MATTHAI 14 - Laibaibal Thiang (BSI)

¹ Cu cân ah Herod siangpahrang nih Jesuh kong kha a rak theih i

² a sinum hna sinah, “Cupa cu Baptisma petu Johan a si cu ta, thih nâkin a thoṭhân a si cu ta, cucaah cubantuk khuaruahhar tuahkhawhnâk nih amah ah rian a ṭuan cang” tiah a ti.

³ Zeitintiah Herod nih a nau philip nupi Herodi ruangah Johan kha a tlaih i ṭem buin thongah a thlak.

⁴ Johan nih a sinah, “Nupi i na ngeih hi phungning a si lo, tiah a rak ti ruangah a si.

⁵ Johan cu thah a duh nain mizapi nih profet i anruah caah mizapi kha a ṭih hna.

⁶ Asinain Herod chuah ni a phâk tikah, Herodi fanu kha an hmaiah an lâmter i cu nih cun Herod lung a lawmhter.

⁷ Cucaah a halmi pauh pe dingin a sinah chiatserh in bia â kam.

⁸ Anu nih ruahnâk a cheuh bantukin hika ah Baptisma petu Johan lu khengin ka pe, tiah a ti.

⁹ Siangpahrang cu a ngaih a chia, asinain, a biakam ciami le rawl a ei pimi hna ruangah pe dingin nawl a pêk hna.

¹⁰ Mi a thlah hna i thong chung i Johan lu cu a tanter hna.

¹¹ A lu cu khengin an rak put i ngaknu kha an pêk i a nu sinah a kalpi.

¹² A zultu hna nih a ruak kha la in an phum. Jesuh zong an va chimh.

¹³ Cu bia cu Jesuh nih a theih tikah, cu hmun in hnathiannâk hmunah tilawngin a kal. Asinain mizapi nih an theih tikah, khua chungin ke in a sinah an kal.

¹⁴ Tikam a phâk tikah mibu tam nawn a hmuh hna, a zângfah ngai ngai hna i an zawtnâk kha a damter hna.

¹⁵ Zanlei a si tikah a lamkaltu kha a sinah an ra i, “Hihi ramking a si, khua le a hnu tuk cang. Khua ah an kal i ei awk an i cawk nâkhnga mizapi hi ṭinter cang hna,” tiah an ti.

¹⁶ Jesuh nih, “An kal a herh lai lo, nanmah nih ei awk pe hna u,” tiah a ti hna.

¹⁷ Annih nih, “Hikâ ah changreu panga le nga pahnih lawng kan ngei,” tiah an ti.

¹⁸ Anih nih, “Ka sinah ratpi u,” tiah a ti.

¹⁹ Cuticun mizapi kha ram cungah ṭhu dingin nawl a pêk hna. Changreu panga le nga pahnih kha a lâk i vanlei zoh in thluachuah a pêk hnu ah, changreu kha a cheu i lamkaltu sinah a pêk. Cun lamkaltu hna nih mizapi sinah an pêk.

²⁰ An dih lakin khim tein an ei i a hleimi zong sei hleihnih tiangin an char.

²¹ A eitu hna cu nu le ngakchia relchih lo in mi 5000 hrawng an si.

²² Mizapi kha a ṭirter hna lio ah, Jesuh nih va ral i kal hmasa dingin a lamkaltu kha tilawng ah a citter cawlh hna.

²³ Mizapi an ṭin hnu ah, thlacam dingin tlangah a kai. Zanlei a si cang i Amah lawng in a um.

²⁴ Tilawng tu cu rili lai fangah a um i thli nih ralden in a nam lengmang i ti let zong nih a thenh lengmang hna.

²⁵ Khuadei laiah Jesuh cu anmah lei panh in ke in ti cungah a kal.

²⁶ Lamkaltu hna nih ti cungah ke i a kal kha an hmuh tikah an lau i, “Muithla a si” tiah thinphang ngaiin an ai.

²⁷ Asinain Jesuh nih a hun chawnh zau hna i, “Hnangam tein um u; Keimah dahkaw ka si; ṭih hlah u,” tiah a ti hna.

²⁸ Peter nih, “Bawipa, nangmah na si ahcun ti cungin na sinah ra dingin nawl ka pe,” tiah a ti.

²⁹ Anih nih, “Ra ngat,” tiah a ti. Peter cu tilawng in a chuak i Jesuh lei panh in ti cungin kein a kal.

³⁰ Asinain thlitu a hrang lenmi kha a hmuh tikah a ṭih i ti chungah pil hram â thawk, “Bawipa, ka khamh tuah,” tiah a au.

³¹ Chikkhatteah Jesuh nih a kut in a tlaih i, “Aw zumhnâk tlawmpa, zeiruangahdah lungawṭawm in na um?” tiah a ti.

³² Tilawng chung an phâk tikah thlitu zong a dai ṭhân.

³³ Cuticun tilawng chungah a ummi hna cu an ra i an biak; “Pathian Fapa na si taktak ko,” an ti.

³⁴ Varal an kai tikah, Genesaret ram kha an phân.

³⁵ Cuka mi hna nih Amah a si ti kha an hngalh tikah, kiangkap ram vialte ah mi an thlah i mizaw vialte kha an ratpi hna.

³⁶ A puanki an tongh khawhnâk tiangin an nawl i a tawngtu vialte cu tlamtling tein an dam dih.