LUKA 9 - Laibaibal Thiang (BSI)

¹ Cuhnuah a lamkaltu hleihnih kha a kawh hna i khuachia vialte cung i nawlngeihnâk le ṭhawnnâk le mizaw damter khawhnâk a pek hna i

² Pathian pennâk thawngṭha chim ding le mizaw damter dingin a thlah hna.

³ An sinah, “Nan khualtlawnnâk ah zeihmanh i ken hlah u, ṭhiangṭhunh siseh, zal siseh, chuncaw siseh, phaisa siseh zeihmanh i ken hlah u, angkizong pahnih ngei hlah u.

⁴ Nan tlunnâk innah umpeng u law, cu hmun in nan chuak ṭhân lai.

⁵ Cun an cohlang duh lotu hna cu, cu khua nan chuahtâk lai ah, an diklo ning hngalhternâk caah nan ke i leidip kha nan thin lai,” tiah a ti.

⁶ Cuticun an kal i khua kip kha an ṭol, ka kip ah thawngṭha an chim i mi kha an damter hna.

⁷ Herod siangpahrang nih an tuahmi thil vialte kha a rak theih i a lungthin a buai, zeicatiah cheukhat nih Johan kha thihnâk in a tho ṭhân, tiah an ti.

⁸ Cheukhat nih Elijah â lang a si lai tiah an ti, cheukhat nih hlan lio profet hna lakah pakhat khat a tho ṭhân a si lai, tiah an ti.

⁹ Herod nih, Johan kha alu ka tan cang si kaw, hi tluk thawngpang ka theih ṭhanmi hi ahodah a si hnga? tiah a ti. Cuticun Amah cu hmuh a timh.

¹⁰ Lamkaltu kha an rak kir ṭhân i a sinah an tuahmi thil kha an chimh. Annih cu hnathiannâk hmun Bethsaida khua peng chungah a kalpi hna.

¹¹ Sihmanhsehlaw mizapi nih an theih i an zulh. Anih nih a rak cohlan hna i Pathian Pennâk thawngṭha a chimh hna i damter a herhmi zong a damter hna.

¹² Zanlei nitlâk laiah hleihnih kha a sinah an ra, kan pawngkam khua le lo hna ah kal in, tlun inn le eiawk i kawl awkah ṭinter hna, zeicatiah hmun king i a ummi kan si,” tiah an ti.

¹³ Anih nih, “Nanmah nih eiawk pe hna u,” tiah a ti. Annih nih, “Hi vialte minung ei awk cu kan va cawk dah tilo ah, changreu panga le nga pahnih dah tilo cu zeihmanh kan ngei lo,” tiah an ti.

¹⁴ Zeitintiah patling lawngte hmanh 5000 hrawng an si. Cun a lamkaltu hna sinah, “Mi 50 lengmang in ṭhutter hna u,” tiah a ti.

¹⁵ A chim bangin an tuah i an ṭhutter hna.

¹⁶ Cuhnuah changreu panga le nga pahnih kha a lâk i vanlei zoh in thluachuah a pêk, a cheu i mizapi sinah phawt dingin lamkaltu sinah a pêk.

¹⁷ An dihlak in khim tein an ei i an ei hlei kha sei hleihnih khat in an ruh.

¹⁸ Cun hitihin a si, Amah lawng te thla a cam lio ah, lamkaltu nih an rak fonh i anih nih, “Mi nih aho an ka ti dah?” tiah a hal hna.

¹⁹ Annih nih, “Baptisma petu Johan a si, an in ti, a cheu nih Elijah a si, an in ti, a cheu nih hlan lio profet pakhat khat a tho`hânmi a si, tiah an leh.

²⁰ Anih nih an sinah, “Nannih ta mi zei nan ka ti dah?” tiah a ti. Peter nih, “Pathian Krih na si,” tiah a leh.

²¹ Cubia cu ahohmanh chim lo dingin nawl a pêk hna.

²² Mi Fapa nih thil tampi a tuar lai upa hna le tlangbawi hna le nawlbiacawnpiaktu hna nih an hlawt lai, an thah lai i nithum ni ah thawhter a si lai,” tiah a ti.

²³ Cun an dihlak sinah, “Mi zei pauh zulh aka duhmi cu amah i hlawtin ni chiarte a vailam i put in ka zul seh.

²⁴ Zeitintiah a nunnâk humhâk a duhmi nih a hloh lai i keimah ruang i a nunnâk a hlohmi pauh nih a nunnâk a khamh lai.

²⁵ Zeitintiah mi nih vawlei hi a dihlak in ngei sehlaw, amah le amah â hrawh i a loh ahcun zeidah a hmuh kun lai?

²⁶ Zeitintiah keimah le ka bia a zahpimi pauh cu, Mi Fapa nih a sunparnâk le a Pa sunparnâk le a van mithiang hna sunparnâk he a rat tikah a zahpi ve lai.

²⁷ Biataktein kan chimh hna, hika i a dirmi lakah a cheu hi, Pathian pennâk an hmuh hlan lo, a thi lo dingmi an um,” tiah a ti.

²⁸ Cubia a chim hnu niriat hrawngah khin Jesuh nih Peter le Johan le Jeim a hruai hna i thlacam dingin tlângah an kai.

²⁹ Thla a cam lio ah a muihmai â thleng i a hnipuan kha a râng i a tleu.

³⁰ Cun zohhmanh, mi pahnih nih bia an ruah, cu hna cu Moses le Elijah an si,

³¹ sunglawi ngaiin an i langh i Jerusalem i a thihnâk nih a tlinter hngami kong kha an chim.

³² Peter le a hawi le tu cu an i hngilh, an hun i hlauh tikah a sunparnâk le a pawng i mi pahnih kha an hmuh hna.

³³ Cun hitihin a si, cu hna nih Jesuh an kaltâk lioah Peter nih Jesuh sinah, “Cawnpiaktu, hika um hi kan caah a ṭha; thlâm pathum in ka sak lai, Na ca pakhat, Moses ca pakhat, Elijah ca pakhat, tiah a ti. A chimmi kha zei a si ti zong a thei set sai lo.

³⁴ Cubiacu a chim lio ah mimei a rak zâm i annih cu a phenh hna. Minmei i an luh lio ah an ṭih ngaingai.

³⁵ Minmei chungin aw a rak chuak i, “Hihi ka dawtmi ka Fapa a si. Amah bia ngai u,” tiah a ti.

³⁶ Aw thawng a dih cun Jesuh lawng an hmuh. Asinain an thil hmuhmi kongah, dai tein an umpi i cu cân ah mizei sin hmanhah an chim lo.

³⁷ A thaizingah tlângcungin an ṭum i mi tampi nih Amah kha an rak don.

³⁸ Chikkhatte ah mizapi chungin mi pakhat a rak au i, “Cawnpiaktu, ka fapa rak zoh dingin kan nawl, ka fapa ngeihchun a si.

³⁹ Ngaihmanh, thlarau nih a tlaih tawn i hmakhat te ah a ai tawn, a cilphuan kha tla lakin a therthluahmah i duk cercur in a um hnu ceu ah a kaltâk tawn.

⁴⁰ Na lamkaltu hna sinah ṭhawl dingin ka nawl hna i an ṭhawl kho fawn lo,” tiah a ti.

⁴¹ Jesuh nih, “Maw, ṭhangthar zumhnâk ngeilo le, misual hna, zeicandah nan sinah ka um lai i kan in khawh hna lai? Na fapa cu hika ah ratpi,” tiah a ti.

⁴² A ratpi lio zongah khuachia nih a hlawnh ṭhân, a ther thluahmah, Jesuh nih thlarau thur kha a sîk, ngakchia kha a damter i apa sinah a kalter.

⁴³ Mi vialte nih Pathian lenhngannâk kha mak an ti ngai ngai. Cubangin mikip nih a tuahmi hna mak an ti lio ah Jesuh nih a lamkalttu hna sinah,

⁴⁴ “Hi bia hi nan hna ah pil seh; zeitintiah Mi Fapa hi minung hna kutah tlaihter a si te lai,” tiah a ti.

⁴⁵ Asinain a chimmi sullam cu an theithiam lo, an theihthiam nâkhnga lo â thup i annih nih le a chimmi sullam kha hal an ngamh fawn lo.

⁴⁶ Anlakah ahodah a ngan bik lai timi kongah lamkaltu kha an i el len.

⁴⁷ Jesuh nih an lungin an ruahmi kha a hngalh tikah, ngakchia te a kawh i an hmaiah a dirter i

⁴⁸ an sinah, “Ka min ruang i hi ngakchiate cohlang tu pauh cu keimah cohlangtu an si, keimah cohlangtu pauh cu aka thlahtu cohlangtu an si. Nanlak ah a hme bik hi a ngan bik a si,” tiah a ti.

⁴⁹ Johan nih a leh i, “Cawnpiaktu, mizei maw na min i khuachia a ṭhawltu kan hmuh, Nangmah zul in kan sinah â telmi a si lo caah kan thlauh,” tiah a ti.

⁵⁰ Jesuh nih, “Thlauh ti hlah u, a kan ralchanh lotu cu kanmah lei ṭang an si,” tiah a ti.

⁵¹ Hitihin a si, cunglei i Amah hruai cân a phanh lai ah, Jerusalem lei kal kha biatak tein â tim,

⁵² cun an hmaiah zualko a thlah hna. Cubangin an kal lio ah, Amah caah rak timtuah dingin Samaria khua pakhat ah an lut.

⁵³ Asinain Jerusalem lei lawng a cawnh caah cukhua mi hna nih an cohlang duh lo.

⁵⁴ A lamkaltu Jeim le Johan nih cucu an theih tikah, “Bawipa, Elijah nih a tuah bantuk khan, hi hna kanghtu dingah van in mei tlâkter usih law rem na ti maw?” tiah an ti.

⁵⁵ Asinain a mer hnawh hna i, “Zeibantuk thlarau dah nan co ti zong nan i hngal lo.

⁵⁶ Zeitintiah Mi Fapa hi minung nunnâk rawh tertu ah si loin khamhtu dingah a rami ka si,” tiah a sîk hna. Cuticun khawdang ah an kal.

⁵⁷ Lam i an kal lio ah mi zei maw nih a sinah, “Bawipa nakalnâk kip ah kan zulh lai,” tiah a ti.

⁵⁸ Jesuh nih, “Cinghngia nih kua an ngei i vanva nih bu an ngei, Mi fapa cu luchiahnâk a ngei lo,” tiah a ti.

⁵⁹ Cun midang sinah, “Ka zul” tiah a ti. Asinain anih nih “Bawipa, kapa ka vuiter ta,” tiah a ti.

⁶⁰ Jesuh nih, “Mithi nih an mi thi cu vui hna seh; nangtu nih cun Pathian pennâk kong va thanh deuh,” tiah a ti.

⁶¹ Cun midang zong nih, “Bawipa, kan zulh lai, asinain kan in i a ummi hna he thlahnâk kan tuah ta lai,” tiah a ti.

⁶² Jesuh nih, “Leithuannâk i kut a chia cang ko nain, hnu lei â mermi hna cu Pathian Pennâk minung si awkah an i tlâk lo,” tiah a ti.