MATTHAI 11 - Laibaibal Thiang (BSI)

¹ Cun hitihin a si, Jesuh nih zultu hleihnih nawl a pêk dih hna hnu ah, anmah khua cio i cawnpiak le phungchim awkah cu hmun cu a chuahtâk.

² Johan nih thong chungin Krih rianṭuannâk thawng a theih tikah, a zultu pahnih a thlah hna i,

³ A sinah, “A ra dingmi cu na si maw, midang dah kan hngah rih lai? tiah an hal.

⁴ Jesuh nih, “Va kal ulaw, nan hmuhmi le nan theihmi hna hi Johan cu va chim u;

⁵ Mitcaw mi nih khua an hmuh, kei beimi ke in an kal, thinghmuimi an thiang, hnachetmi nih thawng an theih, mithi hna thawhter an si i sifak hna nih thawngṭha an theih.

⁶ Keimah kong i a lung a hring lomi cu mithluachuak an si;” tiah a leh hna.

⁷ An kal hnu ah, Jesuh nih Johan kong kha mizapi sinah a chim, “Zeizohahdah ramcar ah nan kal? Thli nih a hninhmi hluangkung zoh ah maw?

⁸ Zeizohsetahdah nan kal kha? Â dawhmi puan in â ṭamhmi zoh ah maw? A ngai ngai ti ahcun, puan dawh â aihmi cu siangpahrang in ah pei an um tawn cu.

⁹ Asiah zeizohsetahdah nan kal? Profet zoh ah maw? A si ko khah. Kan chim hna, Profet nâk hmanh in a ngan deuh.

¹⁰ Zeitintiah, “Zohhmanh ka lamkal na hmaiah ka thlah. Amah nih na hmaiah na lam a remh lai,” tiah a kong ṭial a si.

¹¹ Biataktein kan chimh hna, nu hrin lakah Baptisma petu Johan nâk ngan an um rih lo, asinain vanbawi pennâk i a hme bik zong amah nâkin an ngan deuh.

¹² Cun baptisma petu Johan cân in atu tiang vanbawi pennâk nih zângen in tuknâk a ton tawn, cun zângen a hmangmi hna nih hranhrâm loin an lâk tawn.

¹³ Zeitintiah Profet vialte le nawlbia nih Johan tiang kha an rak phuan.

¹⁴ Nan cohlan duh ahcun, hihi a ra laimi Elijah cu a si.

¹⁵ Theihnâk ding i hna a ngeimi nih thei ko hna seh.

¹⁶ Asinain atu chanthar mi hna hi zeihedah kan tahchunh hna hnga? Market ah a ṭhumi ngakchia â chawn lengmang mi hna,

¹⁷ “Thanglawi kan tum i nan lâm duh lo. Kan in tuarpi hna i nan ngaih a chia fawn lo,” timi bantuk nan si.

¹⁸ Zeitintiah Johan cu a ra i a ei in a ding lo, khua chia tuahmi nan ti.

¹⁹ Mi fapa a ra i a ei, a ding, zohhmanh u, zuram le pawkau pa, ngunkhuai khawltu le misual hna hawikawm nan ti. Asinain fimnâk cu a fale nih thiam an coter ko.

²⁰ Cuticun an i ngaihchih lo ruangah khuaruahhar tambik a tuahnâk khualipi kha a sîk hna.

²¹ Korazin, a poi tuk ê, Bethsaida, a poi tuk ê! Zeitintiah na sin i tuahmi khuaruahhar hna kha Tair le Sidon khua ah tuah hei si sehlaw, buri puan aih le lei dipah ṭhu in tuanah an i ngaihchih diam ko hnga.

²² Hihi kan chimh hna, biaceih ni ah nan tuarding cu, Tair le Sidon khua tuar ding nâkin a zualhma deuh lai.

²³ Nang Kepernaum van tawngin cawisan sihmanhsehlaw, mithi khua ah hlawnh na si te lai, na chung i tuahmi khuaruahhar thil hna kha Sodom khua ah tuah hei si sehlaw, atu tiangin a um rih ko hnga.

²⁴ Sihmanhsehlaw kan chimh, biaceih ni ah cun Sodom ram tuarmi nâk hmanh in na tuar ding cu a zualhma deuh lai.

²⁵ Cu cân ah Jesuh nih, “Maw, ka Pa, lei le van Bawipa, Nangmah nih mifim le mithiam hna lakah hi bia hi na thuh i ngakchia sem sin tu ah na phuan caah lawmhnâk bia kan chimh.

²⁶ Asi, ka Pa, cubantuk tuah cu na hmaiah a ṭhami a si.

²⁷ Ka Pa nih thil vialte ka kut ah a chiah cang, Pa dah ti lo cun ahohmanh nih Fa hi an hngal lo. Pa zong cu Fa le an sin i Fa nih a hngalhter duhmi dah ti lo cun ahohmanh nih an hngal kho lo.

²⁸ Nannih a bami le thilrit a phormi vialte hna, kasin ah ra ulaw, dinhnâk kan pêk hna lai.

²⁹ Ka hngawngkual i banh ulaw, ka sin in cawng u. Lungthin a nêmmi le toidormi ka si. Cuticun nan thlarau nih dinhnâk a hmuh lai.

³⁰ Zeitintiah ka hngawngkual banh cu a nuam i ka thil zong a zâng” tiah a ti.