LAMKALTU 24 - Laibaibal Thiang (BSI)

¹ Ni nga hnu ah tlângbawi nganbik Ananias cu upa hna le biachim thiam pakhat, Tertulas he an rak phân. Annih nih mangki bawi sinah Paul cu taza an cuai.

² Paul an auh hnu ah, Tertulas nih sual phawt hram a thawk. “Hmaizahbik Felik, nangmah ruang i hnangam tein kan ummi ruangah le a fimmi na zohkhenhnâk tang i neinung ngai i kan um ruangah,

³ zeitik cân pauh ah, khawzei hmun pauh ah lunglawm tein kan um tawn.

⁴ Asinain saupi hna an hnawhtu si ka duh lo, na ṭhatnâk ruangah bia kamkhat ka chimmi hi ka ngaihpiak dingin kan nawl.

⁵ Zeitintiah hipa hi mi hnahnawk, vulei i Judah mi vialte sinah ṭhennâk chuahtertu Nazaret mi hna lakah an hotu bik a si.

⁶ Ṭempal tiang thurter a timh i kan tlaih, kan phungning in a kong ceih kan timh.

⁷ Asinain ralkap lei bawi Lusia a ra i kan kut chungin zângen in a kan chuh,

⁸ amah sual a phawtu kha na hmaiah ra dingin nawl a kan pêk. Nangmah hrimhrim nih hi sual kan phawtnâk kong hi amah sinin na hngalhkhawh lai,” tiah a ti.

⁹ Judah mi hna nih cu bia cu a dik tiah an pompi.

¹⁰ Mangki bawi nih bia chim dingin a ti hnu ah Paul nih, “Kum tampi hi miphun hna cungah biaceihtu na si cang ti ka hngalh tikah lunglawm tein keimah tein ka leh lai.

¹¹ zeitintiah Pathian bia dingin Jerusalem i ka kal kha ni hleihnih hlei a si rihlo tiah na hngalh khawh lai.

¹² Ṭempal ah siseh, sinagog ah siseh, khuapi chung zongah siseh, mizapi ca i buainâk chuahter dingin mi ka forh hna zong annih nih an hmu hrimhrim lai lo.

¹³ Asiloah atu i sual phawt anka timhnâk zong hi a dik le dik lo an fianter kho lai lo.

¹⁴ Asinain na hmai ah ka phuan lai, ‘bu dang’ tiah an chimmi lam ningin pupa hna Pathian ka biak tawn-Nawlbia le Profet vialte hna cauk chung ṭialmi ka zumh.

¹⁵ Miding le midinglo thawhṭhannâk a um lai tiah Pathian lei ah kâ ruahchan, hi hna zong nih cucu an zumh ve ko.

¹⁶ Cucaah chia le ṭha hngalhnâk thiang ngeih peng i Pathian le minung hmai i sawi awk um lomi si kâ tim peng.

¹⁷ “Kum tampi hnuah ka miphun hna sinah thilpêk le raithawinâk tuah awkah ka ra,

¹⁸ cu thil ka pêkchanh lioah Asia rammi hna nih ṭempal ah thiang tein anka hmuh, mizapi an um lo i hnahnawh lurit a um lo.

¹⁹ Cu hna nih bia an ngeih ah cun hika ah na hmai ah sual anka puh awk a si.

²⁰ Asilole hi hna nih biaceihtu hna hmai i ka dir lioah ka palhmi zeidah chim hna seh,

²¹ hi bia fangkhat ruangah dah ti lo cu, an lak i ka dir lioah khan, “Mithi thawhṭhannâk kongah nihin ah nan hmai ah chalh in ka um,” ka ti hna kha, tiah a ti.

²² Felik nih lam kong cu fiang te i a hngalh hnuah, ‘ralbawibik Lusias cu a rak phâk tikah nan kong cu ka ceih te lai,’ tiah a bia cu a chiah ta.

²³ Paul cu zalong deuh i umter in a hawi le nih an rak zohkhenh le vehvat zong kham loin ven dingah ralbawi pa cu nawl a pêk.

²⁴ Cun ni zeimawzat hnuah Felik cu a nupi Judah nu Drusilla he an ra. Paul cu a auhter hna i Krih Jesuh zumhnâk bia cu a ngai.

²⁵ Cubangin Paul nih dinnâk, i sumnâk, biaceihnâk a um te laimi kha a chim i Felik nih a ṭihtuk hringhran, “Va kal cang, cân rem ka ngeih tikah kan auh ṭhân te lai,” tiah a ti.

²⁶ Paul nih â tlanhnâk dingah phaisa a pêk kha â ruahchanmi a si. Cucaah a auh lengmang i a kawmh tawnnâk cu a si.

²⁷ Kumhnih hnuah Porsias Festas nih Felik cu a thlen; cun Felik nih Judah mi hna lung ton a duh caah Paul cu ṭem buin a chiah.