MATTHAI 12 - Laibaibal Thiang (BSI)

¹ Cu cân ah Jesuh cu Sabbath niah changvut hmun ah a kal i a lamkaltu hna nih changvut kha an khiah i an ei.

² Farasih hna nih cucu an hmuh i a sinah, “Zohhmanh, na lamkaltu hna nih Sabbath niah a thiang lomi an tuah,” tiah an ti.

³ Anih nih, “David le a hawi le an rawl a ṭam lio ah an tuahmi kha nan rel bal lo maw?

⁴ Pathian inn ah a luh i amah le a hawi le nih a thiang lomi, tlângbawi hna ca lawng i a thiangmi an rak ei kha, ”tiah a ti hna.

⁵ Asiah, Sabbath ni i ṭempal chungah a ummi tlângbawi hna nih Sabbath an buar zongah an ngaihthiam ko hna, timi hi nan rel bal lo maw?

⁶ Zeiasihmanhah, ṭempal nâk i a ngan deuhmi hika ah a um, tiah kan chimh hna.

⁷ Raithawinâk si loin zângfahnâk ka duh, timi sullam hi rak hngal ulaw thiam a comi thiamlo nan coter hnga lo.

⁸ Zeitintiah Mi Fapa hi Sabbath Bawi zong a si,” tiah a ti.

⁹ Cu hmun a chuahtâk hnuah an sinagog ah a lut.

¹⁰ Zohhmanh, mi pakhat kut zengmi a rak um, sual an puh khawh nâkhnga, Jesuh sinah, “Sabbath ni ah damter a thiang maw?” tiah an hal.

¹¹ Anih nih, “Nan lakah tuu pakhat ngei in sabbath ni ah khor chungah tla sehlaw, a chuah lomi nan um hnga maw?”

¹² Tuu pakhat nâkin minung pakhat cu zeitlukindah a sunlawi deuh! Cucaah sabbath niah ṭhatnâk tuah a thiang ko,” tiah a ti hna.

¹³ Cupa sinah, “Nakut samh tuah,” tiah a ti. A hun samh i khat te lei kut bantukin a dam cawlh.

¹⁴ Farasih hna cu an chuak i Amah an thah khawh nâkhnga khua an khâng.

¹⁵ Jesuh nih cucu a theih tikah cu hmun cu a chuahtâk. Mi tampi nih an zulh i an dih lakin a rak damter hna.

¹⁶ Cuticun akong thanh lo dingin ralrin a pêk hna.

¹⁷ Profet Isaiah nih a rak chimmi:

¹⁸ “Zohhmanh, ka sal, ka thimmi, ka duhmi le, kâ lawmhnâk bik! A chungah ka Thlarau ka chiah lai i Gentel mi hna sinah diknâk a phuan lai.

¹⁹ A el hna lai lo i a au khuang fawn lai lo. Zalam zongah a aw ahohmanh nih an thei lai lo.

²⁰ Tei dingah biaceihnâk a chuahter hlan pauh a rawpmi hluang a kiahter lai lo i la khu hmanh a hmit lai lo.

²¹ Cun Gentel mi nih a min an i bochan lai,” timi a tlin nâkhnga caah a si.

²² Cuhnuah khuachia tlaihmi mitcaw le a holh kho lomi pakhat an ratpi i anih nih a rak damter. A holh kho i khua zong a hmu.

²³ Mizapi nih mak an ti ngaingai, “Hipa hi David Fapa cu a si kho hnga lo maw?” tiah an ti.

²⁴ Farasih hna nih cucu an theih tikah, “Hipa nih hin khuachia bawi Belzebul thawng lo cun khuachia kha a ṭhawl kho lai lo,” tiah an ti.

²⁵ Jesuh nih an ruahnâk kha a rak hngalh i an sinah, khuazei ram pauh mah le mah â dohmi an lotlau tawn. Khua le chungkhar zong â dohmi a dir kho bal lo.

²⁶ Satan nih Satan a ṭhawl ahcun amah le amah â doh a si hnga lo maw? Zeitindah a pennâk cu a dir khawh lai?

²⁷ Kei nih Belzebul ruang i khua chia ka ṭhawl ahcun, nanfa le hna nih ta, ahothawngindah an rak ṭhawl? Cucaah anmah kha nanmah biaceihtu ding an si te lai.

²⁸ Asinain Kei nih Pathian Thlarau thawngin khuachia kha ka ṭhawl ahcun Pathian pennâk nan sinah a phân cang, tinâk a si.

²⁹ Miṭhawng cu ṭembawh a si hmasat lo ahcun, zeitindah a inn chungah lut in a thil cu an lâkpiak khawh lai? An ṭem hnu lawngah a inn chung thil kha an lâkpiak lai.

³⁰ Keimah lei i a ṭang lomi pauh cu aka dohtu a si i aka zunpi lomi pauh cu a ṭhektu an si.

³¹ Cucaah kan chimh hna, minung sualnâk phunkip le (Pathian) an cawhdehnâk cu ngaihthiam an si ko lai, Thlarau ralchanh in a cawhdehtu cu ngaihthiam an si lai lo.

³² Mizei pauh Mi Fapa ralchanh in bia a chimtu cu ngaihthiam an si ko lai, asinain Thlarau ralchanh in bia a chimtu cu, atu chan ah siseh, hmailei chan ah siseh, ngaihthiam an si lai lo.

³³ Thingṭha cu a thei a ṭha, nan ti lo le, thingchia cu a thei zong a chia ti lawlaw u, thing cu a theiin hngalh a si.

³⁴ Rul fale hna, misual nan si buin biaṭha nan chim kho hnga maw? Lungthin i a liammi kha kâ nih a chim tawn.

³⁵ Miṭha nih cun a ro bawm chung i thilṭha a chuahter tawn i mi ṭhalo nih â khawnmi thilṭha lo kha a chuahter tawn.

³⁶ Kan chimh hna, “Mi nih an chimmi bia hna hi biaceih niah an chimfian ṭhân a herh te lai.

³⁷ Zeitintiah na bia nih thiam an coter lai i na bia lila nih thiamlo an coter lai.

³⁸ Cuhnuah nawlbiacawnpiaktu le Farasih hna nih a sinah, “Cawnpiaktu, na sinin hmelchunhnâk hmuh kan duh ko,” tiah an ti.

³⁹ Anih nih, “Tuchan misual ṭangdang a kaimi hna nih hmelchunhnâk lawng hmuh an duh. Asinain Jona hmelchunhnâk dah tilo cu hmelchunnâk dang zeihmanh pêk an si lai lo.

⁴⁰ Zeitintiah Jona cu ngapi paw chungah nithum le zanthum a um bantuk khan, Mi Fapa zong hi nithum le zanthum lei chungah a um ve lai.

⁴¹ Nineveh khua mi hna kha biaceih ni ah an tho lai i tuchan mi hna hi sual an phawt hna lai. Zeicatiah annih cu Jonah phungchimmi ruangah an i ngaihchih, ngaihmanh u, Jonah nâk i a ngan deuhmi hikâ ah a um.

⁴² Thlanglei siangpahrang nu hmanh kha biaceih ni ah tuchan mi hna sinah a tho ve lai i thiamlo a coter hna lai; zeitintiah anih cu Solomon fimnâk ngai dingin vanhram dengin a ra, ngaihmanh u, Solomon nâk i a ngan deuhmi hikâ ah a um.

⁴³ “Thlarau thur pakhat cu mi chungin a chuah hnu ah, ti um lo nâkah dinhnâk a kawl i a hmu kho lo.

⁴⁴ Cuticun ka chuahtâkmi inn ah khan ka kirṭhan lai, tiah a ti. A vakir tikah lawng hir hiar le, thiangte i phiah le thenh in a va hmuh.

⁴⁵ Ava kal i amah nâkin a sual deuhmi thlarau pasarih ava sawm hna, an lut i an um hnawh. Cu minung nunning cu a hlan nâkin a let tam piin a chia kha deuh. Cubantukin hi chanthar misual hna cungah hin a um te lai,” tiah a ti hna.

⁴⁶ Mizapi sin i bia a chim lio ah, ngaihmanh, anu le a nau le cu Amah chawnh duh ah lêngah an dir.

⁴⁷ Mi pakhat nih a sinah, “Zohhmanh, nanu le na nau le Nangmah chawnh duh ah lêngah an dir ko,” tiah a chimh.

⁴⁸ Anih nih, “Kanu cu ahodah a si? Kanau le zong cu ahodah an si? tiah a leh.

⁴⁹ Cun a zultuhna lei ah a kut a thlir i, “Zohhmanh u, kanu le ka nau le hi!

⁵⁰ Zeitintiah mizei pauh van i ka Pa duhnâk a tuahtu pauh cu ka unau pa, kafar le kanu an si,” tiah a ti.