LAMKALTU 22 - Laibaibal Thiang (BSI)

¹ “Unau hna le pale hna, kâ kilvennâk bia hi rak ngai tuah u,” tiah a ti.

² Hebru holh a hman ti an theih tikah an dai chin chin. Cuticun an sinah,

³ “Judah mi tak tak, Silisia ram Tarsus khua i a chuakmi ka si. Asinain hi khuapi ah hin Gamaliel kehram ah cawng in a `hangchomi ka si, kan pupa hna nawlbia felfai tein cawnpiak ka si. Nihin i nanmah bantukin Pathian caah â zuam taktakmi ka si.

⁴ Hi lam zultu hna hi thihnâk tiangin ka serhsat hna i nu he pa he ka ṭem hna i thongah ka thlak hna,

⁵ tlângbawi nganbik le biaceihtu vialte zong nih cu kong cu anka theihpi khawh lai. An sinin Damaska khua i unau hna pêk ding ca ka lâk i cu khua i a ummi pauh cu hrem ding le, ṭem buin Jerusalem i kalpi awkah ka kal.

⁶ Cubangin ka kal i chunlai hrawng Damaska hauka ka phâk tikah, van in a liannganmi ceunâk kha ka vêlchûm ah a rung ceu.

⁷ Kei cu lei ah ka tlu, “Saul, Saul, zeiruangahdah na ka serhsat,” tiin aw ka theih.

⁸ Kei nih, “Bawipa, ahodah na si?” tiah ka leh. Anih nih, “ Na serhsatmi Nazaret Jesuh ka si,” tiah a ti.

⁹ Ka hawi le nih ceunâk an hmuh i an ṭih, a ka chawntu aw tu cu an thei lo.

¹⁰ Kei nih, “Bawipa zeidah ka tuah lai? tiah ka ti. Bawipa nih, “Tho law, Damaska ah lut, cuka ah na tuah dingah ruahmi vialte cu an rak in chimh lai,” tiah a ti.

¹¹ Cu a liannganmi ceunâk ruangah khua ka hmu kho lo. Ka hawi le nih an kut in an ka tlaih i Damaska ah kan lut.

¹² Cuticun mi pakhat, Ananias, nawlbia lei i â zuam ngaimi le cuka khua i Judah mi vialte lakah thangṭhat bikmi kha

¹³ ka sinah a ra, ka pawngah dir in, ‘Ka nau Saul, na mit dei cang seh,’ tiah a ti. Cu cân thawk in amah cu ka hmuhkhawh cawlh.

¹⁴ Anih nih, ‘Kan pupa hna Pathian nih a duhnâk hngaltu ding le mifel cu hmu in a chimmi theitu dingah an thim.

¹⁵ Zeitintiah na mit in na hmuhmi le na hnâ in na theihmi hi mi vialte sinah hngaltertu na si te lai.

¹⁶ Zeiruangahdah na hngah ko rih? Tho law, Amah min chimpah in Baptisma ing law, na sualnâk thenh tuah,’ a ka ti.

¹⁷ Cubangin Jerusalem ka rak phâk hnuah, thla ka cam lioah, mangcanghlan in ka um i;

¹⁸ Amah kha ka hmuh, “Khulrang in Jerusalem hi chuahtâk, zeitintiah keimah kong na hngalhtermi an zum lai lo, tiah a ka ti.

¹⁹ Kei nih, ‘Bawipa, sinagog kip ah nangmah zumtu hna ka tuk hna i thong i ka thlak hna kha an hngalh dih.

²⁰ Na ca i Martar Steven thisen an chuah lio zongah, kei zong a pawngah dir in, a thihnâk ding hnatlakpitu ka si, a thattu hna puan vengtu ah ka rak um,’ tiah ka ti.

²¹ Anih nih, ‘Chuak law, hika hmun in a hlatnâk ah, Gentel mi hna sinah kan thlah deuh lai, tiah a ka ti,”’ tiah a ti.

²² Cuka zawn a chim tiang cu an ngai i aw thang ngai in, “Hibantuk minung hi, vawlei cung in hloh u, nung dingah â tlak lo,” tiah an ti.

²³ Cuticun an au pah in, an puan an thleh i leidip kha an vorh.

²⁴ Ralbawi hna hotu pa nih ralhruang chungah luhter i cubantuk i an au hnawhchan kha zei set dah a si tiah hngalhnâk dingah tukpah in hal a timh.

²⁵ Saphaw hri in a ṭem hnuah Paul nih a pawng i a dirmi ralbawi pa sinah, “Rommi tuk hi phungning a si maw, thiamlo cotermi zong a si fawn lo?” tiah a ti.

²⁶ Ralbawi pa nih cucu a theih tikah ralkap uktu bawi sinah a kal i, “Na tuah laimi hi i ralring, hi pa hi Rommi a rak si,” tiah a chimh.

²⁷ Cuticun ralkap uktu bawi a ra i, “Rommi maw na si? ka chim tuah,” tiah a ti. Anih nih, “Ka si,” tiah a ti.

²⁸ Ralkap uktu bawi nih, “Rommi sinâk hi phaisa tampi dih in ka ngeihmi a si,” tiah a leh. Paul nih, “Kei cu Rommi in hrinmi ka si,” tiah a ti.

²⁹ Cuticun hrem hnu ah bia hal a timtu hna cu an i zûk cawlh i ralkap uktu bawi zong nih Rommi a si kha a hngalh tikah a thin a phâng, a rak ṭem cangmi ruang hmanh ah khan a ṭih.

³⁰ A thaizing ah zeiruangahdah Judah mi nih sual an puh ti kha hngalhfian a duh i a ṭemnâk cu a phoihpiak, tlângbawi hna le biaceihtu vialte kha a hmai ah rak chuak dih dingin nawl a pêk hna. Paul zong cu a chuahter i an hmai ah a dirter.