LUKA 14 - Laibaibal Thiang (BSI)

¹ Cuticun Sabbath niah Farasih uktu hna lak i mi pakhat innah rawl ei awk i a luh tikah ṭha tein an rak ngiat.

² Zohhmanh a hmai ah mizaw pakhat a phing dihmi a um.

³ Jesuh nih nawlbia hngaltu hna le Farasih hna sinah, “Sabbath ni ah damter hi phungning a si maw si lo tiah,” a hal hna.

⁴ Annih cu dai tein an um. Anih nih mizaw cu â lak i a damter i a kalter.

⁵ Cun an sinah, “Nan lakah, nan lâ siseh, nan caw siseh tikhor chungah tla sehlaw, Sabbath ni ah nan chuah lai lo maw?” tiah a ti.

⁶ Cu thil he peh tlaiin an let kho lo.

⁷ Cuticun rawl danghnâk i sawmmi hna nih ṭhutnâk ṭha ṭha an i cuhmi kha a hmuh tikah, annih cu tahchunhnâk bia a chimh hna.

⁸ “Ṭhit-umh rawldanghnâk i sawm nansi tikah, ṭhutnâk ṭha bikah ṭhu hlah u, zeicatiah nangmah nâk biapi deuhmi a rak sawm sual ahcun,

⁹ an sawmtu nih, na ṭhutnâk hi rak kian tuah, tiah a ti tikah, ningzak ngaiin a niam nâkah na ṭhu ṭhan sual lai.

¹⁰ Asinain sawm nan si tikah, ṭhutnâk a niam bikah vâ ṭhut cia. Cuticun an sawmtu arat tikah, ka kawi ṭhutnâk ṭhadeuh ah hin rak ṭhu tuah an ti lai, cuticun rawl na ei pimi hna hmaiah thangṭhat na si lai.

¹¹ Zeitintiah mah le mah â santermi pauh ṭhumh an si lai i mah le mah â niamtermi pauh santer an si lai,” tiah a ti.

¹² Cuticun amah sawmtu sin zongah, “Chun ah siseh, zanah siseh, rawldanghnâk na tuah tikah, na hawikawm, na rualchan, na chungkhat na innpa mirum hna cu sawm hna hlah. Zeicatiah an in sawm ve lai i an in cham ṭhân lai.

¹³ Sihmanhsehlaw rawldanghnâk na tuah tikah, misifak, pumtling lomi le kebei, mitcaw tu na sawm hna lai.

¹⁴ Cuhna nih chamnâk ding an ngeih lo caah thluachuah nahmuh lai, miding mi hna thawhṭhân ni ah cham na si te lai,” tiah a ti.

¹⁵ Cabuai i rawl adûm pimi hna chungin mi pakhat nih a sinah, “Pathian pennâk chungah rawl a ei khomi hna cu mithluachuak an va si lai dah,” tiah a ti.

¹⁶ Anih nih, “Mi pakhat nih, zanah rawldanghnâk nganpi a tuah i mi tampi a sawm hna,

¹⁷ ei cân a zat tikah a sawmmi hna sinah, ‘Ra cang u, zeizong vialte timhcia a si dih cang, tiah va chim dingin sinum a thlah hna.’

¹⁸ Asinain annih nih lungrual tein sawnhtarhnâk an rak kawl dih. A hmasa bik nih a sinah, ‘Lo ka cawk i a zoh dingah ka kal a herh, cucaah hei ka chimhpiak u tiah a ti.’

¹⁹ Midang nih, ‘Caw tuah nga ka cawk i an ṭhat le ṭhat lo hniksak ka duh. Zângfah in hei ka chimh piak u,’ tiah a ti.

²⁰ Midang zong nih, ‘Nupi ka ngei, kara kho lai lo,’ tiah a ti.

²¹ Cuticun sinum nih apu cu ava chimh. Inn ngeitu cu a thin a hung i a sinum sinah, ‘Khulrang in va kal law, zatlâng lam le, kirkhawr vialte va ṭol law misifak, pumtlinglo le kebei le mitcaw kha hika ah ratpi hna,’ tiah a ti.

²² Cun sinum nih, ‘Ka pu, na chim bangin katuah nain hmunlawng a um ko rih,’ tiah a ti.

²³ Apu nih, ‘Zatlâng lam le dai kirkar ah va kal rih law ka inn a khah khawh nâkhnga va khawm rih hna.

²⁴ Zeitintiah kha ka sawmmi hna nih khan ka rawl danghmi hi an ei hrim hrim lai lo, a ti,”’ tiah a ti hna.

²⁵ Cun mi tampi nih Amah kha an zulh, a mer hnawh hna i an sinah,

²⁶ “Ka sinah a rami pauh nih apa le anu le, a nupi le, afa le, a unau le a farnu, asi, amah nun tiang a huat lo ahcun aka zultu a si kho lai lo.

²⁷ Cun a vailam put in aka zul lomi pauh cu ka zultu a si kho lai lo.

²⁸ Zeitintiah nan lakah mi pakhat khat nih, Inn sak i tim ulaw, a dih tiang saknâk phaisa nan ngeih lai le ngeih lai lo ṭhut buin a ruat hmasa lomi nan um hnga maw?

²⁹ Culoahcun, a hram a bunh cang nain, a sak dih lo ahcun, a hmutu pauh nih an nih sawh lai,

³⁰ ‘Hi pa nih insak â thawk i a lim kho ṭung lo,’ an ti sual lai.

³¹ Asiloah siangpahrang pakhat nih siangpahrang dang doh dingin a kal laiah, mi 20000 he amah doh ding i a rami hna cu mi 10000 he a doh ngam le ngamh lai lo, ṭhut buin ruat hmasa loin a um lai maw?

³² Cutiasilo hmanh ah, siangpahrang dang cu hlapi i a um lioah, daihnâk ser awkah lam kal a thlah lai.

³³ Cubantukin nanmah lak i mizei hmanh hi, a ngeihmi vialte a kaltâk lomi cu ka zultu a si kho lai lo.

³⁴ Cite hi a ṭha, asinain cite hi a alnâk a loh ahcun zeitindah an alter ṭhân khawh lai?

³⁵ Kawmdawm caah a ṭha ti lo i ekpon ca zongah a ṭha lo. Hlawnh men ding a si ko cang. Theihnâk dingah hnâ a ngeimi pauh nih thei ko seh,” tiah a ti.