LAMKALTU 6 - Laibaibal Thiang (BSI)

¹ Cu cân i zultu an hun karh lengmang lioah, nichiarte thil an i phawtnâk kongah an nuhmei zei i an rel hna lo ruangah Grik holh a hmangmi Judah mi kha an phunsaih hna.

² Cuticun hleihnih hna nih zultu vialte an kawh hna i, “Pathian bia chim chia tain cabuai i rian kan ṭuan ahcun a ṭha lai lo.

³ Cucaah ule nau hna, nan lakah mi pasarih, mi thangṭhatmi, Thiang thlarau le fimnâk i a khatmi thim hna ulaw, cu hna cu hi thil tawlreltu ah kan ruah hna lai.

⁴ Kannih tu cu thlacam le phungchim ah kan i pe peng ko lai,” tiah an ti.

⁵ An chimmi nih mi vialte an lung a lomhter, cuticun mi an thim hna; cu hna cu; zumhnâk le Thiang thlarau in a khatmi Steven, Filip, Prokhoras, Nikanor, Timon, Parmenas le Antiok khua mi Nikolas Judah phung zulmi an si.

⁶ Cu hna cu lamkaltu hmaiah an dirter hna i annih nih an cungah kut chuangin thla an camh hna.

⁷ Pathian bia cu a karh chin lengmang; Jerusalem khua ah zultu an karh chin leng mang i tlângbawi lak zongah mi tampi nih zumhnâk kha an pom.

⁸ Steven zumhnâk le thiltikhawhnâk in a khatmi nih khuaruahharnâk nganpi le hmelchunhnâk kha zapi hmai ah a tuah tawn.

⁹ Asinain salchuak mi hna Sinagog timi i â pummi (Sairinmi hna le Alexandria mi hna le, Silisiami le Asia mi ) cheukhat hna nih Steven kha an rak al.

¹⁰ A fimnâk le amah chimpitu Thlarau kha an tei kho lo.

¹¹ Moses le Pathian a thangchiat kha kan theih, tiah sual puhtu ding a thli tein zik an nawh hna.

¹² Cun zatlâng le, upa hna le nawlbiacawnpiaktu an forh hna i an tlaih i biaceihtu hna sinah an kalpi.

¹³ Lih chimmi theihpitu kha an i ser i, “Hi pa nih hin hi in thiang le nawlbia ralchanh in bia a chim lengmang,

¹⁴ zeitintiah Nazaret Jesuh an timi nih hi in hi a hrawh lai i Moses nih nawlbia a kan pekmi zong a thlen dih lai tiah a chimmi kan theih,” tiah an ti.

¹⁵ Biaceihnâk i a ṭhumi vialte nih Steven cu cat loin an zoh peng i a hmai kha vanmi hmai bantukin an hmuh.