LAMKALTU 25 - Laibaibal Thiang (BSI)

¹ Cubangin Festas cu cu peng a rak phâk hnu ni thumnâk ah Sisaria in Jerusalem ah a kal.

² Cuticun tlângbawi hna le Judah upa hna nih Paul kong cu a chiatnâk lei lawngin an rak chimh.

³ Jerusalem i kalpi awk zongah an rak nawl. A ratnâk lam i rak bawh i thah kha an timhmi a si.

⁴ Asinain Festas nih Paul cu Sisaria khua ah kilvennâk tangah um sehlaw, amah zong a rauh hlan ah a tlun te lainâk a chim.

⁵ “Cucaah nan lak i nawlngeitu deuh nih ka zul ulaw sualnâk a ngeih le ngeih lo theihnâk ah cu pa cu sual puh hna seh,” tiah a ti.

⁶ An sinah nihra reng lo a câm hnuah Sisaria khua ah a tlung ṭhân. A thaizing ah biaceihnâk ṭhutdanh ah a ṭhu i Paul cu ratpi dingah nawl a pêk hna.

⁷ Anih cu a rak phâk tikah Jerusalem in a rami Judah mi hna cu a pawngah an dir i Paul cungah sual puhnâk a phunphun an chuan nain a dik hrimhrim tiah fiantermi pakhat hmanh an ngei lo.

⁸ Paul nih a palh lonâk kong a chim ve i, “Judah mi nawlbia ka buar lo i ṭempal ka thurter fawn lo. Sizar sin zongah sualnâk zeihmanh ka tuah lo,” tiah a ti.

⁹ Asinain Festas nih Judah mi hna lakah min ṭhat a duh i Paul sinah, “Jerusalem khua ah kal i ka hmai ah hi bia hi ceih na duh maw?” tiah a hal.

¹⁰ Paul nih, “Sizar biaceihnâk hmaiah ka dir, cuka ah ceih awk ka si, Judah mi cungah sualnâk zeihmanh ka tuah lo, nang zong nih fiang tein na hngalh ko.

¹¹ Misual ka si i thihnâk tlak sualnâk ka tuah a si ahcun thih zong ka el lo, asinain hi hna nih sual anka puhnâk hi zeihmanhlo a si ahcun, ahohmanh nih an sinah anka pe kho lai lo, Sizar sin phân dingin kan nawl ko,” tiah a ti.

¹² Cuticun Festas nih a biaceih hawi a biakchawnh hnuah, “Sizar sinah phâk na hal maw? Sizar sinah na phân hrimhrim lai,” tiah a ti.

¹³ Ni zeimawzat hnuah siangpahrang Agrippa le Bernis cu Festas kut tlai dingin Sisaria ah an ra.

¹⁴ Ni tampi an cam hnu ah Festas nih Paul kong kha siangpahrang cu an chimh, “Felik nih khan thongtla pakhat a rak chiah,

¹⁵ Jerusalem ka kal lioah tlângbawi hna le Judah upa hna nih a konglam an rak chimh i biaceih dingin an ka nawl,

¹⁶ kei nih an sinah, ‘sual phawtmi le sual phawtu hna hmaitonh tein chimṭinâk a um hlan ah thih awkah bia khiah cu Rom phungning a si lo tiah ka rak el hna.

¹⁷ Annih cu hika i an rat tikah, a thaizing ah biaceihnâk ṭhutdan ah ka ṭhu cawlh i cu pa cu ka auhter hna.

¹⁸ Cubantukin sualpuhtu hna nih dir in sual an puh zongah ka rak zumhcia bangin a biapimi zeihmanh an chim lo,

¹⁹ an biaknâk le Jesuh, mi pakhat a thi cangmi, Paul nih a nung ṭhân tiah a chim i cu kong cu an bia taktak cu a rak si.

²⁰ Kei nih cu kong cu a ceih le khân ka thiammi zong a si lo, amah kong ceih dingah Jerusalem i kal a duh le duh lo ka hal,

²¹ asinain Paul nih Augustas biaceihnâk a ka nawl. Cuticun Sizar siangpahrang sin ka kuat khawh hlan cu kilvennâk tang i um dingin nawl ka pêk,” tiah a ti.

²² Agrippa nih Festas sinah, “Kei zong cu pa biachim cu ngaih ka duh ve,” tiah a ti. Anih nih, thaizing ah na ngaih te lai, tiah a ti.

²³ A thaizing ah Agrippa le Bernis cu rumra ngai in an ra i biachimnâk inah an lut. Ralbawi ngan hna le, khuachung i minthang deuh hna he Festas nawlpêk in Paul cu an rak luhter.

²⁴ Festas nih, “Siangpahrang Agrippa le hika i a rami vialte hna, hi nan hmuhmi hi a si, Jerusalem le hi hmun i Judah biaceihtu vialte zong nih nung tlaklo i an ruah i thah awk i an ka halmi cu.

²⁵ Asinain thihnâk tiang sualnâk zeihmanh a tuah lo ti kha ka hngalh, cun amah nih Augustas sinah kal a ka nawl caah kuat ka timh.

²⁶ Asinain hi pa kong ah ka bawipa sinah ṭial awk setsai ka hngal lo, cucaah nan hmai ah ka rak chuahter. Siangpahrang Agrippa, a hlei in nangmah hi ka ti chanbik na si i a umtuning kan halfiannâk thawngin a konglam ṭial awk zeimaw tal ka hmuh khawh nâkhnga.

²⁷ Bawibik sin i thongtla kuat ding ka si lioah, sual an puhnâk kong bia fiang tein hngalhchih lo ahcun kuat awkah ka ruat kho fawn lo,” tiah a ti.