Talen nga a pêkmi cu a dang talen nga a hmuhmi he a ra i kapu talen nga naka pekmi kha a dang ka hmuh, tiah a ti.

²¹ Apu nih, zumhawktlâk le sinum ṭha na si, na ti ṭha ngaingai, tlawmte cung i zumh awk na tlâk caah tampi cungah kan umter lai, napu lawmhnâk chungah lut tuah, tiah a ti.

²² Cun talen hnih pêkmi zong a ra i kapu talen hnih naka pêkmi kha a dang talen hnih ka hmuh chap ê, tiah a ti.

²³ Apu nih a sinah, zumh awktlâk sinum ṭha na si, tlawm te cung i zumhtlâk na si caah tampi cungah kan umter lai, napu lawmhnâk chungah lut tuah, tiah a ti.

²⁴ Cun talen khat pêkmi zong cu a ra ve i ‘Kapu, mi khepkha na si kha ka hngalh, na tuh lomi zong na zûn i na vorh lo nâkah na ah tawn.

²⁵ Cucaah kan ṭih i na talen kha vulei ah ka thuh, zohhmanh nata kha amah ning tein na hmuh ṭhân ko hih, tiah a ti.

²⁶ Apu nih, sinum sual le thathu pa, ka tuh lonâkah ka zûn i ka vorh lonâkah ka ah ti kha na hngal maw?

²⁷ Cutiasiah ka phaisa kha Bân ah na rak chiah ko lo, ka rak kir ah a karh he ka hmu hnga lo maw?

²⁸ Cucaah talen khat kha lakpiak ulaw talen hra a ngeitu kha chap u.

²⁹ Zeitintiah a ngeimi pauh ngeih chin chin awkah an chap chih lai i a ngei lomi pauh a ngeihchun hmanh an lâk piak lai.

³⁰ Cun kha sinum santlai lo kha khualeng mui lakah hlawnh u. Cuka ah ṭah le hacang rialnâk a um lai, tiah a ti.

³¹ Mi Fapa hi a sunparnâk in â thawmh i vanmi thiang vialte hna he arat tikah a sunparnâk ṭhutdanh ah a ṭhu lai.

³² A hmaiah miphun vialte an i pum lai i tuukhal nih meheh lakah a tuu hna a ṭhen tawn bangin, a ṭhen hna lai.

³³ Tuu kha orh leiah a chiah hna lai i meheh kha keh leiah a chiah hna lai.

³⁴ “Cuticun Siangpahrang nih a orh leimi hna sinah, ‘Ka Pa, thluachuahmi hna, ra u law, vawlei ser lio i nan ca i timhmi pennâk cu co u:

³⁵ Zeitintiah ka rawl a ṭamah eiawk nan ka pêk, ka ti a hâl tikah dinawk nan ka pêk, khual ka si ah nan inn ah nan ka tlunter,

³⁶ taklawng ka um ah puan nan ka aihter, ka zawt tikah, nan ka zohkhenh i thong ka tlâkah nan ka veh,’ tiah a ti lai.

³⁷ Miding hna nih, ‘Bawipa, zeitikahdah rawlṭam in kan in hmuh i rawl kan in pêk? Tihâl in na um lio ah ti kan in pêk?

³⁸ Zeitikahdah khual i kan in hmuh i kan inah kan in tlunter? Tak lawngin na um lio ah puan kan in aihter?

³⁹ Zeitikahdah, dam loin siseh, thong tla in siseh na um lioah kan in zohkhenh i kan in len? tiah an leh lai.

⁴⁰ Siangpahrang nih, ‘Biataktein kan chimh hna, hi ka unau hna lak i a hmebik cungah nan tuahmi hi keimah cungah a tuahmi nan si, tiah a leh hna lai.

⁴¹ Cutikah, a kehlei mi hna sin zongah, ‘Chiatserh mi hna, zungzal mei, khuachia le a zultu hna ca i timhlamh miah ka kaltâk ko u;

⁴² Ka rawl a ṭamah ei awk nan ka pe lo; ka ti a halah din awk nan ka pe lo;

⁴³ khual ka si lioah nan inn ah nan ka tlunter lo, taklawng ka si lioah puan nan ka aih lo, ka zawt le thong ka tlâkah nan ka conghrâm lo,’ a ti hna lai.

⁴⁴ Annih nih, ‘Bawipa zeitikahdah, rawlṭam in siseh, tihal in siseh, khual in siseh, taklawng in siseh, dam lo in siseh, thong tla in siseh kan in hmuh i narian ṭuanlo in kan um bal?’ tiah an ti lai.

⁴⁵ Anih nih, ‘Biataktein kan chimh hna, hi mi hna lak i a hme bik cungah nan tuah lomi hi, ka cungah a tuah lomi bantuk nan si,’ tiah a leh hna lai.

⁴⁶ Cu hna cu zungzal hrem nâkah an kal lai i miding hna cu zungzal nunnâk ah an kal lai,” tiah a ti hna.