LAMKALTU 21 - Laibaibal Thiang (BSI)

¹ Cu thil hna hnuah annih he kan i òhen, tilawng in kan chuak i ding tein Kos tikulh kan phân, a thaizing ah Rodis tikulh kan phân. Cuka in Patara khua kan phân.

² Cun Foinisia ramlei kal ding tilawng pakhat kan hmuh i kan i cit i kan kal.

³ Saipras tikulh kan hmuh i kehlei kam in kan hrial, Siria ram lei ah kan kal i Tair khua ah kan ṭum, zeicatiah tilawng nih a phurhmi thilri kha ṭhumh ding a si.

⁴ Cun zultu kan kawl hna i cuka ah ni sarih kan câm. Annih nih Thlarau hngalhternâk in Paul cu Jerusalem i kal lo dingin an chimh.

⁵ Cu ni hna cu a liam hnuah kan kalnâk ding lam ah kan chuak ṭhân. Unau hna nih an nupi le a fale hna he khualipi hauleng tiangin an kan thlah. Rili kamah kan khuk bil in thla kan cam.

⁶ Mangṭha, dam tein kan i ti hnuah, tilawng ah kan kai i annih zong an kir ve.

⁷ Tair in kan chuah hnuah Ptolemai khua kan phân.

⁸ A thaizing ah kannih Paul hawi le kha kan chuak i Sisaria khua kan phân, evangelist Filip inn ah kan lut, anih cu pasarih hna lak i pakhat kha a si i a sinah kan câm.

⁹ Amah nih bia a phuang tawmi fanu thiang pali a ngeih hna.

¹⁰ Cun ni tampi kan câm, Judia ram in profet pakhat a min Agabas timi a rak phân.

¹¹ Kan sinah a rat tikah. Paul taisawm â lak i a kut le a ke â ṭem i, “Hi taisawm ngeitu hi hi bangin Jerusalem ah an ṭem lai i Gentel hna sinah an pêk lai, Thiang Thlarau nih a chim,” tiah a ti.

¹² Cu bia kan theih tikah kannih le cuka khuami hna nih Paul cu Jerusalem khua ah kal lo dingin kan nawl.

¹³ Paul nih, zeiruangahdah nan ṭah i ka lung nan ka hnoter? Zeitintiah Bawipa Jesuh ruangah cun Jerusalem i ṭemchih lawng si loin thih hmanh ka huam ko,” tiah a ti.

¹⁴ Cubangin kan thlauh khawh lo tikah, “Bawipa nawl si ko ne seh” tiah kan daih tâk.

¹⁵ Cu hnuah kan thil kan tîm i Jerusalem ah kan kal.

¹⁶ Sisaria i zultu mi zeimaw kan sinah an kal ve, annih nih Saipras tikulh mi pakhat a min Nason, zultu hmasa pawl kan tlunnâk ding pa kha an kalpi ve.

¹⁷ Jerusalem kan phâk tikah unau hna nih lunglawm tein an kan cohlan.

¹⁸ A thaizing ah Paul he Jeim sinah kan lut, cuka ah kawhhran upa vialte zong an rak um.

¹⁹ Paul nih an kut a tlaih dih in a rianòuannâk i Pathian nih Gentel mi hna cungah a tuahmi kha a dih umnâk in a chim.

²⁰ Unau hna nih cu bia an hun theih tikah Pathian an thangṭhat. Cun a sin ah, “Unau pa, Judah ram chungah zumtu an tamning na hngalh; nawlbia lei a ṭanh taktakmi an si,

²¹ nang nih Gentel mi hna lak i Judah mi vialte sinah Moses nawlbia ngoltâk in an fale cuarpar tan ti lo ding le Judah nawlbia bangin um theng ti lo dingin na cawnpiak tawn tiah mi chimmi an theih.

²² Zeitindah a si kun lai? Na rak phân ti an theih lai caah mizapi zong an i pum hrimhrim ko lai.

²³ Cucaah na sin i ka chim bantukin na tuah lai. Biakam ngeimi pa pali kan sinah an um

²⁴ anmah kha i kalpi hna law, an sin-ah i thianh ve, an sam mehnâk ding na rin hna lai. Cuticun na konglam i an rak theihmi kha zeihmanh a rak si lo tiah an theih lai. Nangmah zong nih nawlbia ṭha tein na zulh ti kha an theih lai.

²⁵ Gentel mi hna lak i zumtu hna kong tu cu, milem biaknâk sa ei lo ding le, sathi ei lo ding le, hngawng dih sa ei lo ding le, nupa sualnâk tuah ti lonâk kong kan ceih i kan òial cang kha, tiah an ti.

²⁶ Cuticun a thaizing ah Paul nih pa cu â kalpi hna i an sinah â thianh ve. An i thianhnâk cân a dih cang tiah phuan awkah òempal ah a lut i cu cân ah an dihlak caah raithawinâk tuah ding a si.

²⁷ Ni sarih a tlin dengmang tikah, Asia ram i Judah mi hna nih Paul cu ṭempal ah an hmuh tikah mizapi kha an forh hna i amah cu an tlaih,

²⁸ an au i Israel mi hna kan bawm u! Hi pa hi ram kip i mi vialte sinah, minung, nawlbia le, hi inn thang- chiatnâk bia cawnpiaktu a si; cu hlei ah Pathian ṭempal ah Grik mi hna zong a luhpi i hi hmun thiang hi a thûrter,” tiah an ti.

²⁹ (Zeitintiah hi hlan ah hin Efesa mi Trofimas kha khuachung ah amah he an hmuh i cucu Paul nih ṭempal ah a luhpi rua tiah an ruahmi a si)

³⁰ A khuapi in an buai. Mizapi kha an rak tli i Paul cu an tlaih, ṭempal in chuak lak in an hnuh i innkâ kha an khar.

³¹ Thah an timh lioah Jerusalem khua a buai dih timi kong ralkap bawibik hnâ ah a phân.

³² Anih nih ralkap hna le ralbawi hna hruai in chikkhatte ah an umnâk leiah an tli. Mizapi nih ralbawi hna le ralkap an hun hmuh tikah Paul an tuk lenmi kha an ngol.

³³ Ralbawi ngan nih Paul cu a hun naih i a tlaih. Cikcin pahnih in khit u tiah a ti, ahodah a si i zeidah a tuah tiah a hal.

³⁴ Mibu a cheu kha bia pakhat in an au, a dang nih phundang in an au. Cubantuk hnacheh lurit lakah biadik zong an hngal kho ti lo, ralhruang chung i luhpi dingin nawl a hun pêk.

³⁵ Paul nih hleihlâk a phâk lai te ah mizapi nih an zuanhnawh tuk caah ralkap nih an cawi.

³⁶ Zeitintiah mibu tampi nih an zulh i, ‘hloh u’ tiah an au.

³⁷ Paul cu ralhruang chung i an luhpi lai ah ralbawi hna hotu sinah, ‘bia kâ khat ka chim kho hnga maw?’ tiah a ti. Anih nih, ‘Grik holh na thiam hlah maw?

³⁸ Hlan i buainâk chuahtertu Izip pa lainawn hmang thong li rual ramcar i hruaitupa kha na si ko lo maw?’ tiah a ti.

³⁹ Paul nih, “Judah mi, Silisia ram i Tarsus khuami ka si. Khua sawhsawh ummi ka si lo dahkaw, ka zângfah law mibu sinah bia ka chimter,” tiah a ti.

⁴⁰ Cuticun chimnâk nawl a pêk hnuah, Paul cu hleihlak ah a dir i mibu kha a kut in a zauh hna i an dai dih. Cuticun Hebru holh in bia a chim.