LUKA 23 - Laibaibal Thiang (BSI)

¹ Cuticun â pummi dihlak kha an tho i Jesuh cu Pailat sinah an kalpi.

² Amah sualphawtnâk chim hram an thawk, “Hipa nih kan miphun a hrawk i Sizar sinah ngunkhuai pek a khap, Krih, Siangpahrang ka si tiah a chimmi zong kan theih, tiah sual an puh.

³ Pailat nih, “Judah siangpahrang na si maw? tiah a hal. Anih nih, “Na chimmi cu a dik, tiah a leh.

⁴ Pailat nih tlângbawi hna le mizapi sinah, “Hi pa hi a sualnâk ka hmu lo,” tiah a ti.

⁵ Annih cu an hrang chinchin i, “Galili ram in Judia ram khua kip le hi hmun tiangin a cawnpiaknâk ruangah mizapi a buaiter tawn,” tiah an ti.

⁶ Pailat nih Galili kong an chimmi cu a theih tikah, Jesuh cu Galili rammi a si le silo a hal hna.

⁷ Herod peng chungmi a si kha a hngalh cângkâ, Herod sinah a kuat cawlh. Cu cân ah Herod cu Jerusalem ah a rak um ngel cel.

⁸ Herod nih Jesuh a hmuh tikah â lawm ngaingai, hmuh a duhnâk kha cân saupi a si cang. Zeicatiah a konglam mi chim chinmi tampi a rak theih cang i a sin in khuaruahnâk thil pakhat khat hmuh zong â ruahchan caah a si.

⁹ Bia tampi a hal na in, kâ khat hmanh in a let lo.

¹⁰ Tlângbawi hna le nawlbia cawnpiaktu kha an dir i fak piin a sual an kawl.

¹¹ Cuticun Herod le a ralkap hna nih Jesuh cu zomhtaih ngaiin, nichuak capo saihnâk ah an hman. Angki fual ṭha ngai aihter in Pailat sinah an kuat ṭhân.

¹² Cuni thawk in Pailat le Herod cu an i kawm ṭhân, zeitintiah cuhlan vialte cu an i ral.

¹³ Cuhnuah Pailat nih tlângbawi hna le upa hna le mi vialte a auh hna i

¹⁴ an sinah, “Hi pa nih mizapi a buaiter hna timi kongah nan ratpi kha a si i nan hmai hrimhrim ah sual nan puhmi vialte kha ka hlathlai i a sualnâk zeihmanh ka hmu lo,

¹⁵ Herod zong nih a hmu hlei lo, cucaah a sin zongah kan kalter hna a si kha, cucaah hipa nih thihnâk tlak sualnâk zeihmanh a tuah lo.

¹⁶ Cucaah ka tukter lai i ka thlah lai,” tiah a ti.

¹⁷ (zeitintiah thô lio cân ah mi pakhat khat thlah cu a herhmi a si)

¹⁸ Annih cu hmunkhat ah an au i, “Hipa hi hloh law, Barabbas kha kan thlah piak,” tiah an ti.

¹⁹ Cupa cu khuapi chungah ralthawhtertu le lainawn ruang i thong thlakmi a si.

²⁰ Pailat tu nih Jesuh thlah a duh i an sinah bia a chim ṭhân.

²¹ Asinain khenhchih ko, khenhchih ko, tiah an au.

²² Anih nih a voi thumnâk ah, zeiruangah, zeisualnâkdah a tuah? Amah ah thihnâk tlâk thil ka hmu lo. Cucaah ka velhter hna lai i ka kalter ko lai,” tiah a ti ṭhân.

²³ Annih nih aw thangpi i aunâk he khenhchih dingin an halchih len. Cun tlângbawi hna le mizapi aw nih khan a tei.

²⁴ Cuticun an nawlchih len bangin Pailat nih thi dingin bia a khiah.

²⁵ Ralthawh le lainawn ruang i thong i an thlakmi kha an nawl bangin a thlah i Jesuh tu cu an duhning pauh i tuah awkah a pêk hna.

²⁶ Cubangin an kalpi lio ah Sairin khuami Simon khuate lei i cuka hmun i a rami kha an tlaihhrêm i Jesuh hnu lei in putpi awk ah vailam kha a cungah an chuan.

²⁷ Cun mibu tampi nih an zulh, Amah ngaihchiat pi i a ṭap lengmang mi nu hna zong an um ve.

²⁸ Jesuh nih a merhnawh hna i, “Jerusalem fanu hna, ka ṭah hlah u, nanmah le nan fa le ca tu ah ṭap deuh u.

²⁹ Zeitintiah a cân a phân te lai. ‘A cingmi hna le nau pawi lonâk paw le hnukdin ballo mi hna cu mi van ṭha’ an ti te hna lai.

³⁰ Mi nih tlâng sinah, “Kan nenh u” an ti te lai i mual sinah, “Kan khuh u” an ti te lai.

³¹ Zeitintiah thing hring hmanh hi tluk i an tuah ahcun, a ro cu zeitlukindah an tuah hnga.

³² Cuka ah thah awkah mi sual pahnih zong an kalpi hna.

³³ Cun ‘Kalvari’ an timi hmun cu an phân i cukaah an khenhchih, misual hna zong a orh lei ah pakhat a kehlei ah pakhat an khenh chih ve.

³⁴ Jesuh nih, “Ka Pa annih hi ngaithiam hna, zeitintiah an tuahmi hi an hngal lo,” tiah a ti. A hnipuan kha camcawhfung zuh in an i phaw.

³⁵ Mizapi nih dir in an cuan. An lak i uktu hna nih nisawh buin, “Midang hmanh a damter tawn hna; Pathian thimmi Krih a si taktak ahcun Amah zong i damter ngat seh,” tiah an ti hrâm.

³⁶ Ralkap zong nih Amah cu nichuak saihnâk ah an hman i a thormi misur hang kha an pêk,

³⁷ “Judah Siangpahrang na si taktak ahcun, i damter,” tiah an ti.

³⁸ Alu cungah, “HIHI JUDAH SIANGPAHRANG A SI,” tiin Grik holh le, Latin holh le, Hebru holh i ṭialmi kha an tar.

³⁹ Cuticun misual an thlaimi pakhat deuh nih, nihsawh buin,” Krih cu na si lo maw? I khamh law, kan khamh ve ngat,” tiah a ti.

⁴⁰ Asinain pakhat deuh nih sîk pah in, “Pathian hmanh na ṭih lo maw, â khatmi thiamlo conâk tangah na ummi hi ruat hmanh?

⁴¹ Kan ca ahcun a dik taktak ko, zeitintiah kannih cu kan tuahmi he â tlâkin a man kan hmuh, asinain anih cu Ṭhatlonâk zeihmanh a tuah lo,” tiah a leh.

⁴² Cun Jesuh sinah, “Bawipa na pennâk chung i na rat tikah ka philh te hlah,” tiah a ti.

⁴³ Jesuh nih, “Biataktein kan chimh, nihin ah, Paradis ah, keimah sinah na um lai,” tiah a ti.

⁴⁴ Chun suimilam hleihnih hrawngin zanlei suimilam pathum tiang vawlei vialte cu a mui dih.

⁴⁵ Cuticun ni a mui i ṭempal puanzar cu cheuhnih ah â cheu.

⁴⁶ Jesuh cu aw thang pi in a au i, “Ka Pa, nakut chungah ka thlarau ka chiah cang,” tiah a ti. A chim dih in a thaw a dongh.

⁴⁷ Cuticun ralbawipa nih thil umtuning kha a hmuh i, “Hipa hi miding a si hrimhrim ko,” tiah Pathian a thangṭhat.

⁴⁸ Cu thil zoh awkah â pummi vialte nih, thil umtuning cu an hmuh tikah an ṭang i cûm lengmang in an kir.

⁴⁹ A theihhngalhmi vialte le Galili ram in arak zultu nu hna nih cu thil cu ralkhat ah dir in an cuan.

⁵⁰ Cun ngaihmanh, mi pakhat a min Josef biaceihtu chungmi miṭha le midik a um.

⁵¹ Anih nih an bia ceihmi le an bia khiahmi zong a pompi hna lo. Judah khuapi Arimathea khuami a si i amah cu Pathian pennâk â ruahchantu pakhat a si.

⁵² Cupa cu Pailat sinah kalin Jesuh ruak kha a hal.

⁵³ Cuticun a ṭhumh i khiangrâng puan in a tuam. Lung khermi, ahohmanh vui rih lonâk ah khan a chiah.

⁵⁴ Cu ni cu Timhlamhnâk ni a si i Sabbath ni cu a nai cang.

⁵⁵ Galili ram in a rami nu hna nih an zulh i thlân le aruak chiah a si ning zong an hmuh dih.

⁵⁶ Cun an kir ṭhân i rimhmui le rimhmui sathau kha an timhlamh. Cun nawlpêk bangin Sabbath ni ah cun an i din.