LAMKALTU 20 - Laibaibal Thiang (BSI)

¹ Buainâk a dih hnu ah Paul nih zultu kha a sinah a kawh hna i a pom hna hnu ah Masidonia lei panh in a chuak.

² Cuka hrawng ram cu a `ol dih i zultu hna kha bia tampi in thazâng a pêk hna, cuticun Grik ram a phân,

³ cuka ah thlathum a um i Siria ram panh in tilawngin kal a timh lioah, Judah mi hna nih amah thah awk i an bawh caah Masidonia lei tu ah mer `hân â tim.

⁴ Beria khua mi Sopata le Thesalonika khua mi Aristarkas le Sekandas le Derbe khua mi Gaius le Timote, Asia ram mi Tikhikas le Trofimas hna nih Asia ram tiangin an thlah.

⁵ Cu hna cu kan hmaiah an rak kal i Troas khua in an kan hngah.

⁶ Asinain kannih cu thilnu cawhlo changreu Thô ah Philipi khua in tilawng in kan chuak i ni nga nâk ah Troas khua kan phân. Cuka ah ni sarih kan câm.

⁷ Zarhkhat chung ni hmasabik ah zultu kha changreu cheu awkah an i pum, Paul nih a thaizing ah kal â timh cang caah, bia kha zan`im tiangin a chim hna.

⁸ Kan i pumhnâk cungdot ah meiin tampi a um.

⁹ Thlalang-awng ah tlangval pakhat a min Zu`ikhas, a `hu i a rak me i thaw ngai in â hngilh. A mitkuh nih a teituk. Paul nih biachim a peh thluahmah i in dotthum in a tla i thi cia in an vung char.

¹⁰ Paul cu a `um i a bawhhnawh i a pom, “Nan thin phâng hlah u, a nung ko rih,” tiah a ti.

¹¹ Paul cu a kai `hân i changreu a cheu i an ei, saupi khuadei tiangin an sinah bia a ruah hna i a chuak.

¹² Cun tlangval cu dam tein an luhpi i an hna a ngam.

¹³ Kannih cu Assos khua panh ding tilawng ah kan i cit hmasa i cuka in Paul cu citter kan timh, amah nih rem a rak ruahcia bantukin, ke i rak panh kha a timh.

¹⁴ Assos khua in a kan fonh hnuah kan citter i Mitilene ah kan kal.

¹⁵ Cuka cun tilawngin kan kal `hân i a thaizing ah Khios tikulh zawn kan phân. A thaizing ah Samo tikulh kan phân i trokullaim ah kan câm. A thaizing ah Meletas khua kan phân.

¹⁶ Zeitintiah Paul nih Asia ram i an rauh sual nâkhnga lo Efesa zong kha lanhtâk a timh. A sikhawh ahcun Jerusalem ah Pentikos ni hman a timh caah khulrang deuh i kal a duh.

¹⁷ Melitas khua in Efesa khua ah mi a thlah i kawhhran upa kha a va kawhter hna.

¹⁸ A sin an phâk tikah bia a rak ruah hna. Asia ram ka phanh hramthawk in nan sin ka um tiangah nan sin i ka nunning kha nan hngalh.

¹⁹ Toidornâk vialte he, Judah mi nih anka rawiphiar ruang i mitthli tampi he, ka cung i a tlungmi vialte temtuar pah in Bawipa rian kha ka `uan tawn,

²⁰ an ca i a `ha dingmi chimh kha zeihmanh ka `ih lo. Zatlâng sinah siseh, inn kip ah siseh, kan cawnpiak hna;

²¹ Judah mi le Grik mi hna sin zongah an i ngaihchih i Pathian lei i an i mer nâkhnga kan Bawipa Jesuh Krih i zumhnâk an ngeih khawh nâkhnga ka theihter tawn hna,

²² Cucaah hngal ko u, atu ah Jerusalem i kal dingin fialtu ka ngei, cuka ah ka cungah zeidah a tlung lai ti zong ka hngal lo.

²³ Temnâk le harsatnâk nih an don ko tiah Thiang Thlarau nih khuakip ah a ka hngalhtermi lawng ka hngalh.

²⁴ Asinain hi thil hna nih hin `ihnâk pakhat te hmanh anka pe lo. Tlik kâ zuamnâk lam zulh i Bawipa Jesuh sinin ka hmuhmi rian Pathian Zângfahnâk Thawng`ha bia theihter hi lunglawm tein ka lîm khawhnâk ding a si ahcun ka nunnâk hmanh hi ka zâng a râm lo.

²⁵ Pathian Pennâk bia chim i ka vahnâk hmun nannih nih hin ka mui nan hmu ti lai lo ti kha ka hngalh.

²⁶ Cucaah mi vialte thisen ah ka thiang tihi nihin ah kan hngalhter hna.

²⁷ Zeitintiah nansin ah Pathian bia tluantling chim kha ka tlawt hna lo.

²⁸ Cucaah Pathian kawhhran, a thisen i a cawkmi hna tuukhal si nanmah chungin Thiang Thlarau nih hotu an sitermi ah hin nanmah le nan tuurun vialte hna kongah i ralring u.

²⁹ Zeitintiah ka kal hnuah cinghnia hrangrual an rak lut lai i tuu kha an ngân hna lai lo, ti kha ka hngalh.

³⁰ Nanmah chung lila ah hin bia merh a hmangmi an rak chuak lai i lamping ah zultu hna hi an hruai hna lai.

³¹ Cucaah i ralring u, kumthum chung, mitthli he chun le zan mikip ralrin pêk ka ngol lo.

³² Atu ah hin ule nau hna, Pathian le a zângfahnâk bia ah kan chanh hna, cu nih cun an dirter khawh hna i mithiangmi hna sinah comi ro an ngeihter hna lai.

³³ Aho nan phaisa, sui, thilthuam kan hngar bal hna lo.

³⁴ Asi, hi ka kut te nih hin keimah le ka hawi le herhmi cu a chuahpi tawn tiah nan hngalh dih.

³⁵ Cubantuk i teihmâk chuah i rian`uannâk nih thazâng ngei lomi nan bomh khawhnâk lam phun tampi in kan hmuhsak hna. Bawipa Jesuh bia ah, “Hmuh lei nâk in pêk lei ah thluachuah a um deuh,” a timi kha philh hlah u.

³⁶ Cu bia a chim dih in an khuk an i bil i an dihlak in thla an campi.

³⁷ An dihlak in an `ap i Paul hngawngah an i awk i an hnamh len,

³⁸ a mui an hmuh ti lai lonâk kong a chimmi nih an lung a hnoter. Cuticun tilawng umnâk tiangin amah kha an thlah.