MATTHAI 16 - Laibaibal Thiang (BSI)

¹ Farasih le Sadusih kha an ra i Amah hniksak delnâk ah vanin hmelchunhnâk hmuhsak dingin an rak nawl.

² Anih nih, “Zanlei ah vankam a sen ahcun khua ṭhat â tim cang a si lai,” nan ti,

³ cun zingkâ ah vankam a sen i khua a dawm caah, khua a chia lai, tiah nan ti. Midepde hna! Khua cân umtu ning cu nan hngalh nain atu cân hmelchunhnâk tu cu nan hngal kho lo.

⁴ Tuchan misual le ṭangdang a kaimi hna nih hmelchunhnâk lawng nan ngiat. Jonah hmelchunhnâk dah ti lo, hmelchunhnâk dang zeihmanh pêk a si lai lo,” tiah a ti hna. Cun a chuahtâk hna i lo diam a kal.

⁵ A lamkaltu nih varal an phâk tikah changreu ken an philh.

⁶ Jesuh nih, “Farasih le Sadusih hna thilnu lakah i ralring u law fimhring tein um u,” tiah a ti hna.

⁷ Annih nih, changreu kan i kenlo ruangah a si kho ko, tiah an ruah.

⁸ Jesuh nih cucu a hngalh i, “Maw zumhnâk a tlawmmi hna zeiruangahdah changreu nan ngeih lo ruangah nan buai?”

⁹ Atu tiangin nan hngal thiam rih lo maw? Mi thong nga changreu panga in hrai lio ah sei zeizat dah nan ruh kha nan hngal ti lo maw?

¹⁰ Mi thongli changreu pasarih le a hleimi sei zeizatdah nan ruh timi zong kha?

¹¹ Changreu kong ka chim lo tiah zeicadah nan hngalh khawh lo. Farasih le Sadusih hna thilnu lakah i ralrinnâk bia a si kha,” tiah a ti hna.

¹² Cucângkâ changreu thilnu kong i ralrin peknâk si loin Farasih le Sadusih cawnpiaknâk chungin ralrin pekmi a si ti kha an hun hngalh cang.

¹³ Jesuh nih Sisaria peng Filipi khuapawng a phâk tikah a lamkaltu hna sinah, “Mi nih, a ho an ka ti dah? tiah a hal hna.

¹⁴ Annih nih, “Cheukhat nih, Baptisma petu Johan an in ti, cheukhat nih Elijah an in ti, cheukhat nih, Jeremiah maw, profet pakhat khat a si lai, an in ti,” tiah an ti.

¹⁵ Anih nih, “Nannih nih tah aho nan ka ti dah?” tiah a ti hna.

¹⁶ Simon Peter nih, “Krih Pathian nung Fapa na si,” tiah a ti.

¹⁷ Jesuh nih a sinah, Jonah fapa Simon, mithluachuak na si, titsa le thisen nih an hngalhtermi a si lo, van i ka Pa nih an hngalhtermi na si.

¹⁸ Cun nang cu, Peter na si tiah kan chimh, hi lung cungah hin ka kawhhran ka dirh lai i Mithi kutkâ hmanh nih an ngamh lai lo.

¹⁹ Cun vanbawi pennâk tawh kha kan pêk lai i vulei cungah na ṭemmi cu vanah ṭem an si lai, vulei cungah na phoihmi cu vanah phoih an si ve lai,” tiah a ti.

²⁰ Krih a sinâk kong ahohmanh chim lo dingin lamkaltu kha nawl a pêk hna.

²¹ Cu cân thawkin Jesuh nih Jerusalem khua i an kal lainâk le, tlangbawi upa hna le, nawlbia cawnpiaktu hna sinin thil tampi a temtuar lainâk ding le, thah i a um lainâk le, ni thum ni ah thawhter i a um te lainâk kong lamkaltu kha chimh hram a thawk hna.

²² Peter nih a dang tein â kalpi i, “Bawipa, cuthil hna cu na cungah tlung hrimhrim hlah seh,” tiah a sîk.

²³ Asinain Peter kha a mer hnawh i “Satan, ka hnu ah kal! Ka caah tluknâk na si, Pathian thil kha ruat loin minung thil kha na ruah caah a si,” tiah a ti.

²⁴ Cuhnuah Jesuh nih a zultu hna sinah, “Zulh aka duhmi pauh nih, amah i hlawtin, a vailam putin ka zul seh.

²⁵ Zeitintiah a nunnâk himter a duhmi pauh nih an sung lai, Keimah ruangah a nunnâk a sungmi pauh nih an himter lai.

²⁶ Zeitintiah mi pakhat khat nih vawlei hi a dih lakin ngei sehlaw, a nunnâk a sungh ahcun san a tlai hnga maw? Asiloah mi nih a nunnâk caah zeidah a pêk kun hnga?

²⁷ Zeitintiah Mi Fapa hi a vanmi hna le a Pa sunparnâk he i thuamin a ra ṭhân lai, cu cân ah cun an tuahmi he â tlakin ṭuanman pêk an si te lai.

²⁸ Biataktein kan chimh hna, hika i a dirmi hna lakah hin, Mi Fapa a pennâk i a rat an hmuh hlan lo thihnâk a tep lo ding an um,” tiah a ti hna.