LUKA 4 - Laibaibal Thiang (BSI)

¹ Jesuh cu Thiang Thlarau in a khat i Jordan tiva in a rak kir i ramcar ah Thlarau nih a kalpi.

² Cukaah khuachia nih ni 40 chung a tukforh. Cu cân ah zeihmanh a ei lo. Cu cân cu an dih hnuah a rawl a ṭâm.

³ Cun khuachia nih, “Pathian Fapa na si ahcun, hi lung hi changreu i cang dingin nawl pe ngat,” tiah a ti.

⁴ Jesuh nih, “Minung hi changreu lawngin a nung lai lo, Pathian bia kip in a nung deuh lai, tiah ṭial a si,” tiah a ti.

⁵ Cun khuachia nih tlâng sângpi ah a kalpi i chikkhatteah vawlei pennâk vialte kha a hmuhsak.

⁶ Khuachia nih, “Hi nawlngeihnâk vialte hi, a lianngannâk he kan pêk lai, zeicatiah ka sinah pêk an si cang i ka duhmi pauh ka pêk tawn hna.

⁷ Cucaah ka hmai in naka biak ahcun a dih lakin nata a si ko lai,” tiah a ti.

⁸ Jesuh nih, “Satan, ka hnu ah um! ‘BAWIPA na Pathian bia law amah lawng rian,’ tiah ṭial a si kha,” tiah a ti.

⁹ Cuhnuah Jerusalem ah a kalpi i ṭempal zimah a umter i a sinah, “Pathian Fapa na si ahcun, hika hin vung zuang.

¹⁰ Zeitintiah nangmah kilveng dingin, a vanmi nawl a pêk hna lai,

¹¹ na ke lungah nâ khawng sual nâkhnga lo an kutin an in cawi lai, tiah ṭial a si kha,” tiah a ti.

¹² Jesuh nih, “BAWIPA na Pathian hniksak hlah,” tiah ti a si kha, tiah a ti.

¹³ Khuachia nih a phunphun i a tukforh hnu ah, cân rem i tukforh ṭhan dingin a kaltâk.

¹⁴ Jesuh cu Thlarau thiltikhawhnâk he Galili ah a kir, a thawngpang cu cuka ram hrawngah a thang dih.

¹⁵ An sinagog ah a cawnpiak hna i mi vialte nih an thangṭhat.

¹⁶ Cuticun a tlawnlennâk khua Nazaret ah a phân. A tuah tawn bangin, Sabbath nih ah Sinagog ah a lut i rel dingin a dir.

¹⁷ Isaiah cauk kha an pêk, cazual kha a samh i hi bia ṭialnâk zawn hi a hmuh.

¹⁸ BAWIPA Thlarau cu ka cungah a um, zeicatiah sifakmi hna sin i Thawngṭha chim dingin chiti a ka thuh; lungkuaimi hna damter awkah aka thlah i saltangmi hna luatter ding le, mitcawmi hna khua hmuhter ding le, lamhchihmi hna luatnâk ding

¹⁹ thanh awk le, BAWIPA lunglomh kum phuan le thanh awkah,” timi hi.

²⁰ Cuhnuah Cauk cu a zual i, a zohkhenhtu sinah a pêk i a ṭhu. Sinagog i a ummi vialte an mit cu amah cungah â fu dih.

²¹ An sinah, “Hi cathiang hi ni hin ah nan mithmuh ah a tling cang,” tiah chim hram a thawk.

²² An dihlak in a bia theihpitu ah an cang, a hmurkâ in a chuakmi zângfahnâk bia kha mak an ti ngaingai. Josef fapa kha a si ko lo maw? tiah an ti.

²³ Anih nih, “Hi phungthlukbia hi nanka chim hnawh ko lai lo maw? Sibawipa, nanmah i damter tuah! Kapernaum khua i na tuahmi kan rak theihmi kha, na khua le na ramah hin tuah ve ngat, nan ti ko lai hih,” tiah a ti.

²⁴ Biataktein kan chimh hna, profet ahohmanh an khua mi nih an conglawm bal lo,” tiah a ti.

²⁵ Asinain biadik kan chimh hna, Elijah chan i kumthum le a cheu van a pin i ram pumpuluk ah mangṭâm nganpi a tlun lio ah khan, Israel ram ah nuhmei tampi an um ko,

²⁶ asinain Sidon peng i Zarefat khua i nuhmei nu sinah dah ti lo, ahosinhmanh ah Elijah kha thlah a si lo.

²⁷ Cun profet Elisah chan zongah Israel ramah thinghmui tampi an um ko nain, Siria mi Naman dah ti lo cu ahohmanh thianter an si lo, tiah a ti.

²⁸ Cuticun sinagog i a ummi vialte nih cu bia cu an theih tikah an thin a hung ngai ngai,

²⁹ an tho i khua chungin lengah an nam, an khua lu tlâng i lungpang in thlak dingah an kalpi.

³⁰ An karlak in â zûk i lo diam a kal.

³¹ Cun Galili ram khua pakhat Kapernaum ah a kal i Sabbath ni ah a cawnpiak hna.

³² Nawlngei ngai i a cawnpiak hna caah an khuaruah a har.

³³ Cuticun sinagog ah khuachia thur thlarau a ngeimi pakhat a rak um. Thang ngaiin a ai i

³⁴ “Kanmah te kan umter ko; Nazaret Jesuh, nangmah he pehtlaihnâk zeidah kan ngeih, a kan hrawktu dingah maw na rat? Pathian Mithiang na si kha kan in hngalh,” tiah a ti.

³⁵ Sihmanhsehlaw Jesuh nih a sik i, “Dai tein um law, a chungin chuak,” tiah a ti. Khuachia nih an lakah a hlawnh ta i fahnâk tu pe loin a chuak.

³⁶ An dihlak in mak an ti ngai ngai, “Hihi zeibiadah a si? Nawlngeihnâk le ṭhawnnâk in thlarau thur nawl a pêk hna i an chuak thluahmah ko,” tiah an i ceih.

³⁷ A thawngpang cu cu ram le pawngkam vialte ah a thang.

³⁸ Cun sinagog in a tho i Simon innah a lut. Simon nupi nu cu taklin ngaiin a zaw, amah kongah an rak nawl.

³⁹ A pawngah ava dir i a taklinh kha a sik i a taklin cu a dai cawlh. A tho zau i rawl a chuanpiak hna.

⁴⁰ Zanlei nitlâk lai ah, zawtnâk phunkip in a zawmi kha an ratpi hna i an dihlak cungah a kut a chuan i a damter hna.

⁴¹ Khuachia zong nih, “Krih Pathian Fapa cu na si!” tiah an au i mitampi chungin an chuak. A sik hna i biachim zong a sianh hna lo, zeitintiah amah cu Krih a si kha an hngalh.

⁴² Thaizing khua a dei tikah a chuahtâk hna i hnathiannâk hmunah a kal. Mizapi nih an kawl i asin an phâk tikah, anmah kaltâk ti lo dingin tlaihbawh an timh,

⁴³ asinain an sinah, “Khua dang zongah Pathian pennâk kong hi ka chim awk a si, hi thil ruang i thlahmi ka si,” tiah a ti.

⁴⁴ Cun Galili ram i sinagog kipah phung a chimh thluahmah hna.