LAMKALTU 8 - Laibaibal Thiang (BSI)

¹ Saul zong nih a thih cu a hna a tla ve. Cu cân thawk in Jerusalem i kawhhran kha fak piin serhsat an thawk hna. Lamkaltu hna dah ti lo cu Judia le Samaria ramah an i ṭhek dih.

² Pathian mi hna nih Steven kha an vui i fak piin an ṭah.

³ Saul cu kawhhran caah a hrang ngaingai, in kip ah lut in nu le pa thlu loin a hnuh hna i thongah a thlak hna.

⁴ Cun â ṭhekmi hna cu an kalnâk pauh ah bia cu an chimh hna.

⁵ Filip cu Samaria ah a kal i Krih kong kha a aupi.

⁶ Mibupi nih khuaruahhar a tuahmi an hmuh i an theih caah ruahnâk hmunkhat ngeiin Filip chimmi cu biapi ngai in an ruat.

⁷ Zeitintiah thlarau thûr zong nih thang piin an au i mi chungin an chuak. Mizeng le kebeimi tampi zong an dam.

⁸ Cuticun cu khua ah a ngan ngaimi lawmhnâk a phân.

⁹ Mi pakhat Simon tiah kawhmi a um, cu hlanah cu khua ah doih a rak hmang tawn. Cucaah mi ngan ngai in â chim i Samaria khua mi kha an khuaruah a harter tawn,

¹⁰ a hmebik in a nganbik tiangin, “Hi pa hi a liannganmi Pathian thiltikhawhnâk a si, tiah an ti i a chimmi kha biapi ngai in an ruah.

¹¹ A doihthiamnâk nih cân sau nawn an khuaruah a harter hna caah biapi ngaiin an ruah.

¹² Filip nih Pathian Pennâk Thawngṭha bia, Jesuh Krih min i a chim tikah an zumh cawlh hna i nu le pa he Baptisma an in.

¹³ Simon hmanh nih a zumh ve i baptisma a in hnu zongah Filip cu a hna tlakpi i hmelchunhnâk le khuaruahharnâk a tuahmi a hmuh tikah mak a ti ngai ngai.

¹⁴ Cubangin Jerusalem i a ummi lamkaltu hna nih Samaria khua mi hna nih Pathian bia an cohlan ti kha an theih tikah Peter le Johan kha an sinah an thlah,

¹⁵ an phâk tikah Thiang Thlarau an hmuh khawh nâkhnga an caah thla an cam.

¹⁶ Zeitintiah cuhlan ah aho cung hmanh ah a phân rih lo. Bawipa Jesuh min in baptisma an in lawng a si.

¹⁷ Cuticun lamkaltu nih an cungah an kut an chuan i Thiang Thlarau kha an co.

¹⁸ Cubangin lamkaltu nih kut an chuan i Thiang Thlarau an comi kha Simon nih a hmuh tikah,

¹⁹ “Hibantuk nawlngeihnâk hi ka pe ve u, an cung i kut ka chuanmi pauh nih Thiang Thlarau an co ve nâkhnga tiah an sinah phaisa pêk a timh.

²⁰ Asinain Peter nih, “Pathian thilpêk phaisa i cawk na timh ruangah na phaisa hi nangmah he lotlau ve seh!

²¹ Hi thil ah hin nâ tel ve lo i covo zong na ngei lo, na lungput hi Pathian hmai ah a ṭha lo,

²² Cucaah hi na suahsualnâk hi i ngaichih law na lungthin ruahnâk ṭhalo hi ngaihthiam na si khawh nâkhnga Pathian sinah thla cam.

²³ Zeitintiah a khâmi sivai nih an hlanh i sualnâk nih an ṭemmi hi ka hmuh ko,” tiah a ti.

²⁴ Simon nih, “Nan chimmi hi ka cungah a tlun sual nâkhnga lo nanmah nih Bawipa sinah thla ka campiak u,” tiah a ti hna.

²⁵ Cuticun Bawipa bia kha hngalhter in an chim dih in Samaria ram khuakip ah thawngṭha bia chim pah in Jerusalem khua ah an kir.

²⁶ Cun Bawipa vanmi pakhat nih Filip kha a chawnh i, “Tho law chaklei ah Jerusalem in Gaza lei i kalmi lamah va kal cucu ramcar hmun a si,” tiah a ti.

²⁷ Cun a tho i a kal. Cun zohhmanh Ethiopia mi pakhat, Ethiopia bawinu Kandak tang i tildih pa a bawi ngaimi, a chawva vialte zohkhenhtu cu Jerusalem ah Pathian bia dingin a kal,

²⁸ a tlunlei ah a lêng cungah ṭhu in profet Isaiah cauk a rel.

²⁹ Thlarau nih Filip sinah, “Khi lêng khi va naih law, va kom tuah,” tiah a ti.

³⁰ Filip cu a va tli i profet Isaiah cauk a rel thawng a theih, “Na relmi kha a sullam na hngal maw?” tiah a ti.

³¹ Anih nih, “Mizeihmanh nih fianter loin zeitindah ka hngalh khawh lai?” tiah a ti. Cuticun a sin i ṭhu dingin Filip kha a sawm.

³² A relmi Cathiang cu, “Tuu bangin thah awkah an hruai i Tuufa a hmul mettu hmai i dai tein a um bantukin Anih zong nih a kâ a âng lo.

³³ Mualphoter i a um lioah a dinnâk an lâkpiak i a chanmi hna lakah ahonihdah a konglam a chim lai? Hi lei in a nunnâk an lâkpiak,” timi zawn hi a si.

³⁴ Tildih pa nih Filip sinah, “Profet nih aho kong dah a chim, amah kong maw midang kong dah? tiah a ti.

³⁵ Filip nih Cathiang kha a hram in â thawk i Jesuh kong a chimh.

³⁶ Cubangin an kal lioah ti umnâk an phân. Tildih pa nih, “Zoh hmanh, hika ah ti a um. Baptisma ing dingin zeinihdah aka donh?” tiah a ti.

³⁷ Filip nih, “Na lungthin dihlak in na zumh ahcun na in khawh,” tiah a ti. Anih nih, “Jesuh Krih hi Pathian Fapa a si, tiah ka zumh,” tiah a ti.

³⁸ Lêng kha a dirter i Filip le Tildih pa cu ti chungah an vung ṭum i baptisma a pêk.

³⁹ Cun ti chungin an chuah tikah Bawipa Thlarau nih Filip cu lodiam a lâk. Tildih pa nih a hmu kho ti lo, asinain lunglawm ngai in a kal.

⁴⁰ Filip cu Azotas khua ah an hmuh ṭhân. Cun a lan i Sisaria khua tiangin khuakip ah Thawngṭha a chim.