LAMKALTU 7 - Laibaibal Thiang (BSI)

¹ Tlângbawi nganbik nih, “Hihi a dik maw?” tiah a ti.

² Anih nih, “U le nau le pa le hna, ngaihmanh u: Kan pa Abraham cu Haran khua a um hlan i Mesapotamia ram i a um lio ah, sunparnâk Pathian kha a sinah â lang i

³ a sinah, “Na ram le na rualchan kha kaltâk hna law ram kan hmuhsak laimi leiah kal,” tiah a ti.

⁴ Cuticun Khaldia mi hna ram kha chuahtâk in Haran khua ah khua a sa. Cun a pa a thih hnuah, cuka cun atu i nan umnâk ramah Amah nih a pêmter.

⁵ Pathian nih ro zeihmanh a pe lo, a ke chiahnâk khim hmanh a pe lo. Asinain fa a ngeih hlan hmanh in amah le a techin fapar tiang i an co hngami pe dingin bia a kamh.

⁶ Pathian nih hitihin a chim, a tefa hna cu mi ramah kum zali khual an si lai i cu cân ah serhsatnâk tuar in sal ah an tâng lai.

⁷ Pathian nih sal i an tannâk ding miphun cu keimah nih ka ruah lai, cu hnu ah an chuak lai i hi hmun ah hin ka rian an ṭuan lai.

⁸ Amah nih a sinah cuarpar tannâk bia kha a kamh. Abraham nih Isak a hrin i niriat ni ah a cuarpar a tan. Isak nih Jacob a hrin i Jakob nih hringtu hleihnih kha a hrin hna.

⁹ Hringtu hna nih Josef kha an hnahchuah i Izip ramah an zuar. Asinain a sinah Pathian a um i

¹⁰ a harnâk vialte chungin a khamh i Izip siangpahrang Faraw hmai ah fimnâk le duhpiaknâk a pêk. Cun Izip mi vialte le a inchung mi vialte uktu ah a canter.

¹¹ Cun Izip le Kanan ram vialte ah mangṭam le harnâk nganpi a tlung i kan pu le nih ei awk an ngei ti lo.

¹² Asinain Jakob nih Izip ramah buh a um ti a theih tikah kan pu le cu a thlah hmasa hna.

¹³ Cun a voi hnihnâk an va kal ah khan Josef nih a unau sinah â hngalhter i Josef chungkhar kha Faraw zong nih a rak hngalh hna.

¹⁴ Josef nih a pa Jakob le a chungkhar vialte a auh hna i mi 75 an si.

¹⁵ Cuticun Jakob cu Izip ramah a pêm i cuka ah amah le kan pu le kha an thi.

¹⁶ Sekem khua ah an rak zawnh hna i Abraham nih Sekem fapa Hamon fale hna sin i phaisa in a cawkmi hmun ah an chiah hna.

¹⁷ Asinain Pathian nih Abraham sin i bia a kamhmi a tlin cân a naih tikah, Izip ramah kan mi le cu an karh ngaingai.

¹⁸ Josef a hngal lomi siangpahrang a chuah tiang khan an karh cuahmah ko.

¹⁹ Cupa nih kan phunhawi kha diriam ngai in a serhsat hna i an lamhchih hna, an fale cu nung kho lo dingin an hlawnh hna.

²⁰ Cu cân ah Moses a rak chuak i Pathian duhmi a si i a pa innah thlathum tiang an zohkhenh.

²¹ Lêng i an chuah tikah Faraw fanu nih a rak char i amah fa bantukin a cawm.

²² Moses nih Izip fimnâk vialte a cawn dih i bia le tuahsernâk ah a min a thang ngai ngai.

²³ Kum 40 a tlin tikah, a unau Israel fa le kha vehvat duhnâk lungput a ngei.

²⁴ An lakah mi pakhat ningcang lo i an tuar termi a hmuh tikah, a kilvennâk ah serhsattu cu teirul cham in Izip pa cu a thah.

²⁵ Zeitintiah a kut in Pathian nih a khamh tiah a unau nih an theithiam lai tiah a ruah, asinain an theithiam lo.

²⁶ A thaizing ah an lak i mi pahnih â sualmi hna ṭhen dingin a va panh hna i, “Minung hna unau nan si khah. Zeiruangahdah nanmah le nanmah fahnâk pêk nan i timh?” tiah a ti hna.

²⁷ Asinain a inpa sin i fahnâk tuah a timtu pa nih a nam i, “Kan cungah uktu le biaceihtu ah ahonihdah an ser?

²⁸ Nizan i Izip pa na thah bang khan thah nakan duh maw?” tiah a ti.

²⁹ Cu bia ruangah Moses cu Midian ramah a zâm i fa pahnih a ngeih tiangin cuka ah a um.

³⁰ Kum 40 a liam hnuah Sinai tlâng ramcar ah burbuk a alhmi in Bawipa vancungmi a sinah â lang,

³¹ Moses nih cucu a hmuh tikah mak a ti ngaingai i zohfiang ding i a va panh lioah Bawipa aw a sinah a phân.

³² ‘Keimah cu na pupa hna Pathian - Abraham Pathian, Isak Pathian, Jakob Pathian’ Ka si, tiah a ti. Cun Moses cu a therh i a zoh ngam lo.

³³ Bawipa nih, “Na kedan kha i phoih; zeitintiah na dirnâk vawlei kha hmunthiang a si.

³⁴ Izip ram i ka mi le hna harnâk ka hmuh ko, an hrum ai zong ka theih, anmah khamhtu dingah ka ra. Ngaihmanh, Izip ramah kan thlah lai,” tiah a ti.

³⁵ “Moses, ‘uktu le biaceihtu ah ahonihdah an ser’ tiah an hlawtmi cu, burbuk i vanmi a sin i â langmi nih khan a bomh i amah cu uktu le khamhtu dingah Pathian nih a thlah.

³⁶ Izip ram le, Rihli sen le, Ramcar hna ah kum 40 chung khuaruahhar thil le hmelchunhnâk hna a hmuhter hnuah, anmah kha a hruai hna.

³⁷ “Hihi Moses nih Israel tefa hna sin i a chimmi cu a si. BAWIPA nan Pathian nih keimah bantuk profet pakhat nan unau hna chungin a chuahter te lai, amah bia cu nan rak ngaih lai.

³⁸ “Amah hi a si, ramcar i â pummi hna lak i a rak ummi, Sinai tlâng i vanmi nih a chawnhmi, kan pu le hna sin i bia chimtu le kan sin i pêkding bia nung rak hmutu kha,

³⁹ hringtu hna nih a bia an ngaih duh lo i an hlawt. An lungthin nih Izip ram lei a hawih,

⁴⁰ Âron sinah, ‘a kan hruaitu dingah pathian kan tuahpiak ko; hi Moses Izip ram in a kan chuahpitu hi a thawng kan thei ti ṭung lo,’ tiah an ti.

⁴¹ Cu cân ah cawtum lem an ser, milem hmaiah rai an thawi i ankut in an serchawmmi cungah an i lawm.

⁴² Cuticun Pathian nih a mertâk hna i van i arfi an biak khawh nâkhnga annih cu hnulei a chit hna. Profet hna ca-uk ah, ‘Ramcar ah kum 40 chungin raithawinâk sa that in nanka pêk maw, maw Israel chungkhar hna?

⁴³ Molok biakthlâm nan ser i nan pathian Refan arfi lem biaknâk i nan sermi hna cu; Cucaah Babilon khua pinlei ah kan kalpi hna lai,” tiah an rak ṭial bang khan.

⁴⁴ Moses sinah tuah awk i muisam a langhter bang khan kan pu le nih ramcar ah theihpitu puanthlâm kha an rak ngei.

⁴⁵ Cu puanthlâm cu kan pu le nih an i kalpi peng i Pathian nih kan pu le hmai i Gentel a ṭhawlmi hna nâk ram i an um lioah Joshua le a mi le hna nih an umpi hna i David chan tiangin cuka ah an um.

⁴⁶ David nih Pathian duhpiaknâk a hmuh i Jakob Pathian caah umnâk tuahpiak a timh.

⁴⁷ Asinain Solomon nih a inn cu a sakpiak.

⁴⁸ “Sihmanhsehlaw Cungnungbik cu kut i sakmi ṭempal ah khua a sa bal lo: Profet nih:

⁴⁹ ‘Van khi ka ṭhutdan a si i lei hi ka ke chiahnâk a si. Zeibantuk inn dah nan ka sakpiak lai? BAWIPA nih a ti. Kâ dinhnâk hmun zong zeidah a si?

⁵⁰ Keimah kut in thil vialte hi ka ser hna lo maw? a ti,’ timi bang khan.

⁵¹ “Mi lungkhong, lungthin le hnakhaw cuarpar tan lomi hna! Thiang Thlarau hi nan ralchanh zungzal ko lai maw; nan pupa hna tuah bantukin nan tuah ve a si hih.

⁵² Nan pupa hna nih an sersat lomi profet an um maw? A ra dingmi Mifel kong chimchungtu kha an thah hna, nannih hi cu Mifel tlaitu le thattu nan si,

⁵³ Nawlbia, vanmi hna pêkmi a hmu i a zul lomi hna,” tiah a ti.

⁵⁴ Cu bia an theih tikah an lungthin fei chunh bantuk a si i Steven cu an hacang an rial hnawh.

⁵⁵ Asinain a nih cu Thiang Thlarau in a khatmi a si i van lei a zoh peng, Pathian sunparnâk le Pathian orhlei ah Jesuh a dir kha a hmuh;

⁵⁶ “Zohhmanh u, van â ongmi ka hmuh i Pathian orhlei i Mi Fapa dir zong ka hmuh! tiah a ti.

⁵⁷ Annih cu thang ngaiin an au, an hna an phih i amah cu an namchih.

⁵⁸ Khuapi lengah an hnuh i lungin an cheh. Cu thil hngalhpitu hna nih tlangval pakhat a min Saul kehramah an puan kha an chiah.

⁵⁹ Steven nih, “Bawipa Jesuh ka thlarau rak cohlang ko, tiah Pathian a auh lioah lungin an cheh.

⁶⁰ Cuticun a khuk â bil i aw thang ngaiin, “Bawipa hi sualnâk mawh hi an cungah tlunter hlah,” tiah a ti. Cu bia a chim dihin â hngilh.