LAMKALTU 27 - Laibaibal Thiang (BSI)

¹ Cuticun Itali panh dingin biakhiahnâk an tuah hnu ah, Paul cu thongtla midang hna he Augustas phu i ralbawi pa Julias kut ah an chanh.

² Cuticun Adramittium khua tilawng, Asia rili kam hrawngtu ah kan i cit i Mesidonia ram Thesolonika khua mi Aristarkas zong kan sinah a um.

³ A thaizing ah Sidon khua kan pal. Julias cu Paul cungah a ṭha ngaingai, a hawile vehvat le zohkhenhnâk nawl zong a pêk.

⁴ Cuka in rili i kan kal ṭhân tikah thli nih a lettalam in a kan hranh i Saipras tikulh phên thli khurnâk lei kan panh.

⁵ Silisia ram le Pamfilia ram dep rili kan lonh cuahmah i Lisia peng i Mira khua kan phân.

⁶ Cuka ah ralbawi pa nih Alexandria tilawng Itali ram i a kal hngami a hmuh i cuka ah a kan citter.

⁷ Duhsah tein ni saunawn kan kal hnuah har ngai in Nidas khua pawng kan phân. Thli ruangah hmailei kan panh khawh lo caah Salmoni pawng i Kret tikulh phen i thli khurnâk lei ah kan i mer.

⁸ Harsa ngai in tikam kan ṭol len hnuah Lasai timi khua pawng i â dawhmi tilawng dinhnâk timi hmun kan phân.

⁹ Cuka ah ni saunawn kan câm i rawl ulh cân zong a luan cang. Cu cân lio i tilawng i kal cu ṭih a nun caah Paul nih ruahnâk a cheuh hna.

¹⁰ “Pu le hna atu i tilawng i kan chuah ṭhan ahcun chiatnâk le rawhralnâk nganpi kan ton lai kha ka hngalh, tilawng le thilri cu chim lo, nunnâk hmanh kan hloh lai tiah phân awk ngai a si,” tiah a ti.

¹¹ Asinain ralbawi pa nih Paul chimmi nâkin tilawng ngeitu le zaptu bia kha a ngaih deuh.

¹² Cun khuasik cân i umnâk ah tilawng dinhnâk cu a ṭhat lo caah, mi tam deuh nih tilawngin chuah i Foinisia khua phanh i cuka i khuasik cân hman kha an duh. Foinisia cu Kret tikulh i tilawng dinhnâk hmun a si, chaklei nitlak le thlanglei nitlak ralden in a ummi a si.

¹³ Chaklei thli cu duhsah tein a hrang pah lengmang i an duhning a rak phân ko rua tiah an ruah, rili pi ah kan kal i Kret tikulh tikam cu kan ṭol cuahmah ko.

¹⁴ Asinain a ṭhawng ngaimi thli a rak phân, ‘Euroclydon’ timi a si.

¹⁵ Cuticun tilawng cu a rak nam len ko, zah awk a ṭhat ti lo caah kan thlah i a kan chawih cuahmah ko.

¹⁶ Cun tikulh fate Klauda timi phen i thli khurnâk ah a kan choih i har ngai in vawkkuang lawng kha kan khamh khawh.

¹⁷ Tilawng chungah an luhter hnuah hri in tilawng he an ṭemchih. Cun surti these tamnâk hmun i luh lai an ṭih ruangah lawng puanzar kha an ṭhumh i thli an i choihter.

¹⁸ Tilet nih a kan thenh tuk caah a thaizing ah tilawngchung thilri hna cu rili ah hlawnh an thawk.

¹⁹ A nithumnâk ah tilawng thilri tiangin kan hlawnh hna.

²⁰ Cubangin ni tamnawn ni le arfi hna zong an lang lo. A kan hranhtu thlitu cu a fak chin lengmang. Nun lai zong kan ruat kho ti lo.

²¹ Rawl zong ei lo i saupi an um hnuah, Paul cu a dir i, “Pu le hna, ka bia kha rak ngai in, Kret tikulh khan chuak loin rak um u sih law, hibantuk chiatnâk le rawhralnâk hi kan tong hnga lo.

²² Atu zongah hnangam te i um dingin ruahnâk kan cheuh hna, nan lakah ahohmanh nih nunnâk nan hloh lai lo, a lotlau hngami cu tilawng hi a si lai.

²³ Zeitintiah zahan ah a ka ngeitu le a rian ka ṭuanmi Pathian vancung mi ka pawngah a rak dir i ka sinah,

²⁴ “Paul ṭih hlah, Sizar hmai ah na dir hrimhrim lai, tilawng i na sinah a kalmi vialte zong na kut ah an pêk cang,” tiah a ti.

²⁵ Cucaah pu le hna, hnangam tein um u, a ka chimhning tein a um lai tiah Pathian ah zumhnâk ka ngei.

²⁶ Tikulh pakhat khat ah a kan choih te lai,” tiah a ti.

²⁷ Cubangin Andria rili i thli nih a kan choih hramthawk in zan hleilinâk ah zanṭim hrawngah tilawng ngeitu hna nih tikam pakhat khat a phân laimi bangin an hngalh.

²⁸ Ti thuhnâk an tah i pe 120 a si, a rauh hlan ah an tah ṭhan i pe 90 a si.

²⁹ Cuticun tikam lung tamnâk ah choih lai an phân caah tilawng hnulei ah thir cangai an thlak. I ngaih ngai in khua dei lai cu an hngak.

³⁰ Cun lawng zaptu hna nih tilawng kha zâmtâk an timh i tilawng hmailei ah thir cangai hna thlak lai bangin vawkkuang lawng hna cu ti cungah an ṭhumh hna.

³¹ Paul nih ralbawi pa le ralkap hna sinah, hi hna hi tilawng i an um peng lo ahcun khamh khawh nan si lai lo,” tiah a ti.

³² Cuticun ralkap hna nih vawkkuang lawng hrennâk hri kha an chah i lodiam an tlakter dih.

³³ Khua a dei lai ah Paul nih mi vialte cu rawl ei a fial hna. “Nihin hi ei loin ni hleili nan hngahnâk ni a si, zeihmanh nan ei lo.

³⁴ Cucaah rawl hi ei tuah u, nan nun khawh nâkhnga caah a si, nan lakah nan samfa pakhat hmanh a tlau lai lo,” tiah a ti.

³⁵ Cu bia a chim dih in changreu a lak i mi vialte hmai ah Pathian sinah lomhnâk bia a chim, cun a cheu i ei a thawk.

³⁶ Cuticun an dihlak in an mit an hun au i rawl cu an ei.

³⁷ Tilawng ah â citmi cu kan dihlak in 276 kan si.

³⁸ Cuticun pawkhim tein an ei hnuah tilawng a zan deuhnâk dingah an phawrhmi facang cu ti ah an thlak.

³⁹ Khua a dei tikah khuazei ram dah a si ti kha an hngal lo. Asinain these langhnâk ti fonghlei hmun kha an hmuh i cuka ah an tilawng cu dinhter an timh.

⁴⁰ Thir cangai hrennâk kha an phoih i Rili ah an chiah ta. Cu tikah tilawng kalternâk hri zong an phoihchih i hmailei puanzar cu thlitu hranh dingin an santer i these umnâk kha an panh.

⁴¹ Asinain tikam i tilet pahnih â tonnâk hmun ah tilawng hmailei zum cu â sawh i tilawng cu a cawlcâng kho ti lo. Tilawng hnulei tu cu tilet a ṭhawng tak takmi nih a huailen i kuai hram â thawk.

⁴² Ralkap hna nih thongtla kha thah an rak timh hna. Zeicatiah ti an i lio lai i an zâm sual lai ti kha an phâng.

⁴³ Asinain ralbawipa nih Paul kha khamh a duh caah an timhmi cu a thlauh hna, ti lio a thiammi vialte ti ah zuan i tikam ah kai hma sa ding le,

⁴⁴ midang kha thingphek cung le a cheu lawng thilri hna in kai dingin nawl an pêk hna. Cuticun an dihlak in him tein tikam ah an phân dih.